Nanindigan ang mga Manobo ng Lianga, Surigao del Sur laban sa okupasyon ng militar sa kanilang lupain. Noong Agosto 30, nagtagumpay sila sa laban. Pero hindi pa tapos ang depensa sa kanilang komunidad. May maitim na balak ang mga makapangyarihan sa tagong yaman sa kaibuturan ng kanilang lupa.
Agosto 29 ang huling araw ng mga Manobo sa evacuation center sa Tandag, Surigao del Sur. Kumpirmadong napalikas na ang mga militar (sa ngayon, banta pa nila) na nanirahan sa kanilang mga tahanan sa Lianga. Natuwa ang mahigit 1,700 bakwit na Manobo. Iniligpit na ang kanilang mga gamit. Nagluto na ng mababaon. Maaga silang natulog. Handa na silang umuwi.