Ikalawang araw ng kampuhan ng militanteng kabataan at iba pang sektor: Nagtipon ang mga manggagawa ng Kilusang Mayo Uno (KMU), kababaihan at iba pang sektor sa Espana Avenue, Manila para ituloy ang kampuhan sa Mendiola Bridge hanggang Disyembre 10. Ang kanilang hangad: pagbigay-liwanag sa publiko sa “bulok na sistemang” nagpapanatili sa yaman ng isang porsiyentong mayayaman at makapangyarihan habang mayorya — 99 porsiyento — ang naghihirap at pinagsasamantalahan.

Dumaan sa P. Noval Street ang mga nagprotesta patungong Bustillos para makarating ng Mendiola. Dito, muling hinarang sila ng pulis. Naggiit ang mga kabataan at manggagawa, itinulak ang pulis at nakarating hanggang kanto ng Legarda at Mendiola. Sandali pang naagaw ng ilang kabataan ang water cannon ng bombero para ipatikim sa mga pulis ang madalas nilang ginagawa sa mga aktibista: Saglit na nadispers ang pulis ng sarili nilang water cannon.

Pero naagaw din ito muli ng pulis. Sa bungad ng Mendiola, pinagpapalo ang mga kabataan at manggagawa; itinulak sila ng shield at binombahan ng tubig ng bombero. Nahati ang bulto ng mga nagpoprotesta: May ilang nakasiksik sa iskinitang lakaran patungong LRT Station. Doon sila tinugis ng pulis, pinagpapalo, itinulak ng shield. Marami ang sugatan. Pagkalampas ng LRT Station, kinahon sila at sinigawang umupo, pero nanindigan ang mga kabataan.

Muli silang tinulak hanggang sa paanan ng flyover patungong Nagtahan. Ulat ng mga lider-kabataan doon, di-bababa sa 46 ang sugatan at dinala sa ospital. Lima naman ang hinuli.

Sa pagkober ng Pinoy Weekly ng mga marahas na dispersal noong panahon ni Gloria Macapagal-Arroyo, hindi pa inabot lampas ng Legarda ang mga dispersal. Kahit noong panahon ng Calibrated Preemptive Response (CPR) ni Arroyo. Ngayon lang. Ngayong panahon ni Benigno Simeon Aquino III. (Ulat ni Kenneth Roland A. Guda)

Panoorin ang bidyo ng Mayday Productions.

Mga larawan ng dispersal:

Nagtipon ang mga manggagawa ng Kilusang Mayo Uno (KMU) sa Espana Avenue, Manila para makiisa sa kampuhan ng mga kabataan. Layon nilang makarating ng Mendiola Bridge para doon magkampo. (KR Guda)

Nagtagpo ang bulto ng mga kabataan at manggagawa, sa Espana Avenue, bago tumulak ng Bustillos. (KR Guda)

Hinarang na ng pulis, sa Bustillos pa lamang, ang mga nagrarali. (KR Guda)

Naggiit ang mga manggagawa at kabataan, at nagawang mabutas ang hanay ng mga pulis. (KR Guda)

Shield na ang pinanghahampas ng pulis sa mga naggigiit na demonstrador. (KR Guda)

Nagawa ng isang demonstrador na agawin ang hose ng bombero. (KR Guda)

Itinutok nila sa mismong mga bombero at pulis ang hose. Di rin nagtagal nang maagaw muli ng mga pulis ang hose. (KR Guda)

Nakarating ang ilan sa paanan ng Mendiola pero agad naman silang itinulak at pinagpapalo ng mga pulis. May ilang demonstrador na nakahawak ng kahoy para panangga at pamalo, pero karamihan ay walang-labang itinulak at pinagpapalo. (KR Guda)

Binomba ng tubig ng pulis ang mga nagrali. Nanindigan at di nagpatinag ang ilan. (KR Guda)

Habang balisa ang mga demonstrador sa pambabasa ng bombero, nagsimula ang pamamalo ng mga pulis. (KR Guda)

Nasugatan at nasaktan ang ilang kabataan. (KR Guda)

