Bakit hindi maugong ang kamatayan ni Conrad Poe?

Hindi kataka-taka na walang pumansin sa kamatayan ni Conrad Poe, ang aktor na nagbida sa maraming pelikula bukod sa pagiging kapatid sa ama ni Fernando Poe, Jr.

Walang kaalam-alam sina Butch Francisco, Lolit Solis, Cristy Fermin, Rey Pumaloy, Kris Aquino, KC Concepcion, Ricky Lo, Pia Guanio, John Lapus, Rufa Mae Quinto, Ruffa Gutierrez, Pete Ampoloquio, Jr., Raymond Gutierrez, Dolly Anne Carvajal at iba pang TV at radio host na namatay na si Conrad.

Pero kung si Mary Grace Poe ang may masamang nangyari o kaya ay si Susan Roces ang may trahedya, hindi maaaring hindi makarating agad sa mga peryodistang pampelikula ang ulat na ito.

Bakit kung gayon walang ugong ang kamatayan ni Conrad samantalang siya ay artista at bituin din?

***

Dahil si Conrad Poe ay kapatid lang ni FPJ.

Kapatid na bunso lang.

Kapatid pa sa labas dahil ang kanyang ina ay iba, ang batikang aktres na si Patricia Mijares na nakatambal ni Fernando Poe, Sr. kaya nagkaroon sila ng relasyon ng ama ni FPJ.

Kay FPJ kasi nakasentro ang atensyon ng publiko, siya ang pinaboran nang mas mainit, mas lamang, kaysa sa kanyang mga kapatid.

Kahit na nga ang namayapa ring si Andy Poe, ang tunay na Fernando Por, Jr. ay hindi rin nakapantay sa kasikatan ni FPJ.

May ibang panghalina si FPJ na wala sa kanyang kapatid at maging sa kanyang kapatid sa ama na si Conrad.

Para rin sa mga nangyari sa kasaysayan ng pelikulang Filipino kung saan ay hindi kapantay ng kasikatan ni Susan ang katanyagan ni Rosemarie Sonora o kaya ay hindi kaparis ng kasikatan ni Gretchen Barretto ang katanyagan nina Claudine at Marjorie Barretto bagamat nakakapagsolo si Claudine pero ang kamisteryuhan ng pagkatao ni Gretchen ay wala sa persona ni Claudine.

Hindi man lang narating ni Kier Legaspi ang pagkabida ni Zoren Legaspi o kahit ang pagsisimula ni Brando Legaspi ay hindi nakaariba para makapantay man lang kay Zoren.

***

Gayundin, hindi pa man umapailanglang ang bituin ni Woody Cruz ay namatay agad siya at patuloy namang pumaimbulog ang bituin ni Tirso Cruz III.

Noon ay nanguna si William Martinez sa kanyang utol na si Albert Martinez pero pagkatapos ng ilang taon, nabaligtad ang pangyayari dahil naging mas mabili si Albert kaysa kay William.

Pati si Bing Loyzaga ay makapagsasabing hindi man lang nakasabay sa kanyang kasikatan si Teresa Loyzaga.

At si Kathleen Hermosa, hindi man lang nangalahati sa paglalakbay sa pagkabituin sa pagpalaot ni Kristine Hermosa sa showbiz.

Kahit na si Gabby Eigenmann ay parang nawawala sa pakikibaka kasabay ang mga kapatid sa ama na sina Sid Lucero at Andi Eigenmann.

Pati na sa kaningningan ay nananatiling bunso si Alex Gonzaga sa kanyang ateng si Toni Gonzaga.

At si Ricky Davao, milya-milya ang layo sa kanyang mga kapatid na sina Bing at Charlon Davao.

Nananatiling nasa supporting role si Daisy Romualdez sa Sampaguita Pictures noon kaysa sa kanyang kapatid na bunsong si Blanca Gomez na nagbibida bilang kasapi sa Stars ’66 ng Sampaguita-VP Pictures kasama sina Pepito Rodriguez, Rosemarie, Gina Pareño, Edgar Salcedo, Loretta Marquez, Bert Leroy, Jr., Dindo Fernando, Ramil Rodriguez at Shirley Moreno.

Marami pang istorya ng magkakaputol ng pusod na malalayo ang agwat ng popularidad sa isa’t isa.

***

Pero popularidad lang naman ‘yan.

Kahit na may karibalan o kaagaw sa kasikatan at paninibugho sa kapropesyon, mas matimbang ang dugo kaysa tubig, sa kalaunan.

Dahil ang pamilya ang isa sa mga puso at pusod ng tunay na kasikatan ng isang tao sa kanyang mga mahal sa buhay sa likod ng kamera.

At ito ang katotohanan sa buhay ni Conrad.

