Pinoy Weekly » Gabriela

Pandaigdigang alyansa ng kababaihan itinatag sa Montreal, Canada

Kontribusyon — Wed, 01 Sep 2010 10:31:28 +0000

Ilan sa kababaihang lumahok sa Montreal International Women's Conference kung saan itinatag ang International Women's Alliance. (Kontribusyon)

Isang pandaigdigang alyansa ng kababaihan ang itinatag ng mahigit 350 indibidwal mula sa 32 bansa, bilang pagtatapos ng Montreal International Women’s Conference sa Montreal, Canada noong Agosto 16 (Agosto 17 sa Pilipinas).

Tinaguriang International Women’s Alliance (IWA), binuo umano ang alyansa para tipunin ang pinakamalaking bilang ng kababaihan ng mundo para itaguyod ang isang pandaigdigang militanteng kilusang kababaihan, ayon sa mga organisador ng kumperensiya.

Kabilang sa mga bansang may delegado sa kumperensiya ang Pakistan, India, Kyrgyzstan, Mali, Czech Republic, the Netherlands, Germany, Cuba, Guatemala, Ecuador, Mexico, US, Canada, at Pilipinas.

Binuo umano ang alyansa para “paunlarin ang paglikha at pagkokoordina ng mga lokal, rehiyunal at pandaigdigang kampanya, para itaguyod ang suporta sa isa’t isa at pagbabahagi ng mga estratehiya sa pagtutol, at mobilisahin ang kababaihan sa buong mundo sa pakikibaka laban sa imperyalismo, karahasan at kapitalistang globalisasyon,” pahayag ng naturang alyansa.

Sa naturang komperensiya nabuo ang batayan ng pagkakaisa ng IWA, at nagkaisa sa maraming resolusyon at deklarasyon.

Si Liza Maza ng Gabriela, isa sa mga susing tagapagsalita sa kumperensiya. (Kontribusyon)

Kabilang sa mga kagyat na isyung pinagkaisahan ang pagsuporta sa 490 Tamil refugee mula sa Sri Lanka na dumating sa Vancouver, Canada, sakay ng MV Sun Sea at pagbatikos sa pagkulong ng gobyerno ng Canada sa kanila.

Naging resolusyon din ang pagsuporta sa kababaihan ng Palestine, gayundin ang pagsuporta sa tungkulin ng kababaihan bilang tagapagtanggol ng Pachamama (Mother Earth).

“Dagdag pa, pinatotoo din ng mga participant ang pakikipagkaisa nila sa katutubong komunidad ng Algonquin ng Barrière Lake, Québec, habang nanawagan din para sa pagpapalaaya sa 43 mangagagawang pangkalusugan na ilegal na kinulong sa Pilpinas,” pahayag pa ng mga organisador ng kumprerensiya.

Sinabi rin nila na inaasahang makapaglunsad ang IWA ng unang pangkalahatang asembleya sa loob ng isang taon matapos ang kumperensiya sa Montreal.

Isinagawa mula Agosto 13 hanggang 16 sa Montreal, Canada, inisponsor ng Committee of Women of Diverse Origins ang kauna-unahang Montreal International Women’s Conference na may temang “Building a Global Militant Women’s Movement in the 21st Century.”

Kasama sa tapaglunsad ng kumperensiya ang mga organisasyong Gabriela Philippines, Asian Rural Women’s Network at Action Network for Marriage Migrants Rights and Empowerment (Amorre).

Diborsiyong ala-Pinoy

Macky Macaspac — Sun, 22 Aug 2010 17:55:24 +0000

Lalong pagtindi ng karahasan sa kababaihan, laluna sa konteksto ng mag-asawa, ang isa sa mga nagtulak sa Gabriela para muling pinanukala ang batas sa diborsiyo sa Pilipinas. (Macky Macaspac)

Hindi lingid sa karamihan ng kababaihan ang sinapit nina Nida, Vienna at Arleen sa kani-kanilang mga relasyon.

Sekretarya ng isang kongresista, nakatira si Nida sa isang maralitang komunidad sa Quezon City. Sa matagal na panahon, biktima siya ng pang-aabuso ng kanyang pangalawang asawa. Noong Hunyo 2007, natagpuan ang bangkay ni Nida, nakasabit sa kisame at mukhang nagpakamatay. Ngunit sa kuwento ng kanyang anak, hindi nagpakamatay si Nida. Nakita umano ng bata kung paano bugbugin ng kanyang ama-amahan ang kanyang ina at ibigti upang palabasing nagpakamatay si Nida.

