Dalawampung panandang-bato sa bagong milenyo

Taong 2000 hanggang 2009: Isang taong paglaban kay Estrada, siyam na taong paglaban kay Arroyo.

May mga nagsasabing hindi pa naman daw tapos ang dekada. Sa taong 2011 pa. Pero sampung taon na mula noong nagbilang tayo ng sandali sa pagpasok ng bagong milyeno. Sampung taon mula nang salubungin natin ang taong 2000 na puno ng pag-asa at pag-aasam sa hinaharap.

Sa loob ng dekadang ito, di mabilang na kaganapan ang yumanig sa ating kalagayan, sa kinamumuhiang namamayaning kaayusan, sa ating pagkabansa. Ibayong gutom, pagsasamantala, karahasan ang naranasan ng dati nang aping sambayanan. Pero ibayong paglaban, pagpupumiglas, pakikitunggali naman ang isinagot natin.

Ipinakita ng unang dekada ng bagong milenyo na hindi pa nawawalan ng pag-asa ang sambayanang Pilipino sa kabila ng kalagayan nito. May iba’t ibang signos na may malaking pagbabagong magaganap sa hinaharap. Hindi man ito sa susunod na taon, o kahit sa susunod na dekada, narararamdaman na natin ang pagbabago. Napasisimulan na natin ang pagbangon. Natatanaw na natin ang bukas.

Inihanay ng istap ng Pinoy Weekly ang dalawampung pinaka-malalaking kaganapan ngayong huling sampung taon ng bagong milenyo. Pinili namin ang 20 sang-ayon sa impact ng kaganapang ito sa pakikibaka ng mga mamamayan para sa ganap na pagbabago sa bagong milenyo. Ang lista ay ayon sa pagkakasunud-sunod ng mga pangyayari.

******************

Impeachment Trial ni Joseph Estrada at Edsa Dos (2000-2001)

Edsa Dos, Enero 20, 2001 (Boy Bagwis / PW File Photo)

Ito ang pinaka-kongkretong patunay ng kapangyarihan ng sama-samang pagkilos sa lansangan: Isang popular na pangulo ang napatalsik sa puwesto dahil sa lantad na pangungurakot at panunuhol. Magmula nang idaos ang impeachment trial ni Pang. Joseph Estrada noong huling kuwarto ng 2000, hindi tinantanan ng protesta ang pangulo. Naging pagkakataon din ito para masilip ng publiko ang mga pamamaraang tila institusyonalisado na sa burukrasya ng Estado: ang panunuhol, aregluhan, pagtulak ng ilegal at nakapanliligalig na bisyo, at pangungurakot.

Madaling napagkaisa ang panggitnang uri, simbahang Katoliko at ang tradisyunal na oposisyon. Pero pinakamalapad pa rin ang hanay ng militanteng kilusang masa, laluna ng mga manggagawa at kabataang lumabas sa kanilang mga pagawaan at pamantasan para tumungo sa kalsada. At sa loob ng limang araw ng walang tigil na buhos ng mga mamamayan sa harap ng Edsa Shrine noong Enero 2001, napuwersa si Estrada na umalis sa Palasyo.

May mga nagsasabing malaking pagkakamali ang Edsa Dos kung isasaalang-alang ang naging rekord ng pumalit kay Estrada na si Gloria Arroyo. Pero may makakasiguro bang hindi mangyayari ang pandarahas, pandaraya at korupsiyon kung ibang presidente ang pumalit? Sa kasalukuyang sistemang mistulang natural na nangyayari ang mga ito?

1 2 3 4 5 6 7 8 9 10 11 12 13 14 15 16 17 18 19 20

Short URL: http://pinoyweekly.org/new/?p=5590

Posted by Pinoy Weekly Staff on Jan 9 2010. Filed under Istorya ng Linggo, Lathalain. You can follow any responses to this entry through the RSS 2.0. You can leave a response or trackback to this entry