Kalupitan sa Kapamilya: Pang-aapi sa loob ng ABS-CBN?

Pinakakagyat na hiling ng mga manggagawa ang status quo sa trabaho. (Darius Galang)

Pinakatampok sa hinihiling nilang ilinaw ay ang katayuan nila sa empleyo. “Sinasabi nilang hindi nila kami empleyado ngunit sino ang pumipirma ng aming payslips?” tanong ni Perez. Sa kanilang pagtatrabaho, kontrolado ng ABS-CBN ang kanilang pay slips, income tax return, at iba pang pruweba ng empleyo.

Dagdag pa nila, wala sa listahan ng Securities and Exchange Commission ang “ABS-CBN IJN” kindi ang kompanyang ABS-CBN lamang.

Para kina Perez, malinaw na union busting ang lumalabas na kilos ng manedsment ng network. “Malinaw na may kutsabahan sa pagitan ng DOLE at ng manedsement ng ABS-CBN na harangin ang aming unyon para makilala bilang isang organisasyon at bargaing unit sa paggiit ng aming mga karapatan bilang mga manggagawa. Hindi kami kinilalang manggagawa ng kompanya para durugin ang aming unyon,” paliwanag ni Perez.

Iskemang kontraktuwalisasyon

Bukod sa pag-apela ng ABS-CBN manedsment sa DOLE na huwag kilalanin ng huli ang unyon, gumagamit din ang manedsment ng iba’t ibang estilo para mabago ang istatus ng empleyo sa kompanya. Sa ganitong paraan, mabawasan umano ang mga empleyadong maaaring sumapi sa unyon.

Hiling ng manedsment na pirmahan ng mga manggagawa ang isang kontrata na diumano’y magreregularisa sa kanila. Ngunit may ilan umanong hindi malinaw na bagay sa kontratang ito. Una na rito, magsisimula muli ang tenure ng isang manggagawa matapos mapirmahan ito. Ibig sabihin, mababalewala ang maraming taon nilang pagseserbisyo sa ABS-CBN.

Regular man ang turing ng manedsment sa isang manggagawa kapag pinirmahan nila ang kontrata, isa pang nakaambang panganib sa kaseguruhan sa trabaho ng manggagawa: gagawing co-terminus ang isang manggagawa sa isang programang pang-telebisyon.

Eugenio "Gabby" Lopez III, tagapangulo at CEO ng ABS-CBN

Lumalabas na kahit nasa tila magandang kompanya sila, hindi pa rin pala tiyak ang kanilang kaseguruhan sa trabaho. “Akala namin ay hindi namin daranasin ang pagiging kontraktuwal dahil nasa loob kami ng ABS-CBN,” malungkot na hayag ni Perez.

Sa nasabing pulong ng manedsment at mga manggagawa noong Hunyo 17, hindi itinanggi ni Lopez na malaki ang ikinikita ng kompanya. Ayon sa datos ng Securities and Exchange Commission, umabot sa P1.11 Bilyon ang gross revenue ng ABS-CBN sa unang kuwarto ng kasalukuyang taon. Tumaas ito ng 481 porsiyento mula sa P191-M na kita nito sa unang kuwarto ng 2009. Hindi pa kasama diyan ang revenues mula sa mga patalastas (kabilang ang political ads) sa panahon ng eleksiyon na aabot sa mahigit P4-B.

Ngunit hindi pa kuntento rito ang manedsment. Kung ikukumpara kasi sa mga telecommunications company (tulad ng PLDT, Globe at iba pa), maliit pa rin ito. “’Yun [telcos] ang mga kalaban natin talaga eh,” ani Lopez. “Because in five years, ABS will be a very different company from what it is today. And we need to prepare ourselves for that coming future.”

Sabi pa ni Lopez naghahanda ang ABS-CBN sa maraming pagbabago. Kabilang dito ang paglaganap ng digital TV, at mas malawak na paggamit at presensiya ng kompanya sa internet. “These are all new technologies for which we need new skills, which will require very significant amounts of capital expenditure. So we need every last cent.”

Kilalang lider sa industriya ang ABS-CBN, at maaaring maging bagong modelo ang malawakang kontraktuwalisasyon para gayahin ng iba pang TV networks sa kanilang mga manggagawa. Dahil sa kagustuhan ng manedsment na lalong magkamal ng kita, mas gugustuhin nilang tipirin ang suweldo at mga benepisyo ng mga manggagawa nito.

1 2 3

Short URL: http://pinoyweekly.org/new/?p=7941

Posted by Darius Galang on Jun 28 2010. Filed under Istorya ng Linggo, Lathalain. You can follow any responses to this entry through the RSS 2.0. You can leave a response or trackback to this entry