Guro naman sa isang pamantasan sa Pangasinan ang 40-anyos na si Vienna de Leon. Sampung taong nagsama sila ng asawa bago naghiwalaya. “Bago kami nagkahiwalay napansin ko unti-unti ang pagbabago di lang sa kilos, aktitud kundi sa pagtupad niya ng kanyang obligasyon sa aming mag-ina. Dumalang ang pag-uwi, lumiliit ang sahod na ibinibigay at lumalamig ang pakikitungo niya,” patungkol ni Vienna sa kanyang asawa.

Naghiwalay silang mag-asawa nang piliing sumama ng kanyang mister ang ibang babae.

Isang development worker naman si Arleen Alonzo, 53-anyos. “Nagkaroon ng relasyon sa ibang babae ang aking asawa. Mga dalawang taon akong umasa na magbabago siya pero pagkaraan ng dalawang taon, hindi na ako umasa na magkakabalikan pa kami,” ani Arleen. Nagtanung-tanong siya kung paano ang proseso ng annulment ngunit napag-alamang napakamahal nito.

“Hanggang ngayon, kasal pa rin ako, bagamat magkahiwalay ang tirahan at may kanya-kanya na kaming buhay,” dagdag pa niya.

Reyalidad sa maraming mag-aasawa ang paghihiwalay, may diborsiyo man o wala sa bansa. Masasabing natural na nagaganap na ito, anumang kultura, relihiyon o bansa matatagpuan ang relasyon. Katunayan, halos lahat ng mga gobyerno sa mundo ay may batas hinggil sa diborsiyo.

Ang wala na lamang batas sa diborsiyo: ang mga bansang Malta at Pilipinas.

Uminit na panukala

Sa ngayon, mainit ang baliktaktakan hinggil sa muling pagpanukala ng Gabriela Women’s Party, sa House Bill 1799 o ang batas sa diborsiyo.

Ito ang ikatlong pagkakataon na ipanukala ng Gabriela ang naturang batas: sa ika-13 Kongreso noong 2004, ipinanukala na ni dating Rep. Liza Maza ang HB 3461. Noong 2007, sa ika-14 Kongreso, muling inihain ni Maza ang panukala, pero di man lang nasalang sa anumang committee hearing.

Sa pagbubukas ng ika-15 Kongreso, naging usapin muli ang naturang panukala. Pero kasasalang pa lang, kabi-kabila na ang inabot na batikos ng kababaihang kongresista na nagpanukala ng batas. Maging si Pang. Benigno S. Aquino III, binatikos ang panukala at ikinumpara sa nagaganap sa Las Vegas, Nevada kung saan madalian ang proseso ng pagdidiborsiyo. Lumalabas na hindi pa niya nabasa ang panukalang batas ng Gabriela. (Basahin ang artikulo hinggil sa kasaysayan ng diborsiyo sa Pilipinas.)

Samantala, mariing tutol ang simbahang Katoliko sa HB 1799. Ang diborsiyo daw ng mag-asawa ang siyang sisira sa pundasyon ng pamilya at ng lipunan. Isinasangkalan ng Katolikong mga obispo na sagrado ang kasal, at bahagi ng mga sakramento ng simbahan na kailangang igalang ng mga Katoliko. Ang pagpapaliwanag nila sa usaping diborsiyo ay nagmumula sa mga doktrina ng simbahan.

Ngunit sinasabi ng Gabriela at iba pang tagasuporta ng panukala na hindi dapat doktrina ng relihiyon kundi reyalidad ang dapat na maging batayan ng pagkakaroon ng diborsiyo sa bansa.

Tulad ng karanasan nina Nida, Vienna at Arleen, at iba pang babae, hindi basta-basta makawala ang maraming kababaihan sa isang mapang-abusong sitwasyon dahil hindi puwede ang diborsiyo. Ayon sa Gabriela, nagagamit ng marami sa kababaihan ang batas sa diborsiyo bilang sandata laban sa pang-aabuso, pisikal man o emosyonal.

Ipinaliwanag naman ni Gabriela Rep. Luzviminda Ilagan na pinag-aralan nila ang pagbubuo ng HB 1799 para di ito magamit ng mga mag-asawang maghihiwalay sa mababaw na dahilan. Hindi umano pumapayag ang batas na ito sa diborsiyong walang batayan, tulad sa batas na ipinapatupad sa Las Vegas.

