Editoryal FEATURED

Editoryal | Tama na, tapusin na


Huling State of the Nation Address na ng rehimeng Aquino. Nakatanaw na ang rehimen lampas 2016 para ipagpatuloy ang ‘tuwid na daan’ nito. Pero hindi ang sambayanan. ‘Tama na! Tapusin na!’ ang umaaligawngaw na panawagan ng sambayanang nagdurusa sa higit limang taon nang panunungkulan ni Pangulong Aquino.

max santiago
Dibuho ni Max Santiago para sa Bayan

Huling State of the Nation Address na ng rehimeng Aquino. Nakatanaw na ang rehimen lampas 2016 para ipagpatuloy ang ‘tuwid na daan’ nito.

Pero hindi ang sambayanan. ‘Tama na! Tapusin na!’ ang umaaligawngaw na panawagan ng sambayanang nagdurusa sa higit limang taon nang panunungkulan ni Pangulong Aquino.

At habang tumatakbo ang araw, lalo pang naglilitawan ang mga krimen nito sa bayan — anomalya, korupsiyon, paglabag sa karapatang pantao, kahirapan, kapabayaan, pandarambong, pagpapakatuta, malaganap na kontraktuwalisasyon at mababang sahod, pribatisasyon ng mga serbisyong panlipunan, mataas na presyo ng mga bilihin, paglala ng labor export policy. Kulang pa ang buong content ng Pinoy Weekly para mailahad ang lahat ng kasalanan nito.

Ito ang rason kung bakit umiigting ang panawagan ng iba’t ibang sektor ng lipunan na patalsikin si Aquino, sa halip na manahimik at maghintay na lamang sa nalalapit na eleksiyon.

Sa kapalpakan at kainutilan, si Aquino na mismo ang nagsisindi ng malawakang protesta sa SONA mula Luzon hanggang Mindanao. Siya na rin itong nagpapalaki ng bitak sa hanay ng mga naghaharing- uri, upang ang dating mga kapanalig tulad ni Binay ay lantaran nang sumuwag sa kanya.

Kaya anuman ang gawin ni Aquino, bubulwak at bubulwak ang mga protesta sa panahon ng SONA para idiin ang pagpapatalsik sa kanya.

Walang talab ang mga dinoktor na surveys at ratings. Maging ang panggigipit ng rehimen — tulad ng pagtatangka ng mga ahente at galamay ng militar kamakailan na takutin, sindakin, bantaan, arestuhin at patungan ng gawa-gawang kaso ang mga lider at kasapi ng mga progresibong organisasyon – ay hindi pipigil sa masa ng sambayanan para pababain si Aquino sa puwesto.

Gayunman, magsimula na ring mangamba ang sinumang nagnanais makoronahan ni Aquino na tumakbong pangulo sa eleksiyong 2016 at magdadala ng “tuwid na daan.”Aanihin at aanihin niya ang ang galit ng sambayanan sa rehimen at ang bigwas ng kampanyang talsik laban kay Aquino. Magigising na lamang ang kandidatong ito sa katotohanan na hindi korona ang hawak niya kundi bombang sasabog sa mukha niya.

At si Aquino? Anuman ang mangyari hindi siya makaliligtas sa sambayanang sumisigaw ng hustisya. ‘Manong maranasan naman niyang humawak sa malamig na bakal ng rehas sa kulungan.