Pinoy Weekly » Makabayan

Pagpupugay sa aktibismo ng masa

Pinoy Weekly Staff — Mon, 21 Jun 2010 04:00:15 +0000

Dibuho ni Neil Doloricon

Una sa lahat, nagbibigay pugay ang Pinoy Weekly Online sa mga mamamayang Pilipino para sa matagumpay na pagpapaalis sa puwesto kay Gloria Macapagal-Arroyo. Sa kabila ng grandiyosong mga pakana, nabigo si Arroyo para makapanatili sa kapangyarihan nang lampas sa siyam na taon.

Hindi naging biro para sa masang Pilipino ang pinagdaanang kahirapan at panunupil sa loob ng siyam na taon ng isang pangulong sagad at lantaran ang korupsiyon, pandaraya, pasismo, at kasama ng mga kontra-mamamayang mga polisiya ay naglugmok ng bansa sa pinakamatitinding krisis pang-ekonomiya at pampulitika.

Wala nang hihigit pa sa aktibismong ipinakita nito laban sa rehimeng Arroyo. Sa mahabang panahon, ang mga mahihirap at api ang nasa unahan ng mga pakikibakang nagnanais patalsikin si Arroyo. Sumakay lamang dito ang mga tradisyunal na pulitiko hanggang noong eleksiyon na nagkorona sa kanila bilang mga bagong hari’t reyna ng isang sistemang bulok. Naturingang makabago ang teknolohiya sa nakaraang eleksiyon subalit mas masahol pa ang pandaraya dito kaysa luma.

Silang nagpupundar sa yaman ng bansa ngunit walang makatarungang sahod o sariling lupa, silang araw-araw na nagdurusa sa kasalatan ng serbisyong sosyal at pagtaas sa presyo ng mga bilihin, silang nangingibang-bansa ngunit kinukurakot ang kanilang ambag sa kaban ng bayan, silang pinapalayas sa kanilang mga tahanan sa ngalan ng ‘kaunlaran’ na kailanman ay hindi matitikman—sila at ang kanilang mga organisasyon ang tunay na lumaban sa rehimeng Arroyo sa kanayunan man o kalunsuran.

Nagpunyagi silang itulak ang mga lehitimong karaingan at kahilingan. Nagbingi-bingihan man si Arroyo, maraming katulad nila ang nakinig at namulat, naorganisa at nakibaka. Itinaguyod nila ang mga dapat baguhin sa lipunan, at kumilos para dito sa hindi mabilang na mga kilos-protesta, maliit man o malaki, mula sa loob ng mga komunidad, pabrika, o paaralan hanggang sa mga lansangan at paanan ng Malakanyang. Kumilos sila dahil hangad nila ang tunay na mga repormang panlipunan—at dahil hindi ito maibigay ng estado, sila’y binansagang ‘kaaway’. Mula sa kanilang hanay daan-daan ang pinatay, dinukot para hindi na muling ilitaw, ilegal na inaresto, tinortyur at sinampahan ng gawa-gawang mga kaso, at sa pangkalahata’y sinupil ang demokratikong mga karapatan.

Sa kabila nito, patuloy nilang sinikap na palakasin ang kanilang mga organisasyon bilang tanda ng kanilang pagkakaisa at prinsipyo. Hindi sila umatras sa anumang labanan, isa na riyan ang labanang elektoral. Itinaguyod nila ang progresibong mga kandidato sa Senado na sina Satur Ocampo at Liza Maza, at party-list ng iba’t ibang sektor. Nangampanya sila hindi lamang para sa puwesto, kundi para ipalaganap ang isang programang pambansa-demokratiko na naglalatag ng pangmatagalang pagbabago. Ang nakabubuhay na sahod, tunay na repormang agraryo, paglikha ng lokal na mga industriya’t trabaho, at pagtataguyod ng pambansang soberanya ang ilan lamang sa mga sangkap ng programang ito.

Nakakuha ng kabuuang tatlong milyong boto ang mga progresibong party-list na Bayan Muna, Gabriela, Anakpawis, Kabataan, ACT Teachers at Akap Bata. Mas mataas ito sa 2.3 milyong boto na kanilang nakuha noong eleksiyong 2007. Bukod pa rito, nakakuha sina Ocampo at Maza ng halos apat na milyong boto bawat isa. Totoo, hindi naging sapat ang mga boto na ito para mailuklok ang dalawang progresibong mambabatas sa Senado. At, dahil na rin sa pagdagsa ng ‘pekeng’ mga party-list na pinondohan ng Malakanyang at nagpalobo sa kabuuang bilang ng mga boto para sa party-list, tinatayang pito lamang na kinatawan ng mga progresibong party-list ang makakaupo sa Kongreso.

Gayunpaman, maituturing itong malaking tagumpay. Simula’t sapul, ang eleksiyon ay isang tagibang na paligsahan ng salapi at tusong taktika ng tradisyunal na mga pulitiko. Simula’t sapul, naging target ng black propaganda at panunupil ng estado ang mga progresibo. Sa kabila nito, mananatili sa Kongreso ang isang blokeng maaasahang dedepensa sa mga karapatan ng mamamayan, magsusulong ng kanilang lehitimong mga kahilingan, at magsisigurong mapapanagot si Arroyo sa kanyang sanlaksang krimen laban sa taumbayan. At sa masang Pilipino na namulat sa programa ng mga progresibo na inilako noong panahon ng kampanya, siguradong may naghihintay na mga pakikibaka para isulong ito.