“Ang batas na ito ay maingat na binuo upang magkaroon ng konsiderasyon ang paniniwala at tradisyong Pilipino, na nagbibigay ng mataas na pagkilala sa pamilya bilang isang institusiyon,” paliwanag ni Ilagan. Dagdag pa ng kongresista na hindi papayagan sa batas ang mga mag-asawa na magpakasal ngayon at bukas ay magdidiborsiyo.

“Ang HB 1799 ay divorce, Pinoy-style,” ani Ilagan.

Pagpapalaya sa kapapanganak na inang isa sa Morong 43, iginiit ng Gabriela

Macky Macaspac — Thu, 05 Aug 2010 11:49:59 +0000

Prominenteng nakasabit ang streamer na "Free the 43 Health Workers" sa harapan ng Philippine Genreal Hospital, kasama ang larawan ni Judilyn Oliveros at ang kanyang anak na lalaki na kasalukuyang nagpapagamot sa nasabing ospital. (Macky Macaspac)

Nagpiket ang Gabriela, militanteng alyansang pangkababaihan, sa harapan ng Philippine General Hospital (PGH) kamakailan upang igiit ang kagyat na pagpapalaya sa batayang humanitarian kay Judilyn Oliveros, isa sa 43 health workers na ilegal umanong inaresto sa Morong, Rizal noong Pebrero.

Kasalukuyang nasa PGH si Oliveros matapos itong manganak noong Hulyo 22 sa pamamagitan ng ceasarian section.

Sa harap ng Philippine General Hospital, malinaw ang panawagan ng Gabriela at Salinlahi: kagyat na palayain ang mag-inang sina Judilyn at baby boy Oliveros. (Macky Macaspac)

Kinondena din ng Gabriela ang kautusan ng korte na muling ibalik sa Camp Bagong Diwa sa Bicutan si Judilyn. Ayon kay Lana Linaban, pangkalahatang kalihim ng Gabriela, nakakagalit ang pagpupumilit ng korte na muling ibalik sa kulungan si Oliveros matapos ang kanyang panganganak. “Malinaw na ang kautusan ay hindi man lang nagbigay ng konsiderasyon sa malaking epektong idudulot nito sa mag-ina,”aniya.

Kaugnay ng nakaambang pagbalik sa bilangguan ni Judilyn, nagsampa ang mga abogado ng Morong 43 ng motion for release on recognizance for humanitarian grounds sa korte na nakatakdang dinggin sa Agosto 6, 2010.

Nakasaad sa motion ang pangangailangan ng pagpapasuso ng ina upang matiyak ang normal na paglaki at pag-unlad ng bata batay sa rekomendasyon ng pediatrician na si Dr. Lorna Ramos-Abad. Ayon sa motion, “Upang matiyak ang tuluy-tuloy na produksiyon ng gatas ng ina, kailangang madalas na mapasuso ang bata sa kanyang ina. Mahalaga din na ang ina ay malaya sa anumang stress at mailagay sa kumportableng lugar.”

Ngunit sa mga publikong pahayag ng mga awtoridad ng Camp Bagong Diwa, kanilang ipapatupad ang planong paghiwalayin ang mag-ina sa kadahilanang walang sapat na pasilidad ang bilangguan para sa mga katulad na kaso ni Judilyn.

Suporta mula sa mga kabaro:Pinangunahan ng mga nanay mula sa mga komunidad ng Gabriela ang panawagan na kagyat na palayain ang kanilang kapwa inang si Judilyn Oliveros na nagsilang ng isang sanggol na lalaki. Si Judilyn ay kasama sa tinaguriang Morong 43, na ilegal na inaresto noong Pebrero 6, 2010 sa Morong, Rizal. (Macky Macaspac)

Lumahok sa pagkilos ang mga organisasyong pambata tulad ng SALINLAHI, Children’s Rehabilitation Center at Parents Alternative on Early Childhood Care and Development, na nagpaalala na sa gobyerno na isa ito sa mga lumagda sa United Nations Convention for the Right of the Child.

Nakasaad sa naturang kumbensiyon na pangunahing tungkulin ng bawat estado na pangalagaan ang kagalingan at karapatan ng bawat bata. Ayon kay Eilek Manano, social worker ng CRC, “Malinaw na ang kautusan ng korte ay paglabag sa batayang karapatan ni baby boy Oliveros na makapiling ang magulang at mabuhay nang normal.”