Kahit nasaktan na, patuloy na itinaboy at pinagpapalo ng mga pulis ang mga demonstrador. (KR Guda)

Inagaw ng isang demonstrador ang truncheon na pinampupukpok sana ng isang pulis. (KR Guda)

Agawan ng truncheon. (KR Guda)

Naipit ang isang kabataang aktibista, at pinagpapalo siya ng mga pulis. (KR Guda)

Buti na lamang, naagaw siya ng isang kasamahan. (KR Guda)

Umiyak sa galit ang ilang kabataang aktibista. (KR Guda)

Patuloy ang pagtutulak ng mga pulis sa Legarda. (KR Guda)

Pinagduduro ang isang pulis ng isang nanggagaliting aktibista sa pandarahas ng nauna. (KR Guda)

Hanggang sa paanan ng flyover sa dulo ng Legarda ang mga pulis. (KR Guda)

Kampuhan sa Mendiola ang pinlano ng mga kabataan, kasama ang iba pang sektor, mula Dis. 6 hanggang 10. Gusto nilang sabayan ang penomenon ng kilusang protesta ng “Occupy” sa US at iba pang bahagi ng mundo para bigyang-liwanag sa publiko ang “bulok na sistema” na pinangingibabawan ng isang porsiyentong mayayaman at makapangyarihan at 99 porsiyentong naghihirap.

Habang nakakampo sa Mendiola, plano nilang maglunsad ng mga pangkulturang presentasyon, porum, diskusyon, workshops, at iba pang gawain na may ugnay sa pagpapalalim ng kanilang kaalaman sa kasalukuyang krisis sa ekonomiya at pandaigdigang krisis.

Pero pinakatan ng bata-batalyong pulis ang martsa nila. Tinangkang idispers ang mga nagprotesta at hinarang sa Recto Avenue. Napilitan silang magkampo muna sa Plaza Miranda, Manila para magpalipas ng gabi.

“Pinakikita lamang nito na desperado na ang gobyernong pigilin ang galit ng sanlaksang mamamayang lumalaban para sa tunay na pagbabago, para sa isang makatarungang lipunang nagsisilbi sa nakararami,” sabi ni Vencer Crisostomo, tagapangulo ng Anakbayan at tagatipon ng Kilos Na, isang multisektoral na alyansa kontra budget cut sa edukasyon at iba pang serbisyong panlipunan.

Sinabi pa ni Crisostomo na tatangkain nilang muling magkampo sa Mendiola sa susunod na mga araw. Sinabi ng mga manggagawa ng Kilusang Mayo Uno (KMU) at iba pang organisasyon na makikiisa sila sa kampuhan ngayong Disyembre 7.

Nagtipon ang mga kabataan at iba pang sektor sa Espana, Manila noong Disyembre 6 para magmartsa patungong Mendiola. Sa Mendiola, plano nilang magkampo hanggang Disyembre 10. Dala nila ang temang "sawang sawa na" ang mga mamamayan sa sistemang umiiral kung saan isang porsiyento umano ng populasyon ang nagpapakasasa sa yaman habang 99 porsiyento ang naghihirap. (Darius Galang)

Parol ang bitbit ng mga guro na lumahok sa martsa. (Darius Galang)

Nagdala ng tent ang mga kabataan; handa silang magkampo sa Mendiola. (Darius Galang)

Nilalabanan umano nila ang kaltas-badyet sa serbisyong panlipunan, gayundin ang lumalalang krisis sa ekonomiya at ang matinding kahirapan sa bansa. (Darius Galang)

Sa Morayta Avenue pa lamang, hinarang na ng mga pulis ang martsa. (Darius Galang)

Naggiit ang mga kabataan na makatuloy sa Mendiola. (Darius Galang)

Taas-kamao sa kabila ng banta ng pandarahas. (Darius Galang)

Taas-kamao sa kabila ng bata ng pandarahas. (Marlon Nombrado / UJP-UP Diliman)

Dahil di matinag ang kanilang hanay, ginamitan ng mga pulis ang mga nagpoprotestang kabataan ng tubig mula sa fire truck. (Neil Vincent Monsalud)