Sapagkat walang pundamental na pagbabagong maaasahan mula sa bagong rehimen ni Benigno “Noynoy” Aquino III. Ang totoong makikinabang sa kanyang pagkapanalo ay hindi ang masang Pilipino kundi ang angkang Cojuangco-Aquino na hahawak muli ng pampulitika at pang-ekonomiyang kontrol sa bansa; ang mga asyendero at negosyante na papaboran ng bagong rehimen; at ang gobyerno ng Estados Unidos na nais na ring maialis sa puwesto ang kinamumuhian-ng-taumbayan na si Arroyo para maproteksyunan ang sarili at dayuhang interes sa bansa.

Asahan nang magbabantay ang mamamayan na tuparin ni Aquino ang mga pangako nito, Asahan nang hihilingin ng masa ang mga pundamental na solusyon sa kanilang mga problema. At asahan nang patuloy ang aktibismo at pagbalikwas sa rehimeng hahadlang sa katuparan ng kanilang mga karapatan at kahilingan.

Mga Larawan: Huling sabak sa kampanya ng mga progresibo, Nacionalista Party

Rogelio Tubije — Sat, 08 May 2010 15:56:04 +0000

Noong Mayo 7, tumungo ang mga tagasuporta ng progresibong mga kandidato sa pagkasenador na sina Satur Ocampo at Liza Maza sa Harbour Centre, Tondo, Maynila, para sa miting de avance ng Nacionalista Party. (Rogelio Tubije)

Nandoon rin ang iba't ibang progresibong party-list sa ilalim ng Koalisyong Makabayan na Kabataan, Anakpawis, Gabriela, Akap Bata, Act Teachers at Bayan Muna. (Rogelio Tubije)

Una sa mga kandidato sa pagkasenador na nagsalita si Ocampo. Ipinakita sa screen ang istorya sa pahayagan nang siya'y ipinakulong ng gobyernong Arroyo noong 2007 bilang bahagi ng panunupil sa oposisyon. Napawalang-sala rin ng Korte Suprema ang kongresista sa kasong rebelyon. (Rogelio Tubije)

Ayon kay Ocampo, tunay na repormang agraryo at pambansang industriyalisasyon ang susi sa tunay na pag-unlad ng bansa. Ipagpapatuloy umano niya sa Senado ang laban para sa ilang mga reporma at kontra sa anti-mamamayang mga polisiya at batas. (Rogelio Tubije)

Sunod na nagsalita si Maza, na nakilala bilang tagapagtanggol sa karapatan ng kababaihan bilang kinatawan ng Gabriela Party-list. (Rogelio Tubije)

Noynoy Aquino: Anong Demokrasya?

Pinoy Weekly Staff — Thu, 06 May 2010 06:29:16 +0000

Noynoy Aquino: Kampeon o kaaway ng demokrasya? (Keith Bacongco)

Kung para sa demokrasya si Noynoy Aquino, hindi niya dapat isasantabi at sisiraan ang mga progresibo, ayon sa bidyo-ulat na ito ng Pinoy Weekly hinggil sa pakikitungo sa Kaliwa ng nangungunang kandidato sa pagkapangulo.

Ang pagiging malapit ni Aquino sa social democrats at hindi pagtugon sa ugat ng rebelyon ay senyales umano na posible ang pinakamasasahol na paglabag sa karapatang pantao sa ilalim ng kanyang rehimen, kung sakaling manalo.

Noynoy Aquino: Anong Demokrasya? from Pinoy Weekly on Vimeo.

Itim na propaganda, itim na laso

Ilang-Ilang D. Quijano — Mon, 26 Apr 2010 11:25:13 +0000

Naglipana sa buong bansa ang mga materyales na tinataguriang itim na propaganda laban sa progresibong mga kandidato sa pagkasenador na sina Satur Ocampo at Liza Maza. (Contributed Photo)

Una, ang itim na propaganda. Sunod, ang itim na laso.

Nang maging abogado si Katrina Castillo noong 2007–ang pinakabatang pumasa ng bar exams sa taong iyon–nagsimula rin ang panghaharas at paninira sa kanya. Mga magsasaka na ikinulong at pinagbintangang komunista kasi ang kanyang piniling pagsilbihan, bilang human rights lawyer (sa edad na 25, sinasabing ang pinakabata sa buong bansa). Sinusundan siya ng mga pinaghihinalaang ahente ng militar sa mga pagdinig sa korte. Sa programa sa radyo ng 8th Infantry Division, inaakusahan siyang “legal counsel” ng National Democratic Front of the Philippines.

Si Castillo ngayon ang ikatlong nominado ng Kabataan, isang progresibong party-list na kumakatawan ng sektor ng kabataan sa Kongreso. Noong Abril 16, nakatanggap ng sulat ang kanyang ina. May kalakip itong itim na laso.

Ang sabi sa sulat: ““It seems that you are not truthful and serious in serving the public. We found out that you continue your alliance with the enemies of democracy, progress and peace – the CPP-NPA-NDF and its partylists. Your alliance with them is an admission that you are one of them who adhere to the nonsense communism. WITH THIS LETTER IS A BLACK RIBBON THAT WILL REMIND YOU THAT YOUR LIFE, AS WELL AS YOUR FAMILY, IS ONLY A PRIVILEGE. IF DEATH BECOMES YOU, MAY YOU REST IN PEACE. For the Filipino people, country, and democracy.”

