Isang karagatan ng mga Pilipino ang nakiisa sa mga mamamayang Tsino ng Hong Kong sa Chater Road sa Hong Kong para sa pagdaos ng “People’s Vigil for Solidarity and Justice” para sa mga biktima ng hostage crisis noong Agosto 23 sa Manila.

Mahigit 10,000 Pinoy ang nakiisa sa vigil kung saan sila’y kumanta, nanalangin nag-alay ng kandila, bulaklak at mga mensahe para sa mga biktima. Marami rin sa mga lumahok sa martsa-protesta ng mga residente sa Hong Kong ang dumalo sa vigil at nagsalita hinggil sa trehedya.

“Iniaalay namin ngayon ang aming simpatiya sa mga biktima ng trahedya, at pinagmumuni-munian kung papaano at bakit nangyayari ito sa lipunang Pilipino, at para ipakita ang pakikiisa sa mga mamamayan ng Hong Kong sa panawagan para sa hustisya,” paliwanag ni Eman Villanueva ng Filipino Migrant Workers’ Union (FMWU), isa sa mga organizer ng vigil.

Sinabi rin ni Dolores Balladares, tagapangulo ng Unifil-HK, na sang-ayon sila sa sentimyento ng marami sa mga residente ng HK na responsable ang gobyernong Aquino, laluna ang Philippine National Police at mismong si Pang. Benigno “Noynoy” Aquino III, sa palpak na pakikipagnegosasyon sa hostage-taker na dumulo sa madugong kongklusyon.

“Hindi nakabatay at nakadirekta (ang PNP) sa pagrespeto sa mga karapatang pantao tulad ng karapatan sa buhay at due process, kaya ganun na lamang ang mga aksiyon nila nang walang konsiderasyon sa magigiging kahihinatnan. Kaya iyung operasyong dapat sumalba sa mga buhay ay dumulo sa pagpatay sa halos kalahati sa bilang ng mga hostage,” sabi ni Balladares.

Dalawang mambabatas gn Hong Kong, mga kinatawan ng mga grupong pangsimbahan, unyon ng mga manggagawa, estudyante at kababaihan sa HK ang dumalo sa pagtitipon.

Maliban sa FMWU, inorganisa rin ang pagtitipon ng United Filipinos in Hong Kong (Unifil-HK), Migrante-HK, Gabriela at Bagong Alyansang Makabayan sa HK, at mga grupong tulad ng Justice and Peace Commission of the HK Catholic Diocese (HKJP), HK Catholic Commission for Labour Affairs (HKCCLA), Hong Kong Christian Council (HKCC), Association for the Advancement of Feminism (AAF), Asia-Pacific Students and Youth Association (ASA) at World Student Christian Federation – Asia Pacific (WSCF-AP).

Hindi lamang mga residente ng Hong Kong, pati ang mga Pilipinong nagtatrabaho at naninirahan sa HK ay nagluksa sa naganap sa Manila noong Agosto 23. Kinondena rin nila ang umano'y palpak na negosasyon ng gobyernong Aquino sa hostage taker.

Nagsagawa ng misa alay sa mga biktima ang mga alagad ng simbahan sa Hong Kong.

Pakikiramay ng mga manggagawang Pinoy sa HK.

Nakiisa ang Migrante International sa paghangad ng hustisya sa mga biktima ng hostage crisis sa Manila noong Agosto 23. Pinangangambahan din nila ang balik sa mga OFW sa HK ng palpak na pagresolba ng gobyernong Aquino sa krisis. (Kontribusyon)

Pinagbabayaran ngayon ng mga migranteng Pilipino ang kapalpakan ng gobyernong Aquino III sa hostage crisis kamakailan na ikinasawi ng walong Hong Kong nationals at umani ng pandaigdigang pagkondena.

Sa inisyal na mga ulat na natanggap ng United Filipinos in Hong Kong (Unifil-HK), alyansa ng mga Overseas Filipino Worker (OFW) sa Hong Kong, nagsisimula na ang panghaharas at diskriminasyon laban sa mga Pilipino bunga ng galit ng mga residente ng Hong Kong sa malagim na krimen.

