Hindi pa nakakalayo ang umaga sa paliligo
Nang sa kanya’y bumuhos ang tubig na kumukulo.
Mula pa sa tungkong labi ng pasistang pangulo,
“Igawad na sa Maguindanao ang kamay ng Martial Law.”

Una nang inihain ang writ of amparo
Sa mga Ampatuan na kanyang kaalyado.
Writ of Habeas Corpus, ay isinilid niya sa sako.
Mas malala pa ito sa rimarim ng 1972.

Ngunit katotohana’y ‘di mabubura sa paligo
Ang deklarasyong ito ay matagal ng niluluto.
Ang pangulo nating ito ang pinuno ng warlordismo.
Iligtas ang kaalyado’t manatili sa pwesto. Ito ang layon ng Martial Law.

‘Di na nagbanlaw ang umagang naliligo
Araw ay hinarap, Tigmak ng ngalit ang noo!
Sukbit ang tapang tumungo sa monumento.
Katarungan, Kapayapaan! Biguin ang Martial Law! #