Sulat ng babala at itim na laso para kay Katrina Castillo, isang human rights lawyer at ikatlong nominado ng Kabataan Party-list. (Contributed Photo)

Halos ganoon din ang natanggap noong Marso 23 ni Arthur Allad-iw, isang dating mamamahayag at ngayo’y tumatakbo bilang konsehal ng Baguio City. Ipinadala sa kanyang bahay ang isang sulat na nagsasabing, “Aming napatunayan na patuloy ang iyong pakikipag-alyado sa kaaway ng demokrasya, ang CPP-NPA.” Kalakip nito ang itim na laso na “babala na ang iyong buhay gayundin ng pamilya mo ay hiram lamang.”

“Noong una, I was disturbed by it kasi parang hindi lang ako, kundi pati ang pamilya ko ang threatened. Pero nalalampasan ko ito dahil na rin sa suporta ng aking mga kasamahan at ng midya,” sabi ni Allad-iw sa panayam ng Pinoy Weekly.

Kandidato si Allad-iw ng Makabayan, koalisyon ng mga party-list at iba pang progresibong kandidatong tumatakbo sa eleksiyon. May isang pagkakataon sa Session Road sa Baguio City, kuwento ni Allad-iw, na itinaas ng mga kandidato ng Makabayan sa pagkasenador na sina Satur Ocampo at Liza Maza ang kanyang kamay.

Lumang akusasyon, bagong puntirya

Sa isang press conference a Quezon City noong Abril 24, ipinakita nina Ocampo at Maza sa midya ang mga kopya ng sulat na ipinamimigay sa daan-daang kandidato sa iba’t ibang bahagi ng bansa. Anila, sumusuporta sa Makabayan ang mga pinapadalhan ng ganitong sulat. Dahil iisa lamang ang laman ng sulat, umano’y malinaw na isa itong sistematiko at pambansang kampanya ng panunupil.

Sa sulat, tinukoy ang mga party-list na Bayan Muna, Anakpawis, Gabriela, Kabataan, Katribu, ACT Teachers, at Akap Bata na mga “kasangkapan ng Partido Komunista ng Pilipinas” na layuning “mapasok muli ang ating demokratikong institusyon upang sirain mula sa kaloob-looban.”

Tinukoy si Ocampo na dating namumuno ng mga rebeldeng New People’s Army na diumano’y sangkot sa pagpatay sa pinaghihinalaang mga ahente ng gobyerno noong dekada ‘80. Samantalang si Maza, inakusahang nagpapatay diumano ng mga kaanib ng grupong Akbayan sa Nueva Ecija.

Hinikayat ang mga kandidato na huwag “magpalinlang, makipagalyado, sumuporta, o humingi ng tulong sa mga komunista.” “Ito ay paunang babala!” pagtatapos ng sulat na pinirmahan ng isang grupong nagngangalang Samahan Kontra Korapsyon.

Paninindigan sa gitna ng bangayan

pinoyweekly — Wed, 03 Feb 2010 15:45:50 +0000

Dibuho ni Neil Doloricon

Bago pa man matapos ang huling sesyon ng ika-14 na Kongreso, tila campaign season na sa loob ng Mataas na Kapulungan ng Kongreso.

Anumang layuning paglingkuran ang interes ng publiko sa pamamagitan ng imbestigasyon sa pagkakasangkot diumano ni Sen. Manny Villar sa kontrobersiyal na konstruksiyon ng C-5 extension project, tila naglaho na sa pulitikal na mga pagdinig sa Senado. Nagkakampu-kampuhan na sila, nagbabatuhan ng putik. Maaanghang – minsan pa nga’y bastusan na – ang pananalita. Ang isang kampo, na siyang Mayorya, sa pangunguna ni Senate President Juan Ponce Enrile, iginigiit na humarap si Villar sa sesyon. Pinangunahan niya ang paglagda ng rekomendasyon ng Senado na nagsasabing maysala si Villar. Nakahanay dito ang mga katunggali ni Villar sa susunod na halalan: Sen. Jamby Madrigal at Sen. Noynoy Aquino, na tumatakbo sa pagkapangulo, Sen. Mar Roxas na tumatakbo sa pangalawang tagapangulo sa ilalim ni Aquino, at iba pang kapartido o kaalyado ni Aquino at Enrile.

Sa kabilang kampo, nariyan ang mga tagadepensa ni Villar, mula kay Sen. Joker Arroyo at Sen. Miriam Santiago hanggang kay Sen. Aquilino Pimentel Jr. at Sen. Alan Peter Cayetano. Iginigiit nila ang kawalan ng sala ni Villar at pinararatangan ang Mayorya na namumulitika para siraan ang kandidatong pinakamalaking banta sa kandidatura ni Aquino sa halalang pampanguluhan.

Tulad ng sinasabi ni Bayan Muna Rep. at kandidato sa pagkasenador Satur Ocampo, ideyal pa ring humarap ang senador sa kanyang mga kasamahan sa Senado. Paninindigan ng Makabayan, koalisyon ng progresibong mga partido at indibidwal na nagpapatakbo kina Ocampo at Gabriela Rep. Liza Maza sa pagkasenador at nakikipag-alyado sa Nacionalista Party, na hindi nito dedepensahan si Villar. Kayang depensahan ni Villar ang sarili niya. Ngunit batid ng mga progresibo ang matinding pulitika na umiiral ngayon sa mga sesyon ng Senado. Sinabi rin diumano ni Villar kay Ocampo na pinangangambahan niya ang “pambabastos” ng mga kapwa senador niya – isang palatandaang grabe na ang tindi ng hidwaan, nagiging desperado na ang sitwasyon. Iginigiit umano ni Ocampo sa senador na pangibabawan ang pangamba niya, kung talagang may matibay na mga ebidensiya siyang hawak na nagpapatunay ng kawalan ng sala niya sa akusasyon.