Iginiit din ng Gabriela na ang patuloy na pagkakabilanggo ng Morong 43 ay isa nang kahiya-hiyang manipestasyon ng kalupitan ng estado at ang pagkait sa isang ina ng kanyang karapatang alagaan ang bagong silang na sanggol ay isang malagim na porma ng tortyur.

Mga Larawan: Rampa’t protesta sa Batasan Pambansa

Boy Bagwis — Mon, 26 Jul 2010 11:31:15 +0000

Isa sa pinakaunang rumampa papasok ng Session Hall ng Batasan Pambansa si Jose "Peping" Cojuangco Jr., tiyuhin ni Pang. Noynoy Aquino at tinaguriang bahagi ng "Kamag-anak Inc." noong panahon ng yumaong pangulong Cory Aquino. (Boy Bagwis)

Dumating din ang bagong kongresista ng Sarangani, si Rep. Manny Pacquiao. (Boy Bagwis)

Rumampa rin ang sanay na sa rampa: si Rep. Lucy Torres-Gomez at ang kanyang chief-of-staff at asawa, si Richard Gomez. (Boy Bagwis)

Rumampa rin papasok ng Session Hall ang militanteng mga kongresista, kabilang si ACT Teachers Rep. Antonio Tinio, na nagkabit ng panawagang dagdag-sahod sa mga manggagawa sa kanyang barong. (Boy Bagwis)

Kapayapaan sa Mindanao at pagbasura sa Visiting Forces Agreement ang mensahe ng pamaypay ni Gabriela Rep. Luzviminda Ilagan. (Boy Bagwis)

"Tunay na kalagayan ng bayan" ang pahiwatig ng damit ni Gabriela Rep. Emmi de Jesus, na pininta pa sa kamay ang disenyo. Pagtigil naman sa pampulitikang pamamaslang ang mensahe ni Bayan Muna Rep. Teddy Casino. (Boy Bagwis)

May dalang salakot si Anakpawis Rep. Rafael Mariano na nananawagan ng tunay na repormang agraryo. (Boy Bagwis)

Nangako si Pang. Aquino na may "pasabog" siyang ipapahayag sa kanyang unang State of the Nation Address, ngunit para sa mga militante, kulang at pagpapatuloy lamang ng neoliberal na mga polisiya ang laman ng talumpati ng bagong pangulo. (Boy Bagwis)

Kailan sila magkakaroon ng disenteng pabahay?

Macky Macaspac — Sat, 24 Jul 2010 09:10:25 +0000

Nagpiket ang kababaihan ng Gabriela sa tanggapan ng National Housing Authority sa Quezon City para ihapag ang hamon ng maralitang kababaihan kay Bise Pres. at HUDCC Chair Jejomar Binay. (Macky Macaspac)

Nakatira sa Sitio Manunggal sa Tatalon, Quezon City si Rebecca Patigdas, 40-anyos, nang rumagasa sa bansa ang bagyong Ondoy noong Setyembre 2009.

Isa ang Tatalon sa pinakamatinding binaha sa lungsod; lubog ang mayorya ng kabahayan ng maralitang komunidad na ito, kabilang na siyempre ang bahay nina Rebecca. Tulad ng daan-daang residente, napilitang siyang lumikas sa malapit na eskuwelahang ginawang evacuation center.

Limang araw matapos ang bagyo, dumating si Pang. Arroyo sa Tatalon at nanguha ng mga biktima. Patitirahin daw niya sa Malakanyang (Basahin ang artikulo hinggil dito). Nangako rin na bibigyan sila ng pabahay. Matapos patuluyin at pakainin ng ilang araw sa Malakanyang, inilipat sila sa relokasyon sa Towerville, San Jose del Monte, Bulacan.

Imbes na mapabuti, napasama lang ang kalagayan nila sa relocation center. “Hindi namin matiis ang hirap na kalagayan namin sa relokasyon, kaya bumalik kami sa Tatalon,” kuwento ni Rebecca.

May sukat na 32 metro-kuwadrado lamang ang bawat bahay, walang sariling tubig at kuryente. Hindi rin sila nakaiwas sa iniwanang baha sa Tatalon: Kung umuulan ay halos bumaha sa loob ng bahay dahil sa butas butas na bubong.

Ang panawagan ng mga maralitang lungsod, sa isang salita. (Macky Macaspac)

Ang masaklap, walang tiyak na kabuhayan sa relokasyon. “Ang tanging iniwan sa amin ng DSWD (Department of Social Welfare and Development) ay sampung kilong bigas at grocery na tumagal lang ng ilang araw,” sabi pa ni Rebecca. Natigil din sa pag-aaral ang kanyang mga anak, dahil hindi naman na-iayos ang paglipat ng mga bata sa pinakamalapit na paaralan sa Towerville.

