Gusto mong kumain sa Le Cirque at Bobby Van’s?

Sadyang walang karapatan si Arroyo na magpakita ng luho sa katawan habang naghihirap ang karamihan. Hindi niya maaaring sabihing galing siya sa mayamang pamilya’t sarili niyang pera ang ginagastos sa kanyang pagpapakasasa. At dahil may malaking problema siya sa kredibilidad bunga ng mga iskandalong kinasangkutan niya at ng kanyang pamilya, hindi masisisi ang karamihan kung pakiramdam nila’y parati silang pinagnanakawan.

Katwiran ni House Speaker Prospero Nograles kamakailan, “I think we should stop making the President a punching bag, and let us concentrate more on the donut, not the hole. And let’s look at the better things in life…(E)very time we hit the government, and hit it excessively, we are destroying our own house, we are destroying our own nation. We are destroying our nation before the international community. I don’t think that’s what we want.”

Siguro’y nakalimutan ni Nograles na may malalim na dahilan kung bakit patuloy na binabatikos ang pinakamamahal niyang Pangulo. Ang sinasabi niyang mas magagandang aspeto ng buhay ay hindi nakikita’t nararamdaman dahil patuloy pa rin ang kahirapan at ang karamihan ay pinagkakaitan.

Sino kaya ang unti-unting sumisira sa ating bansa? Sino kaya ang hindi makayang sagutin nang direkta ang mga akusasyon at ang sinisisi ngayon ay ang diumanong imoral na midya dahil sa walang-tigil na batikos na nakukuha ng mga nasa kapangyarihan, lalo na ang Pangulo’t ang delegasyon niya sa Estados Unidos?

Malinaw na ang pagpunta sa mga mamahaling kainan ay hindi nakakatulong sa intelihenteng diskurso ng mga opisyal ng gobyerno. Mukhang matindi ang epekto ng mga kinain nila sa kanilang pagtingin sa sarili. Pasensiya na kung nawalan ka ng gana sa pagkain, pero alam mo naman kung sino ang dapat sisihin.

Para makipag-ugnayan sa awtor, pumunta sa www.dannyarao.com.

1 2

Short URL: http://pinoyweekly.org/new/?p=3442

Posted by Danilo Araña Arao on Aug 14 2009. Filed under (Kolum), Konteksto. You can follow any responses to this entry through the RSS 2.0. You can leave a response or trackback to this entry