Dalawampung panandang-bato sa bagong milenyo

Masaker sa Maguindanao (Nobyembre 23, 2009)

Masaker sa Ampatuan, Maguindanao: Huli lamang sa mahabang rekord ng culture of impunity sa panahon ng administrasyong Arroyo. (Nonoy Espina)

Walang katapat sa kasaysayan ng bansa — maging sa kasaysayan ng mundo — ang masaker sa Maguindanao noong Nobyembre 23, 2009.

Umabot sa 57 katao ang pinaslang ng pinaghihinalaang mga tauhan ni Datu Unsay Mayor Andal Ampatuan Jr. Ang mga pinaslang ay nasa konboy ng mga sasakyan patungong Shariff Aguak, Maguindanao para maghain ang asawa at mga kaanak ni Vice Mayor Toto Mangudadatu ng Buluan, Maguindanao ng certificate of candidacy para kalabanin si Ampatuan Jr. Sa pagkagobernador ng Maguindanao. Sa 57, umabot sa sa 31 ang mga mamamahayag na sumama para magkober sa makasaysayang kaganapang ito. Makasaysayan dahil mistulang kaharian ng mga Ampatuan ang Maguindanao (buong ARMM pa nga). Walang kumalaban sa mga Ampatuan sa pagkagobernador noong nakaraang mga halalan. At saka, mahigpit na tagasuporta ng administrasyong Arroyo ang mga Ampatuan.

Noong 2004, siniguro ng nakatatandang Gob. Andal Ampatuan Sr. ang pagwagi ni Arroyo sa Maguindanao. Noong 2007, tinawag niyang “Arroyo country” ang Maguindanao; walang nakuhang boto sa probinsiyang ito ang mga oposisyunistang kandidato sa pagkasenador. Sinasabing sa dalawang eleksiyong ito, ginamit ng mga Ampatuan ang poder para dayain ang halalan pabor sa mga Arroyo.

Tinaguriang “paglilitis ng bagong milenyo” ang mga pagdinig ngayon sa mga Ampatuan. Mananaig kaya ang presyur ng midya at mga mamamayan para mabigyang hustisya ang masaker? O mananaig ang pagkakaibigang Arroyo at Ampatuan (sa salita ng dating tagapagsalita ng Malakanyang na si Lorelei Fajardo)? Kung totoong tinulungan ng mga Ampatuan ang mga Arroyo na dayain ang nakaraang dalawang halalan, masasabing may alas sila laban sa rehimen, at malamang na gamitin nila ito para makalusot sa pananagutan sa kanilang mga krimen.

1 2 3 4 5 6 7 8 9 10 11 12 13 14 15 16 17 18 19 20

Short URL: http://pinoyweekly.org/new/?p=5590

Posted by Pinoy Weekly Staff on Jan 9 2010. Filed under Istorya ng Linggo, Lathalain. You can follow any responses to this entry through the RSS 2.0. You can leave a response or trackback to this entry