Isa lamang si Rebecca sa libu-libong maralitang tagalunsod na binunot o dinemolis sa kanilang komunidad at paulit-ulit na bumabalik sa kanilang dating tinitirhan dahil sa kalunus-lunos na kalagayan, kawalan ng batayang serbisyo tulad ng tubig at kuryente, o kaya naman ay di-abot kayang renta ng mga pabahay na inilalako ng gobyerno.

Sa ilalim ng gobyernong Noynoy Aquino, muling iginigiit nila ang kanilang karapatan sa disenteng pabahay.

Kabilang si Rebecca sa kababaihang sumugod sa harapan ng tanggapan ng National Housing Authority para muling hinamon ng kababaihan ang administrasyong Aquino na tupdin ang tungkulin ng gobyernong magbigay sa mga maralita ng disenteng pabahay. Ayon sa Gabriela, militanteng alyansang pangkababaihan, mayorya kasi sa pamilyang Pilipino ang napagkakaitan ng karapatan sa disenteng pabahay, dahil matagal nang pribatisado ang serbisyong pabahay.

“Dito pa lamang sa National Capital Region, aabot sa 69 sa 100 pamilya ang walang sariling bahay. Nangungupahan sila o kaya’y umookopa na sa bakanteng mga lugar, kahit walang pahintulot,” ani Lana Linaban, pangkalahatang kalihim ng Gabriela.

Gabriela sa Japan, itinatag

Pinoy Weekly Staff — Thu, 01 Jul 2010 21:01:08 +0000

Mga miyembro ng bagong-tatag na Gabriela-Japan, kasama ang pangkalahatang kalihim ng Gabriela Philippines na si Lana Linaban (naka-gray na jacket). (Contributed Photo)

Nagkaisa ang aabot sa isandaang kababaihang Pinay sa Japan para itatag ang tsapter ng Gabriela sa naturang bansa.

Sa kongreso ng pagkakatatag nito noong Hunyo 27, inanunsiyo ng mga kababaihang Pilipina mula sa iba’t ibang organisasyon at lugar sa Japan ang pagtatag sa Gabriela-Japan. Ginanap ang kongreso sa Nagoya Women’s Center sa Nagoya, Japan.

“Natutuwa kami sa pagkakatatag ng Gabriela-Japan,” sabi ni Lana Linaban, pangkalahatang kalihim ng Gabriela Philippines na dumalo sa makasaysayang okasyong ito. “Signipikante ito dahil sa paglawak ng organisasyon natin sa loob at labas ng bansa (Pilipinas).”

Sinabi ni Linaban na optimistiko ang Gabriela Philippines sa ibayong paglakas ng Gabriela sa Japan, sa balangkas ng dalawang-taong programa nito na binuo noong kongreso.

Bahagi umano ng programa ang paglunsad ng mga kampanya para tugunan at proteksiyunan ang mga karapatan at kagalingan ng kababaihang Pinay sa Japan. Plano ng grupo na lumawak ang saklaw at kasapian nila, at abutin maging ang tradisyunal na mga organisasyong Pilipino sa iba’t ibang bahagi ng Japan.

“Bahagi rin ng pagpapalakas ng Gabriela-Japan ang pakikipag-alyansa sa mga Pilipino at kahit na di-Pilipinong organisasyon,” paliwanag ni Linaban.

Bukod dito, nais din ng Gabriela-Japan na maglunsad ng kampanyang edukasyon hinggil sa kalagayan ng kababaihang Pinay sa loob at labas ng Pilipinas. Bahagi rin ng plano ng grupo ang magbigay ng ilang mga serbisyo, laluna sa mga biktima ng karahasan sa Japan.

“Matindi pa rin ang piyudal na kultura sa Japan. Haluan na ito ng mababang pagtingin sa kababaihan, at ang pagiging dayuhan ng Pilipina. Malakas ang diskriminasyon, at talagang di pantay ang trato sa babae sa loob ng kasal. Siyempre, problema din ang matinding komodipikasyon (o pagtrato sa kababaihan bilang kasangkapang nabebenta),” paliwanag pa ni Linaban.