Kahit na siya ay bida rin sa maraming pelikula, mas maraming tagasubaybay si FPJ.

Pero sa loob ng angkan ng Poe, pantay lang sina Conrad at Fernando kahit na magkapatid sila sa labas.

Dahil ayon kay Conrad nang siya’y nabubuhay pa, nagkukuwento siya tahanan ng bagong mang-aawit na si Dexter Encarnado, na nang mamatay si Fernando Poe, Sr., ipinahanap agad ng mga lehitimong anak nina FP, Senior at Bessie Kelley Poe si Conrad at ipinisan na sa mga Poe sa Del Monte.

Hanggang ngayon, bago mamatay si Conrad, siya pa rin ang namamahala, s autos ni Roces, ng FPJ Productions.

Tanggap na tanggap ni FPJ na parang tunay at kumpletong kapatid si Conrad.

***

Kaya lang nga ay hindi taglay ni Conrad ang mga katangiang panghalina sa mas nakararaming Filipino ni FPJ.

Ang merkado ni Conrad ay hindi lumawak.

Pero sa pamamagitan ni FPJ, sa personal na lebel, ang merkado ni FPJ ay merkado at tagatangkilik din ni Conrad sa ibang gawain na umaayuda sa panganay na kapatid kaya ang ang mga tagahanga ni FPJ ay fans din niya sa abot ng kanilang makakaya.

Iniaangkas nila si Conrad sa pagmamahal kay FPJ.

Naipit na kasi si Conrad sa imahen ng pagiging kontrabida o character actor dahil sa kanyang hitsura at pagdadala sa sarili.

Nakipagbarkada pa si Conrad sa mga ekstra at kontrabida kaya nahanay na rin siya sa mga ito kaya ang tingin sa kanya ng tao at publiko ay kontrabida na rin sa pelikula.

Pinabayaan lang kasi n Conrad na si FPJ ang pumapel at nasa likod lang siya ng kapangyarihan na siya naman niyang pinapelan at sa kalaunan ay nagustuhan na rin pero kung bibigyan sana ng isa pang pagkakataon ay nais din niyang may sarili siyang identidad at nangunguna rin sa labanan sa pagkahari ng pelikula pero marami pang babaguhin si Conrad.

At sa estado ng kanyang buhay bago siya pumanaw, marami at susun-suson na ang kanyang kailangang bakahin para makamtan ang inaasam-asam na pagiging hiwalay sa anino ni FPJ.

***

Alam ba ninyo na noong Biyernes ng madaling araw ay nagkita pa sina Conrad at ang kanyang common-law wife na si Zeny Poe?

Nasa FPJ Studio noon si Conrad at nag-aasikaso ng mga produksyon ng kumpanya at iba pang opisyo na may kaugnayan sa pelikulang kaugnay sa FPJ Productions.

Ayon kay Zeny, disin sana’y silang mag-asawa ang pupunta sa Nueva Ecija para magninong at magninang sa isang kasal doon pero ang pinapunta na lang ng aktor ay ang kanyang misis.

“Basta ang sabi lang niya ay ako na lang ang mag-anak sa kasal. Pero ang ipinagtataka ko, yakap siya nang yakap sa akin. Halik nang halik. Sabi, ‘heart, ingat ka. Take care of yourself.’ Tapos, hahalik na naman siya sa akin. Tapos, yayakap siya nang mahigpit akin.

“Bawat minuto, bago ako umalis, yakap siya nang yakap. Balik siya nang balik sa akin bago ako sumakay sa kotse bago kami tumuloy sa Nueva Ecija,” sabi ni Zeny, hilam na hilam ang mga mata sa luha.

***

Sabado ng umaga nang tawagan si Zeny ng isang character actor na kaibigan ni Conrad, si Rey Roldan.

Hindi makapaniwala si Zeny sa kanyang narinig.

Gusto niyang sabihing nagsisinungaling lang si Rey.

Pero tunay ang ulat na ibinalita ni Roldan.

Nais maglupasay ni Zeny pero kinontrol niya ang kanyang sarili.

Bastat lumuha lang siya nang lumuha at nagpahatid na sa kanyang tsuper sa Maynila.

Hindi na nakadiretso sa Meycauayan, Bulacan si Zeny kung saan nakatira si Conrad.

Doon din binawian ng buhay ang batikang aktor dahil sa sakit sa puso.

Dumiretso na si Zeny sa Arligton Memorial Chapels sa Araneta Avenue kung saan ngayon nakalagak ang mga labi ng bituin.

Short URL: http://pinoyweekly.org/new/?p=7958

Posted by Boy Villasanta on Jun 29 2010. Filed under Showbiz. You can follow any responses to this entry through the RSS 2.0. You can leave a response or trackback to this entry