Ginamitan pa ng mga pulis ng truncheon na pamalo ang mga nanindigang kabataan. (Tudla Productions)

Hindi nagpatinag ang mga kabataan, kahit matapos basain ng tubig mula sa water cannon ng mga bombero. (KR Guda)

Nagbigay ng alas-5:30 ng hapon na taning ang mga pulis bago nila muling bombahin ng tubig ang mga nagpoprotesta. (KR Guda)

Ginabi na ang mga kabataan, pero nanatili sila sa Recto Avenue. Alas-6:30 ng gabi, tumulak sila ng Plaza Miranda para doon muna magkampo. Nangako silang babalik para muling tangkaing makapagkampo sa Mendiola. (KR Guda)

Bidyo ng paggamit ng water cannon ng pulis, mula kay Fred Dabu, kontribyutor ng Pinoy Weekly:

Matapang na nagsagawa ng lightning rally ang mahigit 50 kabataang miyembro ng Anakbayan, League of Filipino Students (LFS) at iba pang militanteng grupo ng kabataan sa harap ng National Museum noong Nob. 16 ng hapon. Ang kanilang target: konboy ng mga sasakyang nagdala kay US State Secretary Hillary Rodham Clinton, na galing sa isang porum.

Sa naturang porum, naghayag din ng protesta ang isa sa odyens, si Marjohara Tucay, punong patnugot ng Philippine Collegian sa Unibersidad ng Pilipinas-Diliman.

Binatikos ng mga militante ang Visiting Forces Agreement, na ginagamit umano ng gobyerno ng US na dahilan para permanenteng magpanatili ng kanilang armadong puwersa sa bansa. Kinondena rin nila ang RP-US Mutual Defense Treaty. Ika-60 anibersaryo noong araw na iyon ng MDT, at siyang ipinunta ni Clinton sa Pilipinas.

“Ekstensiyon lamang ito (MDT) ng pangingibabaw ng (goberynong) US sa ating bansa at sa mga interes nito sa mga karatig nating bansa,” saad ni Aki Merced, tagapagsalita ng LFS.

Nagbalik-tanaw si Merced sa naging tindig ng US at ng MDT noong kasagsagan ng sigalot para sa Spratlys. (Ulat ni Darius R. Galang)

Alas-2:30 ng hapon, sa labas ng National Museum, nagtipon na ang mga militanteng kabataan para hintayin ang pagdaan ng konboy ni Clinton. (Danny Pata)

Sa Ayala Bridge, nagawa ng nagprotestang mga kabataan na harangan ang mismong konboy ni Clinton, kaya napilitan itong tumalikod at bumalik sa dinaanan. (Danny Pata)

Agad na marahas silang dinispers ng mga pulis. (Danny Pata)

Watawat ng US na naglalaman ng pagkondena nila sa RP-US Mutual Defense Treaty ang niladlad ng nagprotestang kabataan. (Danny Pata)

Tinangka ng mga pulis na agawin ang dalang watawat ng mga demonstrador. (Danny Pata)

Patuloy na naggiit ang kabataan sa kabila ng pagharang ng pulis. (Danny Pata)

Paggiit ng kabataan sa harap ng mga pulis. (Danny Pata)

Nakipaggitgitan ang mga militanteng kabataan, sa pangunguna ni Vencer Crisostomo ng Anakbayan (naka-asul na polo shirt), sa mga pulis. (Danny Pata)

Isa sa mga sasakyan ng konboy ni Clinton na nabato ng paint bomb. (Danny Pata)

Pinigilan ng mga seguridad ni Clinton na kuhanan ng midya ang naturang opisyal ng gobyerno ng US. (Danny Pata)

Martsa patungong Mendiola, Manila. (KR Guda)

Aabot sa 10,000 estudyante, guro, kawani at administrator mula sa state universities and colleges (SUCs) ang lumahok sa pambansang welga kontra sa pagkakait diumano ng gobyernong Aquino ng sapat na badyet para sa pangkolehiyong edukasyon.

