Tumulak ngayong araw mula sa mga lungsod ng Davao at Cagayan De Oro ang “makasaysayang” 10-araw na pambansang karaban ng mga magsasaka.

Pinamagatang “Lakbayan ng Anakpawis para sa Lupa at Katarungan,” pinangunahan ng Kilusang Magbubukid ng Pilipinas (KMP) at Anakpawis Party-list ang pagkilos ng tinatayang halos 3,000 magsasaka na magmumula sa Luzon, Visayas, at Mindanao.

Sa kauna-unahang pagkakataon, sama-sama silang maglalakbay papuntang Mendiola para igiit ang tunay na reporma sa lupa, ayon sa mga organisador ng karaban.

“Maglalakbay ang mga magsasaka ng 10 araw para iparating ang kanilang pagtutol sa lumalalang kawalan ng lupa, masaker sa mga magsasaka, at pandarambong ng pondo para sa agrikultura. Magmamartsa sila’t sasakay sa mga dyip at barko,” pahayag ni Anakpawis Rep. Rafael Mariano.

Ayon sa mambabatas, tagapangulo rin ng KMP, ang lakbayan ang “pinakamalakas na pang-uusig ng mga Pilipinong magsasaka” sa rehimeng Arroyo.

Bandang alas-kuwatro ng hapon, nagsagawa ng protesta sa Freedom Park sa Davao City ang mga delegado ng Lakbayan mula sa Southern Mindanao. Isang torch march papunta sa opisina ni House Espiker Prospero Nograles ang isasagawa para sa umano’y simbolikong pagsusunog sa batas na nagpapalawig sa “huwad” na Comprehensive Agrarian Reform Program.

Samantala, sisimulan bukas ng mga magsasaka mula sa mga probinsya ng Panay, Negros, Cebu, at Bohol ang karaban mula sa Visayas. Inaasahang magtatagpo ang mga delegado mula sa Mindanao at Visayas sa Enero 14 sa Calbayog City.

Sa Enero 16 naman magtatagpo ang mga magsasaka mula sa Kordilyera, Ilocos, Cagayan Valley, at Gitnang Luzon. Mula sa Hacienda Luisita sa Tarlac City, tutulak sila pa-Maynila.

Inaasahang darating sa Maynila ang mga magsasaka sa Enero 20, at magkakampo sa Department of Agrarian Reform bago tumulak patungong Mendiola sa Enero 22, ika-23 na anibersaryo ng masaker sa Mendiola.

Ayon sa Anakpawis, matuwid lamang ang isinasagawang karaban ng mga magsasaka, dahil sa tumitinding monopolyo sa lupa ng mga panginoong-maylupa.

Karamihan sa mga Pilipinong magsasaka ang umano’y nagbibigay ng kalahati ng kanilang ani sa mga panginoong-maylupa. Tinatayang 19 hanggang 21 porsiyento lamang ng kanilang kabuuang ani ang napupunta sa mga magsasaka, ayon sa grupo.

Samantala, mas masahol pa umano ang kalagayan ng mga manggagawang-bukid, na sumasahod lamang ng P20 hanggang P40 kada araw sa bawat anihan.

Nais din iparating ng Lakbayan sa publiko ang epekto sa mga magsasaka ng malawakang paglabag sa karapatang pantao. Ayon sa datos ng Karapatan, 561 sibilyang magsasaka na ang pinaslang simula 2001; habang marami pa ang napilitang lumikas sa kani-kanilang mga tahanan nang dahil sa militarisasyon sa kanayunan.

Sundan sa Twitter at Facebook ang coverage sa Lakbayan ng Pinoy Weekly, sa pakikipagtulungan ng May Day Productions.

Nagsunog ang mga magsasaka mula sa Gitnang Luzon at Timog Katagalugan ng 1,000 litrato ni Pangulong Arroyo bilang protesta sa diumano'y kainutilan ng gobyernong Arroyo sa pagtugon sa kalamidad at krisis sa kanayunan. (Angelica Carballo)

Nagmartsa ang daan-daang magsasaka mula sa Gitnang Luzon at Timog Katagalugan na apektado ng bagyong Ondoy at Pepeng para igiit sa Malakanyang ang isang 10-puntong programa na umano’y maglulutas sa matagal nang problema sa kanayunan.

Mula sa isang camp-out sa opisina ng Department of Agrarian Reform sa Quezon City, natungo sa Mendiola Bridge sa Maynila ang mga miyembro ng Kilusang Magbubukid ng Pilipinas (KMP), Katipunan ng mga Samahang Magbubukid sa Timog Katagalugan (Kasama-TK), Alyansa ng mga Magbubukid sa Gitnang Luzon (AMGL), at Anakpawis Party-list noong Oktubre 21.

Iginiit ng mga magsasakang nasalanta ng bagyo ang pagpapagawa ng mga tahanang nasira; rehabilitasyon ng mga pananim at pagbibigay ng libreng binhi; financial grant na P10,000 hanggang P15,000 kada ektarya; pagbigay ng mga gamit pangsaka; malinis na suplay ng tubig; moratoryo sa irrigation fee; kabuhayan para sa mga taga-kanayunan; at pagkansela o moratoryo sa utang ng mga magsasaka sa mga panginoong-maylupa at iba pang mga institusyong pampinansiya.

Ayon sa National Disaster Coordinating Council (NDCC), umaabot na sa P11.68 Bilyon ang kabuuang halaga ng kawalan sa lokal na agrikultura dahil sa bagyong Ondoy at Pepeng.

“Hindi sapat ang ginawang relief efforts ng gobyernong Arroyo sa kanayunan. Sa halip, ginagagamit pa nga ng Pangulo ang kalamidad para pabanguhin ang imahe niya sa publiko,” ayon kay Danilo Ramos, pangkalahatang kalihim ng KMP.

Sinunog ng mga magsasaka ang 1,000 litrato ni Pangulong Arroyo habang nagsu-surfing sa Argao Island sa Mindanao, para ipakita ang kanilang galit.

Samantala, tutol din ang mga magsasaka sa Comprehensive Agrarian Reform Program na umano’y nagdudulot ng kahirapan at kawalang-lupa ng mga magsasaka na siyang pinakabulnerable sa mga kalamidad.

Iginiit ng mga grupo ang libreng pamamahagi ng lupa sa ilang bahagi ng Gitnang Luzon, gaya ng 375-ektarya sa San Miguel, Bulacan na umano’y kinamkam ni Rep. Luis Villafuerte; 3,100-ektarya ng lupaing agrikultural sa Fort Magsaysay Military Reservation sa Nueva Ecija; at 6,453-ektaryang Hacienda Luisita sa Tarlac na pagmamay-ari ng pamilya Aquino.

Samantala, iginiit naman ng mga magsasaka sa Timog Katagalugan ang pagtigil ng mga proyekto sa rehiyon ng Calabarzon na umano’y naging sanhi ng malawakang pagbaha, partikular sa probinsya ng Laguna.