Tama ang mga kritiko ni Villar na kailangang malaman ng madla ang katotohanan sa kontrobersiyal na C-5 Road Extension Project. Totoo bang ginamit ni Villar ang kanyang pagiging senador para makinabang ang kanyang kompanya sa proyektong ito ng gobyerno? Isyu ng malinis na paggogobyerno ito, at marapat lamang na ipagpaliwanag ang isang kandidato sa pagkapangulo dahil matagal nang mithiin ng mga mamamayan ang isang gobyernong malinis at hindi nagsasamantala sa kaban ng bayan para sa kapakinabangan ng iilang nasa poder.

Ayon sa kampo ni Villar, marami silang hawak na ebidensiya na nagpapawalang-sala kay Villar. Gayundin ang sinasabi nina Sen. Madrigal. Ang mahirap ngayon sa isang pulitisadong sesyon, isang prosesong tila nabahiran na ng laro sa pulitika, ay ang mahihirapan nang masala ng mga mamamayan kung alin sa ebidensiya ng dalawang panig ang mas matimbang.

Marahil, ito ang nais ng mga kalaban ni Villar sa Senado: na lalong bahiran ng dumi ang reputasyon sa publiko ni Villar para maparahan ang pag-angat ng kanyang kalagayan sa mga sarbey (Sa pagkakasulat ng artikulong ito, lumabas ang huling resulta ng sarbey ng Social Weather Station, kung saan 7 puntos na lamang ang lamang ni Aquino kontra kay Villar). Hindi talaga katotohanan kundi pagbagsak ni Villar ang maaaring layunin ng mga pagdinig na ito.

Samantala, noong nakaraang linggo, naganap ang Lakbayan, martsa ng mga magsasaka mula Mindanao at Hilagang Luzon patungong Mendiola para igiit ang panlipunang katarungan at tunay na repormang agraryo. Layunin ng Lakbayan na mapag-usapan sa midya at publiko ang dalawang isyung ito. Layunin din nilang gawing usaping elektoral ang naturang mga hiling ng mga magsasaka. Sa dalawang isyung ito, malaki ang pananagutan ng kalaban ni Villar na si Aquino. Hanggang sa kasalukuyan, hindi pa rin nakakamit ang hustisya para sa mga 13 biktima ng masaker noong Nobyembre 2004 sa Hacienda Luisita na pag-aari ng pamilya Cojuangco ni Aquino. Patuloy ring hinaharang ng mga Cojuangco ang pagbawi ng mga magsasaka sa mga lupaing pinagtatamnan nila sa Luisita. Samantala, sa kalagitnaan ng kontrobersiyal na asyenda, biglaang pinatayo ng gobyerno ang Subic-Clark-Tarlac Expressway (SCTex). Bukod sa mistulang pag-agaw sa lupaing para sana sa mga magsasaka, pinaghihinalaang pinaboran nito ang pamilya Cojuangco, na maaaring kumita sa pagbenta ng lupa at pagkakaroon ng aksesibilidad sa mga proyektong gusto nitong gawin at pagkakitaan sa loob ng asyenda. Hindi natin tanggap ang palusot ng kampo Aquino na maliit lang daw ang pag-aari ng senador sa asyenda. Pamilya pa rin niya ang mayoryang may may-ari sa asyenda. Katunayan, noong kasagsagan ng masaker sa Luisita, si Aquino mismo ang nagsilbing tagapagsalita ng asyenda at ng pamilya Cojuangco para pabulaanan ang kanilang mga pananagutan sa masaker.

Nasaan ngayon ang mga na imbestigasyon sa Senado hinggil dito?

Ipinapakita lamang ng pagkakasangkot din ni Aquino sa mga kontrobersiya sa Luisita na wala siyang pinag-iba sa inaakusahan niyang si Villar. Gayundin naman ang progresibong pagsusuri sa halalang ngayon. Wala namang iisang kandidatong masasabing babasag sa bulok na pulitika ng bansa, sa pagsasamantala ng iilan sa nakararaming mga mamammayan, sa pangangayupapa ng bansa sa dayuhang mga interes. Kaalyado ni Villar ang progresibong koalisyong Makabayan nina Ocampo at Maza batay sa progresibong platapormang sinang-ayunan ng nauna. Mas mainam ang ginawa ni Villar na pagtanggap sa plataporma at dalawang kandidato ng Makabayan. Pero batid ng mga progresibo, lalung laluna nina Maza at Ocampo, na hindi dapat magtigil dito. Kailangang naging mapagmatyag sa pagpapatupad ng platapormang makabayan at maka-mamamayan, sinuman ang talagang magwagi sa halalan sa Mayo 2010.

Mga Aeta mangangampanya laban kay GMA

PW Staff — Tue, 02 Feb 2010 07:13:51 +0000

Para sa sinumang nakakaaalam ng rekord ni Pangulong Arroyo, ang pagboto o pagkampanya para sa sinumang tatakbo laban sa kanya ay halos kasing dali lang ng pagbasa ng ABKD.