Ayon kay Florencio Abad, sekretaryo sa Department of Budget and Management ng administrasyong Aquino, hindi naman binawasan ang badyet ng SUCs kundi dinagdagan pa nga. Ngunit iginiit ng mga grupong pangkabataan na kulang na kulang pa rin ito sa hinihinging P45.8-Bilyon na kailangan ng SUCs para maipagpatuloy ang kahit papano’y abot-kayang edukasyong pangkolehiyo.

Sinabi ni Vencer Crisostomo, pangkalahatang kalihim ng Kabataan Party-list, na ipagpapatuloy nila ang paghimok sa mga estudyante, guro, kawani at administrador, para sumuporta sa kampanya.

Maikling bidyo ng isinagawang interfaith rally ng mga grupong pangsimbahan at militanteng mga organisasyon para ipanawagan ang libreng pamamahagi ng lupa ng Hacienda Luisita sa Tarlac sa mga manggagawang bukid na legal na may-ari ng lupain ng asyenda.

Sinabi ni Lito Bais, tumatayong pangulo ng United Luisita Workers’ Union (ULWU), na sinikap nilang kunin ang suporta ng mga obispong Katoliko at taong-simbahan para sa kanilang laban. Hinihiling umano nila kay Pangulong Aquino na tugunan ang kanilang makatarungang hiling para sa lupa.

Ayon din kay Bais, kasalukuyang muling binubungkal ng mga residente ng asyenda ang nakatiwangwang na mga lupain ng Luisita para mapagtamnan at makatugon sa kanilang mga pangangailangan. Bagamat hinaharas at pinipigilan ng mga militar at guwardiya, pilit umano nilang iginigiit ang karapatang magbungkal. (Basahin dito ang artikulo hinggil sa bungkalan)

Nagbigay-suporta rin ang militanteng mga organisasyon tulad ng Kilusang Mayo Uno, Gabriela, Anakbayan, at iba pang grupo sa ilalim ng Bagong Alyansang Makabayan (Bayan). Nanawagan silang suportahan ng publiko ang laban ng mga manggagawang bukid para sa tunay na reporma sa lupa, at ipresyur si Aquino para tugunan ito, lalupa’t magaganap na ang kanyang State of the Nation Address o SONA sa Lunes, Hulyo 25.

Si Manila Mayor Alfredo Lim (kaliwa), binabati si Osang Beltran, biyuda ng yumaong lider-obrero na si Crispin "Ka Bel" Beltran, sa harapan ng marker ni Ka Bel sa Plaza Miranda, Quiapo, Manila. (Macky Macaspac)

Protesta para sa makabuluhang dagdag-sahod ang pangunahing pamamaraan ng paggunita ng mga kaanak, manggagawa at iba’t ibang sektor sa ikatlong taon ng pagkamatay ng dakilang lider-manggagawa na si Crispin “Ka Bel” Beltran noong Mayo 20.

“Sa puso at isipan ng mga manggagawa at sambayanang Pilipino na nakikibaka para sa makabuluhang dagdag-sahod, sa karapatan ng mga manggagawa at tunay na panlipunang pagbabago, nananatiling buhay si Ka Bel,” pahayag ng Kilusang Mayo Uno (KMU).

Mahigit 400 katao ang nagmartsa mula sa kanto ng Recto Avenue at Quezon Boulevard patungong Mendiola Bridge para ipagpatuloy ang panawagan para sa P125 dagdag-sahod para sa mga manggagawa sa pampublikong sektor at P6,000 dagdag-suweldo para sa mga kawani ng gobyerno.

Kinondena rin ng KMU ang Malakanyang sa pag-apruba sa P22 dagdag sa cost of living allowance (COLA) na ayon sa KMU ay labis na kakarampot at walang masyadong maitutulong sa kabila ng walang-tigil na pagtaas ng presyo ng batayang mga bilihin.

“Sa pag-apruba sa P22 COLA…hindi lamang ipinagpapatuloy ni Noynoy (Aquino) ang polisiya ng mga nauna sa kanya na pagpigil sa sahod ng mga manggagawa, ipinagpapatuloy niya ang mga polisiyang neoliberal sa ekonomiya,” paliwanag ni Roger Soluta, pangkalahatang kalihim ng KMU.