Kabilang din sa mga resolusyon ng kongreso ang pagdalo sa iba’t ibang kumperensiya na magpapalakas sa pakikibaka at pagkakaisa ng kabababaihan at Pilipino sa loob at labas ng Pilipinas. Kabilang na sa mga kumperensiyang nais lahukan ng Gabriela-Japan ang Montreal Women’s Conference sa Montreal, Canada sa Agosto.

Gabriela-Japan ang ikatlong tsapter ng Gabriela na itinatag sa ibang bansa. Una nang nagtatag ng tsapter ng nangungunang organisasyong pangkababaihan ang kababaihang Pinay sa USA at Hong Kong.

Kabilang sa nahirang na mga opisyal ng Gabriela-Japan: Virgie Ishihara, tagapangulo; Agalyn Nagase, pangalawang tagapangulo; Myrna Fujita, sekretaryo; Rosanna Tapiru, head ng campaigns and information; Neddie Codog, pinansiya.

Mga larawan: Kababaihan, naghayag ng kahilingan sa bagong administrasyon

Macky Macaspac — Mon, 28 Jun 2010 18:38:26 +0000

Nagpiket ang kababaihan ng Gabriela sa Plaza Miranda, Manila para ihayag sa publiko ang hiling nila sa bagong gobyernong Aquino. Tampok sa panawagan ng kababaihan ang pagpapanagot sa dating pangulong Arroyo, pagbawi sa paniningil ng expanded value-added tax, at iba pa. (Maki Macaspac)

Pinalagdaan ng Gabriela sa mga kababaihang dumaraan ng Plaza Miranda sa Maynila ang "Kahilingan ng Kababaihan sa Aquino Administration." (Maki Macaspac)

Larawan: Gabriela nagpiket sa harap ng tahanan ni Noynoy

Macky Macaspac — Wed, 23 Jun 2010 10:22:11 +0000

Nagsabit ng dilaw na mga ribbon ang mga miyembro ng Gabriela, militanteng alyansang pangkababaihan, sa harap ng tahanan ni Pres.-elect Benigno "Noynoy" Aquino III para hilingin ang pagpaparusa kay Pang. Arroyo at pagpapalaya sa mga detinidong pulitikal, laluna mga babaing detinidong pulitikal. (Maki Macaspac)

Larawan: Tagumpay ng Gabriela sa halalan, ipinagdiwang sa fashion show

Kenneth Roland A. Guda — Fri, 11 Jun 2010 15:54:08 +0000

Nagrampa ang mga kinatawan ng mga maralitang sektor, kasama ang mga propesyunal na modelo at lider-kababaihan, sa isang fashion show ng Gabriela na pinamagatalang "Project Runaway" sa Amoranto Stadium noong Hunyo 11. Nagsuot ang mga modelo ng mga damit na sumisimbolo sa mga suliranin ng sambayanang Pilipino at ang mga puwersa ng pagbabago ngayon. Ipinagdiwang din ng Gabriela ang tagumpay nito sa nakaraang halalang party-list. (KR Guda)

Mga Larawan: Nagwaging partylists ipinroklama, ‘pekeng’ partido ipinrotesta

Soliman A. Santos — Mon, 31 May 2010 08:51:55 +0000

Nagtaas ng kamay ang mga kinatawan ng sampung nangunang party-lists na ipinroklama ng Commission on Elections na uupo sa susunod na Kongreso. Kabilang sa mga ipinroklama ang progresibong mga partidong Bayan Muna (kinatawan ni Teddy Casino, nakatayo at pangalawa mula sa kaliwa), at Gabriela (kinatawan nina Luz Ilagan at Emmi de Jesus, nakaupo sa gitna). Hindi dumalo ngunit ipinroklama rin ang progresibong mga partylist na Anakpawis, Kabataan at ACT Teachers. (Soliman Santos)

Inulan ng tanong ng midya si Charlie Chua, tagapangulo ng Ang Galing Pinoy, partylist na inaakusahang pakawala ni Pang. Arroyo at pinangungunahan ng anak ng pangulo na si Mikey Arroyo. Ayon kay Chua, kinakatawan ni Mikey ang "underrepresented sectors" tulad ng mga nagmamaneho ng traysikel, tindera at security guards. (Soliman A. Santos)

Sa labas ng tanggapan ng Comelec, nagpiket ang mga miyembro ng Kabataan Partylist sa National Capitol Region para iprotesta ang proklamasyon ng "peke" umanong mga partylist tulad ng Ako Bicol, Ang Galing Pinoy at iba pa. (Soliman A. Santos)