Magsasaka pinatay ng mga sundalo sa Arakan, North Cotobato, dalawa ‘ilegal’ na inaresto
Hindi pa nga nalilibing ang kura paruko ng Arakan, North Cotabato na si Fr. Fausto Tentorio, isa na namang magsasaka ang pinaslang ng militar habang nagsasagawa ng operasyong kontra-insurhensiya sa lugar.
Hindi pa nga nalilibing ang kura paruko ng Arakan, North Cotabato na si Fr. Fausto Tentorio, isa na namang magsasaka ang pinaslang ng militar habang nagsasagawa ng operasyong kontra-insurhensiya sa lugar.
Pinagbabaril at napatay ang isang magsasaka at inaresto ang dalawang iba pa ng mga miyembro ng 57th Infantry Battalion ng Philippine Army sa Arakan noong Oktubre 22.
Nakilala ang napaslang na magsasaka na si Ramon Batoy, 35 anyos.
Sa ulat ng Karapatan-Southern Mindanao, noong Oktubre 20, puwersahang pinasok ng mga di-mabilang na miyembro ng Army ang bahay ng biktima at inaakusahan siyang miyembro ng New People’s Army.
Matapos tumangging magpaaresto si Batoy, kinulata siya ng baril ng isang sundalo. Ayon sa Karapatan, sa ninais niyang depensahan ang sarili at pamilya, kaya tinaga ng biktima ang isang sundalo.
Pinagbabaril siya ng tatlong sundalo. Pinagbabaril ng mga militar ang bahay ng biktima at pitong iba pang kabahayan, ayon sa grupong Karapatan.
Sinabi pa ng grupo na isang testigo ang nakakitang nilagyan ng baril ang bangkay ni Batoy at kinunan ng larawan.
Bukod sa biktimang si Batoy, inaresto si Noli Badol na isang lider magsasaka sa naturang lugar at si Celso Batoy na kapatid ng napaslang na magsasaka. Ayon pa sa grupo, binugbug ng mga sundalo ang dalawa at pinaputukan nang tatlong beses ang asawa ni Noli na si Evelyn na walong buwang buntis kasama ang mga dalawa niya anak.
Nakaligtas naman sa pamamaril ang mag-iina, ngunit nasugatan naman ang asawa at ina ni Roger Batoy na kapatid ni Ramon.
Sa pahayag naman ni Lieutentant Colonel Joven Gonzalez ng 57th IB sa midya matapos ang insidente, na isang lehitimong operasyong militar ang insidente. Diumano, nagsasagawa ng clearing operation ang mga militar nang magkaroon ng engkuwentro, sinabi pa ng opisyal na ang mga biktima kasama na ang dalawang inaresto ay kasapi ng NPA.
Pinabulaanan ito ng mga kaanak ng mga biktima at sinabing walang naganap na engkuwentro at iginiit na hindi mga NPA ang mga biktima.
Nagdulot ito ng takot sa mga residente na nagresulta sa paglikas ng 48 pamilya na pansamantalang nasa Binoongan Elementary School.