Terminasyon ng kontrata, pang-aalimura

“Sa totoo lang, santambak ang mga dumadating sa amin na mga impormasyon. May termination ng contract, may sinigawan daw, may dinuraan daw sa tram at bus,” sabi ni Eman Villanueva, pangkalahatang kalihim ng Unifil-HK, sa isang e-mail sa Pinoy Weekly. Gayunpaman, kinukumpirma pa ng nasabing grupo ang mga impormasyong nagmula sa kanilang mga miyembro, karamihan ay mga domestic helper.

Sa isang press conference kahapon pagkatapos ng misa ng pakikiramay sa mga biktima at pagkondena sa gobyernong Aquino ng mga OFW, sinabi ni Villanueva na may isang kumpirmadong kaso ng pagsibak sa isang Pilipinong domestic helper na direktang maiuugnay sa hostage taking.

Tinatayang may 200,000 Pilipino na nagtatrabaho sa Hong Kong.

Nakatanggap naman ng ulat ang Asian Human Rights Commission (AHRC), grupong pangkarapatang pantao na nakabase sa Hong Kong, na may isang Tsinong taga-Hong Kong ang sumigaw sa publiko sa isang erya sa Kowloon Tong, “We employ them (Filipinos) in our homes and they murder us in their homes.”

Idiniin ng AHRC na hindi dapat magdulot ang trahedya ng awayan sa pagitan ng mga nasyunalidad.

Pero ayon kay Garry Martinez, tagapangulo ng Migrante International, isang malungkot na reyalidad na posibleng sinasalo ng mga OFW ang galit ng mga mamamayan ng Hong Kong sa nangyari noong Agosto 23.

“Ang lahat ng gawin ng gobyerno na may epekto sa ibang bansa gaya ng Hong Kong, may retaliation ‘yan sa mga Pinoy, dahil sila ‘yung nandoon,” aniya sa panayam ng Pinoy Weekly.

Kahapon, nakatanggap ang Migrante ng reklamo mula sa isang OFW sa Hong Kong na may among pulis. Habang pinapalabas umano sa telebisyon ang hostage taking, ipinatawag ang Pilipinong domestic helper ng kanyang amo at sinabihang “Manood ka nang makita mo kung gaano ka-estupido ang inyong mga pulis,” at saka nagbitiw ng iba pang pang-aalimura, kuwento ni Martinez.

Para naman kay Rose Ordoño, 31, at nagtatrabaho bilang domestic helper sa Hong Kong simula noong 2006, bago pa man ang hostage taking, masama na ang pagtrato ng maraming among Tsino sa kanila. Nilayasan ni Rose ang kanyang unang tatlong amo dahil sa samu’t saring kaapihan, mula sa hindi pagpapasuweldo ng tama at pang-aalimura hanggang sa pisikal na pananakit at sexual harassment.

“Ang sabi ng dati kong amo sa akin, ang mga Pilipino patay-gutom daw,” aniya sa panayam ng Pinoy Weekly.

Kasalukuyang nagpapa-renew ng pasaporte si Rose sa Pilipinas, pero balak niya muling bumalik sa Hong Kong pagkakuha nito. Ngunit dahil sa madugong hostage taking, mas marami kaysa dati ang kanyang agam-agam.

“Baka ‘yung employer na mahanap ko, sa akin ibunton ang kanyang galit. Hindi kami ang dapat magsakripisyo para sa ginawa ng pulisya,” sabi ni Rose.

Hustisya at pagpapanagot kay Aquino

Hindi rin ito ang unang pagkakataon na naapektuhan ang mga OFW sa isang tinataguriang maling hakbang ng gobyerno. Ayon kay Martinez, nakaranas din ng panghaharas at diskriminasyon ang mga Pilipino sa Middle East nang magdeklara ng suporta si dating pangulong Gloria Macapagal Arroyo sa giyerang agresyon ng Estados Unidos sa Iraq.

“May mga natanggap kami na reklamo noon kung saan kinokompronta o sinisisi ng mga Arabo ang mga Pilipino para doon sa ginawa ng gobyernong Arroyo,” kuwento ni Martinez.