Ito ang naging pahayag ng mga katutubong Aeta sa pagtakbo ni Pangulong Arroyo sa ikalawang distrito ng Pampanga.

“Tanong pa ba kung sino ang iboboto ng mga aeta sa Pampanga?” ayon kay Nelson Mallari, pangkalahatang kalihim at third nominee ng Katribu Partylist.

Sinabi ni Mallari, isang katutubong Aeta mula sa Brgy. Nabuclod, Floridablanca na wala sanang lalaban kay Pangulong Arroyo sa pagkakongresista kung gusto ng kanyang mga “kabalen” na irepresenta sila nito.

Paliwanag ni Mallari, mahigpit silang mangangampanya laban kay Pangulong Arroyo, na tubong Lubao, dahil matindi ang kahirapang naranasan ng mga Filipino sa ilalim ng panunungkulan nito.

Hindi rin umano nakaligtas sa kahirapang ito kahit ang kanyang mga “kabalen.” Ibinigay na halimbawa ni Mallari ang karanasan ng mga Aeta na pinaniwala umanong “may puso para sa mga katutubo si Pangulong Arroyo,” samantalang itinutulak naman niya ang pagpasa ng nirebisang regulasyon ng Indigenous Peoples Rights Act o IPRA.

Karamihan ng mga Aeta ay naninirahan sa Floridablanca at Porac, na parehong saklaw ng ikalawang distrito ng Pampanga.

Iginiit ni Mallari na hindi iboboto ng mga taga-Pampanga si Pangulong Arroyo dahil sinuportahan nito ang malawakang pangangamkam ng lupa sa pamamagitan ng pag-isyu ng permit sa pagmimina at pagka-quarry, paglatag ng Subic-Clark Expressway (SCTex), proyektong eco-tourism sa Pinatubo at pagbigay ng malawak na bahagi ng lupain para sa jathropa, na pawang kumamkam sa kabuhayan ng mga Aeta.

Hindi rin umano dapat maging masaya ang mga Aeta na nabigyan ng certificates of ancestral domain titles o CADT dahil iniinstitusyonalisa lamang nito ang pangangamkam ng lupa.

“Kaalinsabay ng pagbibigay ng mga CADT, nariyan naman ang mga proyektong nang-aagaw ng mga lupaing ninuno,” ayon kay Mallari patungkol sa nakaambang pagka-quarry sa Nabuclod, na nauna nang nabigyan ng 7440-ektaryang CADT.

Patungkol naman sa SCTeX, sinabi ni Mallari “magiging mabilis ang pagpasok sa mga lupang ninuno dahil sa mga highway na iyan kaya naman ‘yung mga proyektong tulad ng mina at iba na umaagaw ng lupa namin ay mabilis din ang pasok.

Samantala, suportado naman ng Katribu party-list at mga Aeta ang kandidatura ni Architect Adonis Simpao na nauna nang inendorso ni Bayan Muna Partylist Rep. at Makabayan Senatorial bet Satur Ocampo, na mula naman sa bayan ng Sta. Rita, na saklaw rin ng ikalawang distrito.

Larawan: Pacquiao nakipagkilala kina Satur, Liza

Kontribusyon — Mon, 28 Dec 2009 06:31:14 +0000

Nakipagkilala ang boksingerong si Manny Pacquiao sa dalawang kandidato sa pagkasenador ng Makabayan na sina Reps. Liza Maza at Satur Ocampo, sa pagtitipon ng Nacionalista Party sa Laurel House ni Sen. Manny Villar (ikalawa mula sa kanan) sa Mandaluyong City. (Raymund Villanueva)

Puwersa ng pagbabago sa halalang 2010

Pinoy Weekly Staff — Tue, 15 Dec 2009 18:24:52 +0000

Liza Maza at Satur Ocampo, matapos ang pagsumite ng kanilang certificates of candidacy sa Comelec. Kasama nila ang mga kinatawan ng mga progresibong party-list. Mula kaliwa: Rep. Mong Palatino ng Kabataan, Rep. Teddy Casino ng Bayan Muna, Rep. Rafael Mariano ng Anakpawis, sina Ocampo at Maza, Rep. Luz Ilagan ng Gabriela, Nelson Mallari ng Katribu, Connie Bragas-Regalado ng Migrante, (bahagyang natatakpan) Ferdinand Gaite ng Courage, at Frances Castro ng ACT Teachers. (KR Guda)

Ngayon pa lamang, inaasahang walang kasinggulo, walang kasing-kontrobersiyal ang halalan sa Mayo 2010.

Habang naghahanda ang Commission on Elections sa kauna-unahang automated elections sa ating kasaysayan, walang-tigil naman ang pihit ng mga puwersang pamulitika. Nagaganap ang mga ito nang nagulantang ang bansa ng karumaldumal na pamamaslang sa 57 katao sa Ampatuan, Maguindanao – tila nagsasabing heto na ang halalan. Heto na ang karahasan.

Samantala, naghahanda naman para sa 2010 ang puwersang pampulitika na matagal nang itinuturing na mga puwersa ng pagbabago sa lipunang Pilipino. Tagurian man silang Kaliwa, kilusang masa, o militante, isa sa natatanging magandang balita sa halalang 2010 ang aktibong paglahok nila sa halalan. Sa wakas, ayon sa ilang tagamasid, may malakas nang puwersa ng pagbabago na iinog sa darating na eleksiyon.

