Sumugod sa pamamagitan ng raling-iglap ang mga miyembro ng Anakbayan-National Capital Region (NCR) at #StrikeTheHike Network ang Gate 7 ng Malakanyang para direktang isisi sa pamahalaang Aquino ang anila’y walang tigil na taas-bayarin ng batayang mga bilihin at serbisyo sa bansa.

Itinaon ng mga nasabing grupo ang protestang ito isang araw bago magkaroon muli ng oral argument ang Korte Suprema kaugnay ng P4.15 kada kilowatt hour na dagdag-singil ng Manila Electric Company (Meralco).

Wala umanong ginagawa ang administrasyon ni Noynoy Aquino para pigilan ang pagtataas ng iba’t ibang produkto at utilidad tulad ng kuryente, tubig, langis, LPG, LRT/MRT, Philhealth, SSS, pagkain, at matrikula sa tatlong taong pamumuno nito.

“Malinaw na hindi sinsero si Pangulong Aquino at walang kakayahang makinig sa hinaing ng mga mamamayan para ibaba ang presyo ng mga batayang bilihin at serbisyo,” ayon kay Dianne Marie Solmayor, pangkalahatang kalihim ng Anakbayan-NCR at tagapagsalita ng #StrikeTheHike Network.

Ayon sa nasabing mga grupo, mas maraming mga protesta ang haharapin ni Pangulong Aquino dahil mananawagan sila hindi na lamang ng pagbababa ng halaga ng bilihin, kundi pagpapatalsik sa kanya sa puwesto.

“Habang walang ginagawa si BS Aquino para maibsan ang pasanin ng mga mamamayan, magiging mas mainam kung umalis na lamang siya sa puwesto sa pinakamadaling panahon,” ayon kay Solmayor.

Nakatakdang magsagawa ng pagkilos ang mga nasabing grupo sa oral arguments sa Korte Suprema sa Pebrero 11 at 18. Kaugnay nito, isang malawakang protesta din ang kanilang isasagawa sa Pebrero 17 na tinagurian nilang “Kalampagin ang Malakanyang.”