Pinagbabato ng mga manggagawa ang gate ng Mendiola ng itim at pulang pintura, at sinunog ang isang effigy na sumisimbolo sa regional wage boards na sinasangkalan ng mga nakaraan at kasalukuyang administrasyon para baratin ang sahod ng mga manggagawa.

“Ang batayang neoliberal na ideya ay hayaang magkamal ng papalaking tubo ang malalaking kapitalista sa pamamagitan ng pagbarat sa sahod ng mga manggagawa at pagmantine sa napakababang antas ng sahod,” paliwanag ni Soluta.

Sa galit ng mga manggagawa sa "kakarampot" na P22 COLA na binigay ng administrasyong Aquino, pinagbabato nila ang Mendiola Peace Arch. (Macky Macaspac)

Sinabi pa ng lider-obrero na malinaw na nasa balangkas ng neoliberal na polisiya ang P22 COLA.

Sa kanyang talumpati sa Mendiola, sinabi naman ni Roy Velez, pangkalahatang kalihim ng KMU sa National Capitol Region, na pagpupugay sa alaala ng dakilang lider-obrero na si Beltran ang patuloy na paglaban para sa karapatan ng mga manggagawa.

Pinangunahain ni Beltran ang pagpanukala ng P125 across-the-board wage increase sa ika-11 Kongreso noong 1998. Nang mahalal siya sa Kamara bilang kinatawan ng mga partidong Bayan Muna noong 2001 at Anakpawis noong 2004, muli niyang ipinanukala sa mga sumunod na pagbubukas ng Kongreso hanggang sa kanyang kamatayan noong 2008.

Nanguna rin si Beltran sa di-mabilang na mga pakikibaka ng mga manggagawa at mga mamamayan para sa iba’t ibang isyu.

“Inspirasyon si Ka Bel sa ating lahat, kaya hindi siya mamamatay sa ating puso at isipan. Ipinakita niya kung ano ang tunay na lider at lingkod bayan ng mga manggagawa at sambayanan, lagi natin siyang pagpugayan at sikaping matuto sa kanya,” ani Soluta.

Idinagdag pa ni Soluta na inilantad ng pagkamatay ni Beltran ang pagkakaiba niya sa dating pangulong Gloria Macapagal-Arroyo. “Tapat si Ka Bel, si Gloria sobrang korap,” aniya.

Sa kanyang mensahe sa Plaza Miranda, binigyan ng pagpupugay ni Mayor Alfredo ang yumaong lider manggagawa. Binalikan ng Mayor ang pangyayari sa araw ng pagkamatay ni Beltran, na nahulog mula sa bubong ng kanyang kinukumpuning lumang bahay. Ayon kay Lim, ang pangyayari ay nagpapatunay na hindi nagsamantala sa bayan ang lider-manggagawa.

“Si Ka Bel lamang ang lider-manggagawa na hinangaan ko,” pahayag ni Lim.

“Magiliw at isang prinsipyadong champion si Ka Bel sa pagsusulong nang karapatan at kagalingan ng mga manggagawa. Naniniwala ako na tungkulin namin sa Kongreso ang ipagpatuloy ang kanyang adhikain at gawin ang nararapat para sa kagyat na pagpasa ng P125 across the board wage increase,” sinabi naman ni Kabataan Party-list Rep. Raymond Palatino.

Bago ang kilos-protesta, nagsagawa ng programa sa Plaza Miranda ang mga kaanak at kamanggagawa. Nag-alay ng mga bulaklak sa harapan ng marker  ni Beltran ang KMU, Promotion of Church People’s Response o PCPR at si Lim,  bilang pagpupugay sa dakilang buhay at pakikibaka ng yumaong lider-manggagawa.

Habang lumilipas ang mga araw, lalong lumilinaw sa mga magsasaka ng Hacienda Luisita ang panloloko ng pamilya Cojuangco-Aquino sa pagpapapirma sa kanila ng compromise agreement. Nangako silang tuloy ang laban para sa lupa.

Isang bidyo-ulat ng Pinoy Weekly at Mayday Multimedia Collective