Para lalong ipresyur ang manedsment ng ABS-CBN na ibalik sa trabaho ang 114 na manggagawang ilegal na tinanggal sa trabaho, itinayo ng ABS-CBN Internal Job Market Workers Union (IJMWU) ang isang piketlayn sa harap ng gate ng higanteng TV network sa Sgt. Esguerra, Quezon City kung saan sila nagpalipas ng gabi kahapon, Oktubre 12.

Magsisilbi ang piketlayn bilang protest center para ipanawagan sa manedsment na dinggin ang desisyon ng Department of Labor and Employment (DoLE) noong Agosto 18 na kilalanin ang mga miyembro ng IJMWU bilang regular na manggagawa at magsagawa ng certification elections, ayon kay Alain Cadag, bise-presidente ng IJMWU.

Panawagan din nila ang kagyat na pagbabalik sa trabaho ng mga manggagawang tinanggal simula noong Hunyo 17.

“Ang pagtatayo ng piketlayn ang pinakamalaking protesta ng mga manggagawa ng ABS-CBN. Simula noong unang tanggalan, hindi pa dinidinig ng manedsment ang aming mga kahilingin at sa halip ay patuloy na nagtanggal ng mga manggagawa, karamiha’y mga opisyal at miyembro ng unyon,” ani Cadag.

Binatikos din ng lider-manggagawa ang kawalang-aksiyon ni Pang. Benigno Aquino III para itigil ang malawakang kontraktuwalisasyon at iba pang kontra-manggagawang polisiya na ipinapatupad ng malalaking kompanya gaya ng ABS-CBN.

Mula 10 taon pataas nang nagtatrabaho bilang mga cameramen, lighting crew, sound engineer at iba pa ang mga manggagawang tinanggal sa trabaho dahil sa pamumuwersa umano ng manedsment na papirmahin sila ng mga kontrata na nagbabalewala sa kanilang matagal na serbisyo. Basahin ang kaugnay na istorya

Sumama at sumuporta sa piketlayn ang mga manggagawa mula sa Kilusang Mayo Uno at Kowloon House, gayundin ang mga estudyante mula sa Anakbayan at Kabataan Party-list, at tagasuporta mula sa mga maralitang komunidad sa ilalim ng Bagong Alyansang Makabayan – National Capital Region.

Nagkaroon ng mga film showing, pagtatanghal, at diskusyon hinggil sa sitwasyon ng mga manggagawa at iba pang sektor.