Kasado na ang pagtakbo sa pagkasenador ng dalawang matatayog na personahe sa militanteng oposisyon: sina Satur Ocampo at Liza Maza. Kasado na rin ang pagtakbo ng limang (walo sana, bago di-maipaliwanag na pinigilan ng Comelec) grupong party-list sa Kamara. Kasabay nito, nababalitaan din ang pakikipag-alyado ng progresibong mga puwersa sa isang kandidato sa pagkapangulo – sa unang pagkakataon sa kasaysayan ng Kaliwa.

Sen. Noynoy Aquino at Sen. Mar Roxas ng Liberal Party: Sinara ang pinto sa "Kaliwa." (Contributed Photo)

Negosasyon sa oposisyon

“Nakipag-usap tayo sa lahat ng kandidato ng oposisyon,” paliwanag ni Rep. Ocampo ng Bayan Muna.

Halos sabay-sabay na kinausap sina dating pangulong Joseph Estrada, Sen. Manny Villar, Sen. Jamby Madrigal, Sen. Chiz Escudero, at noo’y si Sen. Mar Roxas. Pati si Sen. Noynoy Aquino, nang nagdesisyon siyang tumakbo, ay sinikap na kausapin. Ang layunin: Ihapag sa kanila ang plataporma ng mga militante, alamin kung may puwang para sa posibleng pagtutulungan at pakikipag-alyansa, at alamin kung maaaring kunin sina Ocampo at Maza bilang guest candidates sa kanilang mga senatorial slate.

Ipinaliwanag din ni Ocampo na simula’t sapul ay hindi na opisyon ang mga kandidato ng administrasyon, tulad ni Gilbert Teodoro o Bayani Fernando. Malinaw ang dahilan: Pinakamasahol na kaaway ng mga mamamayan si Pang. Gloria Macapagal-Arroyo.

Sa pangunguna ng Makabayang Koalisyon ng Mamamayan (Makabayan), kinausap ng mga militante si

Joseph Estrada. Pinaliwanag sa kanya na hindi maaari siyang suportahan ng mga militante dahil napatalsik na siya noong Enero 2001 sa Edsa Dos. Mga militante rin ang panguna sa kampanyang pagpapatalsik kay Estrada.

Samantala, itinuturing ng Makabayan na malapit na alyado sa Senado sina Madrigal at Escudero. Si Madrigal, matagal na nakasama ng progresibong mga grupo sa mga isyu, mula sa pagbatikos kay Pang. Arroyo hanggang sa pagtutol sa Visiting Forces Agreement at kahit sa Japan-Philippines Economic Partnership Agreement (JPEPA). Gayundin si Escudero, na nanguna sa taunang pagsampa sa impeachment complaint labay kay Arroyo noong kasamahan pa lamang siya nina Ocampo at Maza sa Kamara.

Ngunit itinuring nilang “hindi seryosong” kandidato ang dalawa. Si Madrigal, hindi aktibong nagpahayag ng kanyang intensiyon sa halalang 2010, samantalang si Escudero naman, matagal na ipinagliban ang deklarasyon kung tatakbo o hindi, matapos kumalas sa Nationalist People’s Coalition. Hanggang sa inanunsiyo niya noong nakaraang buwan hindi na nga siya tatakbo.

Naiwan na lamang sina Villar at Roxas. At nang umatras si Roxas sa kandidatura niya sa pagkapangulo para maging bise presidente ni Aquino, kinausap din ang huli. Pero sa matagal na panaho’y tumangging makipag-usap sa mga militante si Aquino, ayon kay Ocampo. Masama umano ang loob ni Aquino sa “pag-uungkat” ng mga militante sa isyu ng paghangad ng hustisya para sa mga biktima ng masaker sa Hacienda Luisita.

Pero sagot naman ng mga militante, mahalagang isyu ang Luisita. “Ang isyu sa lupa, ang isyu ng distribusyon ng mga lupain ng Hacienda Luisita ay isyu ng panlipunang hustisya, isyu ng demokratikong karapatan ng mga magsasaka. Isa itong pambansang isyu,” sabi ni Anakpawis Rep. Rafael Mariano. Hindi umano maaaring iatras ng mga militante ang hangad para sa hustisya at makatarungang distribusyon ng lupa sa Luisita para lamang mapahupa ang sama-ng-loob ni Aquino.

Gayunman, sa tulong ni Quezon Rep. Erin Tanada ng Liberal Party, nakapag-usap ang mga kinatawan ng Makabayan at si Aquino noong Nobyembre. Sa pagpupulong, inilinaw ng mga militante na kaisa nito si Aquino sa oposisyon, sa kabila ng paninindigan ng mga militante sa Luisita. Hindi pa rin pumayag si Aquino sa pagpasok ng mga militante sa kanyang senatorial lineup.

