Ang Pandaigdigang Krisis Pampinansya at ang mga Implikasyon nito sa mga Manggagawa ng Daigdig
Sa madaling salita, ginagamit ng monopolyo-kapital ang krisis para ilipat ang (tunay na) yaman mula sa maralita patungo sa mayayaman, uk-ukin at pababain ang sahod at paggastos sa serbisyong panlipunan, tanggalin ang mga manggagawa, palaganapin ang walang kasiguruhang trabaho, durugin ang mga karapatan ng mga manggagawa, supilin ang sama-samang mga pagkilos ng mga manggagawa at patindihin ang pagsasamantala sa uring anakpawis.
Ang Pakikibaka Natin sa Imperyalismo
Pero gumaganti ng paglaban ang mga manggagawa.
Sa Vietnam, sumambulat ang walang kaparis na bugso ng mga aksyon ng mga manggagawa sa mga export processing zone kung saan di bababa sa pitong welga na ang inilunsad ngayong taon – sa Panasonic, VICO, Nissei, Asahi Intecc, Yamaha Motor, Sumitomo at Chiyodj Intergre – dahil hindi napupunuan ng sahod ang kahit batayang pangangailangan ng mga manggagawa. Naipagtagumpay ng mga manggagawa sa awto at bakal sa Romania ang malaki-laking pagtaas ng sahod matapos silang maglunsad ng serye ng welga nitong Abril hanggang Mayo. Sa Pransya, daan-daang libong manggagawa ang humungos sa lansangan noong nakaraang buwan sa isang demonstrasyon laban sa mga plano ng gobyernong taasan ang kontribusyon sa pensyon. Mayroon ding bugso ng pag-okupa at welga sa mga lugar ng konstruksyon, mga establisimyento ng paglilinis at mga restawran ng mga migranteng manggagawang nagpoprotesta sa paghihigpit sa mga migrante na pinaplano ng gobyerno. Sa UK, daan-daang libong kawani ng pamahalaan ang nagbabantang maglunsad ng serye ng mga welgang isang-araw ngayong tag-init para iprotesta ang 2% hangganan ng gobyernong Gordon sa pagtaas ng sahod. Sa Norway, naghahanda ang mga kawani ng gobyerno sa antas ng mga bayan na magwelga para sa sahod. Lumalaganap ang mga welga ng mga drayber sa buong mundo – sa UK, Portugal, Spain, Egypt, India, Korea at Thailand – bilang tugon sa sumisirit na presyo ng mga produktong petrolyo.
Sa Pilipinas, bumubuhos ang mga nagpoprotesta sa lansangan, ipinapanawagang tanggalin ang Value-Added Tax sa langis, ibasura ang Oil Deregulation Law, at aprubahan ang P125 dagdag-sahod across-the-board. Nililisan ng mga manggagagawa ang mga pabrika, ng mga drayber ang kanilang mga sasakyan, at ng mga estudyante ang kanilang mga klase para sumama sa mga demonstrasyong ito. Nasasaksihan ng Egypt ang pinakamalaking bugso ng welga simula noong dekada 1940, kung saan nasa unahan ang kababaihang manggagawa. Nagngangalit sila sa neoliberal na mga patakaran ng pribatisasyon na ipinatupad ng gobyernong Nazif na nagdulot ng pagkawala ng trabaho ng libu-libong manggagawa at pagtaas ng implasyon na tinataya ngayong nasa 12% habang di tumataas ang sahod simula pa noong dekada 1970. Sa South Korea, nasa unahan ang mga manggagawa ng isang malawak na alyansang binubuo ng ordinaryong mga mamamayan, estudyante at unyonista na tutol sa bakang imported sa US.
Nakapagmobilisa na sila sa malalaking demonstrasyon at vigil na nananawagang magbitiw si Presidente Lee Myung-bak. Sa South Africa, naghahandang magwelga ang COSATU laban sa pinaplanong mga hakbanging kontra-implasyon ng gobyerno na malamang na magdudulot ng mas malalim na pagkakautang ng mga pamilyang anakpawis at ng mas malawak na kawalan ng trabaho.
Pinakahuling manipestasyon lang ang kasalukuyang krisis ng pundamental na mga kontradiksyon ng pandaigdigang sistemang kapitalista na tumitindi sa panahon ng imperyalistang globalisasyon. Lumalala ang polarisasyong pang-ekonomiya, labis na akumulasyon ng kapital, at labis na produksyon na nagdudulot ng pagtindi ng mga krisis na pang-ekonomiya at sa dulo’y nagluluwal ng pagkawasak ng produktibong mga pwersa ng lipunan. Likas ang mga ito sa isang sistemang nakabatay sa pribadong monopolyong kontrol ng iilan sa panlipunang mga kagamitan sa produksyon. Walang anumang pampasigla sa ekonomiya (fiscal stimulus) o regulasyong pampinansya, gaano man karami, ang makakapag-areglo sa mga suliraning ito.
Ang ating tungkulin: Labanan ang mga atakeng ito sa pamamagitan ng pagkokonsolida ng ating hanay; pag-abot at pag-organisa sa mas maraming manggagawa sa mga pagawaan, opisina at mga komunidad; pakikipagkaisa sa iba pang inaapi at pinagsasamantalahang seksyon ng ating lipunan; at paglulunsad ng mas marami pang welga at iba pang porma ng paglaban sa monopolyo-kapital. Dapat nating palalimin ang ating pag-unawa sa bagong mga opensibang pang-ekonomiya, pampulitika, pang-militar at pang-ideolohiya ng imperyalismo laban sa masang anakpawis ng buong daigdig. Dapat tayong maglunsad hindi lang ng mga pakikibakang pang-ekonomiya, kundi itaas ang mga ito sa pakikibakang pampulitika laban sa naghaharing sistema sa ating mga bansa para kamtin ang pambansang kalayaan at demokrasya, itayo ang sosyalismo at wasakin ang imperyalistang paghahari sa mundo.
Short URL: http://pinoyweekly.org/new/?p=512
Posted by PW Staff
on Apr 20 2009. Filed under Espesyal na Isyu.
You can follow any responses to this entry through the RSS 2.0.
You can leave a response or trackback to this entry
Loading ...