Larawan: Partidong Makabayan, inendorso sina Villar, Legarda

Angelica Carballo — Tue, 15 Dec 2009 09:04:09 +0000

Pormal na inanunsiyo ng partidong Makabayan noong Dis. 14 ang pagsuporta kina Sen. Manny Villar at Sen. Loren Legarda para sa pagkapangulo at pangawalang pangulo sa halalan sa 2010. Inanunsiyo din ang pagsali nina Bayan Muna Rep. Ocampo at Gabriela Rep. Liza Maza bilang adopted candidates sa senatorial ticket ng Nacionalista Party. (Angelica Carballo)

Basahin ang kaugnay na istorya:

Puwersa ng pagbabago sa halalang 2010

Ang pinagkaiba ni Liza

Ilang-Ilang D. Quijano — Sun, 13 Dec 2009 19:09:22 +0000

Gabriela Rep. Liza Maza (Kuha ni Angelica Carballo)

Para sa babae, at para sa masa. Ito umano ang dahilan kung bakit dapat iluklok sa Senado si Liza Maza, matapos ang siyam na taong paninilbihan bilang kinatawan ng progresibong party-list na Gabriela. Kinapanayam ng Pinoy Weekly si Maza para alamin ang bagong larangan ng pakikibaka na kanyang pinasok hanggang sa 2010.

Bakit kayo tatakbo sa Senado?

‘Yung progressive party-lists ay nagbuklod at binuo itong Makabayan para magkaroon pa ng mas malawak na boses ang marginalized sectors ng lipunan. Kaya magpapatakbo ang Makabayan o di kaya’y susuporta ng mga kandidato sa Senado at iba pang antas ng elective office. Kumbaga hindi na lamang malilimita sa party-list ’yung representasyon. Gayundin, siyempre ang Senado mas higher office ’yon. Kasi sa Kongreso, numerically, talagang kung walo lang kayo, o dalawa lang kayo, o isa ka lang, talagang maliit. Kumpara kung isa kayo o dalawa doon sa Senado, given na 24 lang yung mga senador, siyempre ‘yung bigat ng boses mo mas matimbang doon. Doon sa pagtakbo ng Makabayan, nilalayon na magkaroon ng pagbabago doon sa pulitika. Alam natin na kapag panahon ng kampanya, panahon ito kung saan naghahapag ka ng pagtingin sa mga problema ng bansa, at ng mga programa para makaalpas sa matatagal nang problemang iyan. Mayroong programa ang Makabayan na sumasaklaw sa mga usaping pang-ekonomiya, pampulitika, pangkultura, mabuting paggogobyerno, at foreign policy. Ito ‘yung malinaw na agenda: agenda ng pagbabago sa pulitika ng ating bansa.

‘Yun ba ang pangunahin ninyong ikinakampanya, ang inyong programa, at hindi ang inyong personalidad?

Hindi mo puwedeng ipaghiwalay yung programa at prinsipyo doon sa tao eh. Kaya bagamat tatakbo kami na may malinaw na adbokasiya at programang ihahapag sa taumbayan, dapat titingnan din natin ’yung kredibilidad ng mga naghahapag ng programa at adbokasiyang iyan. Hindi dapat na magkahiwalay, kung ano ang adbokasiya mo at kung sino ka. Kaya inihahapag din namin ang sarili namin na husgahan ng taumbayan bilang kami. Kasi dapat, kung anuman yung prinsipyo ng mahusay na paggogobyerno dapat isinasabuhay namin yon, sa personal na buhay namin at bilang mga tao. Dapat talaga hindi kami nangungurakot at may integridad, hindi nagpayaman sa puwesto, at isinasabuhay ang mga prinsipyo. Halimbawa, dapat simple ang iyong pamumuhay, katulad ng nakararami. Ako kongresista for nine years, I think that’s the life that I have led is much of the same life that I have led as an activist.

Ano ang pinakamahalaga ninyong natutunan sa 9 na taon sa Kongreso at paano ito magagamit sa Senado kung sakaling makaupo?

Natutunan ko na tama ’yung mga isinisigaw ko at binabatikos ko noong wala pa ako sa Mababang Kapulungan. Kung nandito ka sa loob, nakikita mo kung gaano kabulok yung pulitika at ang ating gobyerno. At ito ay mas nagpapatibay sa paniniwala kong kailangan natin ng pagbabago, ng pagbaligtad sa mga polisiya na matagal nang ipinapatupad. Halimbawa, mayroon na naman tayong mga batas na naipasa. Itong Anti-Trafficking in Persons Act, isa ako sa co-sponsors niyan. Dahil naipasa natin ang batas na ito, kinilala na isang krimen ang pag-traffic sa kababaihan at bata. Pero kung titingnan natin, hindi talaga nagkaroon ng makabuluhang pagbabago doon sa problema ng malawak na trafficking, kasi it takes more than just having a law to address our long-standing problem. Pero kinikilala ko pa rin na kinakailangan ng ganoong klase ng reporma. Kasi ito ang unang hakbang para makilala ng malawak na mga mamamayan kung ano ang katanggap-tanggap at hindi katanggap-tanggap sa lipunan natin. Tapos mahalaga rin ’yung tulong sa masa na maunawaan nila kung ano ang nangyayari sa Kongreso, kung ano ba ang polisiyang dala-dala ng isinusulong na mga batas, halimbawa ng administrasyon. Nabubulgar at napapag-aralan ng iba’t ibang grupo, at nalalaman ang karampatang tugon in terms of lobbying, in terms of pressure politics, para mapigilan ang pagpapasa ng mga batas na laban sa interes ng mga mamamayan.

Kamusta ang pagtanggap sa inyo sa pag-iikot ninyo sa bansa?

Positibo ang response kasi alam nila kung anong pulitika ang dala natin, kung ano yung ating naging trabaho bilang kongresista ng bayan. Gusto rin talaga ng taumbayan ng pagbabago, sawang-sawa na rin sila sa status quo politics, at sila mismo ay tumitingin kung sino ang nagibigigay ng ibang solusyon. At definitely napakabaho talaga ng administration kaya napaka-positibo ng patanggap nila sa oposisyon. Malaki ang provincial conventions, laging higit sa 1,000 katao ang dumadalo. Very inspiring na makita mo yung support ng tao, at maging ng mga opisyal sa LGUs na tatakbo—bukas silang sumanib o sumuporta sa mga kandidato ng Makabayan. Dahil mainit ang pagtanggap nila, palagay ko tataba ako, kasi lagi nila akong pinapakain. (Tawa) Marami ring lumalapit na kababaihan, yung binubugbog o inabandona, para idulog ang kanilang problema. Nakakatuwa naman na kinikilala nilang makakatulong kami sa kanila, personal man o pulitikal yung kanilang problema.

Saan magmumula ‘yung lakas ng inyong kampanya kung ikokonsidera na hindi ganoon kalaki ang inyong makinarya gaya ng mga mainstream na political parties?

Mayroon naman kaming mass base, yung mga miyembro ng party-lists na bumubuo ng Makabayan, iyon ‘yung core na magkakampanya. And then you also have volunteers. Definitely we don’t have funds like the other candidates, pero ang aming bentahe, mayroon kaming organized mass base at volunteers.

Bukas pa rin kayo sa pakikipagkoalisyon o pag-e-endorso ng mga kandidato mula sa mainstream political parties. Bakit?

Gusto rin naming palawakin yung mga tagasuporta ng adbokasiya at programa ng Makabayan, kaya bukas kami na makipagkoalisyon sa mainstream parties, in terms of ‘yung programa at suportahan sa eleksiyon and beyond. Ang gusto namin, patuloy na ipapatupad ng sinuportahan namin, kung siya ay mauupo, ‘yung mga pinagkasunduan na plataporma. Hindi namin bibitawan ‘yung prinsipyo at laban na sinimulan na namin. Sa pag-eendorso o pakikipagkoalisyon, dapat mayroong mapagkakasunduan na batayan o basis of unity.

Handa ba kayong pumasok sa tradisyunal na pangangampanya?

Kami sa Team Maza, nag-iisip talaga ng non-traditional campaign styles, ano ba yung mga porma na kabisado na natin, na puwedeng i-integrate sa traditional campaigning. At the same time, kailangan naming kilalanin that at the end of the day, we have to have votes. So maybe we have to also take in traditional campaign styles. Pero kami hindi magpapakasapat sa ganoong porma, nag-iisip kami ng pagbabago sa porma ng pangangampanya. We will try to maximize our supporters, kaya at this moment, at very minimal expense, we are able to come a long way. Siguro kumpara doon sa traditional politicians, na by this time, siguro tens of millions of pesos na ang nagagastos sa advertisements pa lang. Kami, halos wala pang nagagastos pero malayo na ang narrating natin sa pamamagitan ng pagmobilisa ng volunteers na payag mag-ambag ng kanilang mga ideya at tulong nang libre dahil naniniwala sila sa aming adbokasiya, at paraan nila iyon para makapag-ambag doon sa klase ng pagbabago sa pulitika na gusto namin.

Kapag nanalo ka, ano yung unang tatlong bagay na gagawin mo sa Senado?

Itutulak ko yung P125 wage increase. Tapos ifa-file namin sigurado ’yung Genuine Agrarian Reform Bill. Sa kababaihan, isusulong ko talaga ’yung Reproductive Rights Act. These are all cutting edge bills, talagang sumasalpok sa traditional politics. Pero I will dare it. Tapos ’yung paglaban sa debt servicing, mahalaga iyon. Kasi laging sinasabi na ipaprayoritisa ang kalusugan at edukasyon, pero kung hindi ka talaga poposisyon laban sa debt servicing, magiging balewala yung panawagan dahil kinakain ng ating pambayad-utang ang 30% ng badyet. Tapos siyempre ’yung local industries, kailangan paunlarin. At saka yung pag-repeal o pag-amend ng mga batas na discriminatory sa kababaihan, magpopokus ako doon.

Ano ang pinakaabangan ninyo sa darating na panahon hanggang sa eleksiyon sa 2010?

I love campaigning. Maybe campaign for me is of equal value doon sa legislative work because that’s’ the time when you really in such a short period, you get in touch with everyone, all walks of life. You get the situation first hand in such a short time. ’Yun ang gusto ko sa pangangampanya, kasi talagang nalalaman ko ’yung sitwasyon sa ibaba, at para sa akin mahalaga yun para maging epektibong mambabatas o epektibong aktibista. So I look forward to that. Kasi hindi lang yan pagkamay, kundi diskusyon, tapos nakakaharap mo talaga yung mga tao sa iba’t ibang uri saka sa iba’t ibang probinsiya at rehiyon. You get to discuss your advocacies to them first-hand. Siyempre, sa Gabriela Women’s Party ganun ’yung porma. Ngayon, mas pangalan mo yung ikinakampanya. Sa palagay ko, magiging challenging na hindi maging katulad ng kalakaaran sa traditional politics na personality-centered o idinadaan sa kaway o ngiti o kung gaano ka kagaling kumanta. ‘Yung gusto naming gawin sa Team Maza, kung papaano namin pauunlarin ang pagpapakete sa aming mensahe at adbokasiya.