Hindi naikukulong ang mga ipinaglalaban ng mga bilanggong pulitikal.

Ganito ang mensaheng ipinararating ng mga nakiisa sa Pandaidigang Araw ng Pakikiisa sa mga Bilanggong Pulitikal nitong ika-3 ng Disyembre sa Department of Justice at Mendiola sa Maynila.

“Kahit nasa loob ng kulungan ang mga bilanggong pulitikal, hindi sila napapatahimik. Bigo ang Oplan Bayanihan. Sa iba’t ibang kulungan sa buong bansa, nagpapatuloy ang pag-oorganisa ng mga bilanggong pulitikal hindi lamang para sa kanilang sariling kalayaan, kundi para sa mga nasa labas ng kulungan,” ani Cristina Palabay, pangkalahatang kalihim ng Karapatan.

Nasa 561 ang bilang ng bilanggong pulitikal sa Pilipinas, 304 dito ang sa ilalim ng administrasyong Aquino, at 19 ang consultants ng National Democratic Front of the Philippines sa usaping pangkapayapaan, ayon sa Karapatan, organisasyong nagsusulong ng karapatang-pantao.

Double Standard

Ayon sa naturang grupo, malinaw ang pagkakaroon ng double standard ng hustisya sa Pilipinas kung paghahambingin ang kalagayan ng mga bilanggong pulitikal sa nangyari kay US Marine Lance Corp. Joseph Scott Pemberton na hinatulang maysala pagpatay sa Pilipinong transgender na si Jennifer Laude noong nakaraang taon.

Kung sinasampahan ng gawa-gawang mga kaso ang mga bilanggong pulitikal na pawang nakikipaglaban sa mga batayang karapatan ng mga mamamayan at nakukulong sa hindi makataong kondisyon, espesyal naman kung itrato ng gobyerno ang katulad nina dating heneral Jovito Palparan at Pemberton na pumatay sa kapwa Pilipino, sabi ni Joms Salvador, pangkalahatang kalihim ng Gabriela.

“Ayaw nating magpatuloy ang ganitong klaseng ng paglabag sa karapatang pantao lalo na ng mga kababaihan kagaya ni Sharon Cabusao, Miradel Torres, at iba pa na ilang taon nang nakapiit sa mga gawa-gawang kaso at pinagkakaitan ng hustisya ng pamahalaan ni Aquino,” ayon kay Salvador.

Ganito rin ang tindig ni Ferdie Gaite, pambansang pangulo ng Confederation for Unity, Recognition and Advancement of Government Employees, organisasyon ng mga empleyado ng gobyerno. Tatlong taon na rin kasi mula ng dukutin sina Randy Vegas at Raul Camposano at kasalukuyang nakakulong sa Daet, Camarines Norte.

Kinasuhan sina Vegas at Camposano ng murder at pagnanakaw sa naganap na encounter ng militar at mga miyembro ng New People’s Army sa nasabing probinsya.

“Yung takbo ng kaso ay nakakadismaya. Ilang beses nang nade-delay ang hearing sa iba’t ibang kadahilanan,” ayon kay Gaite.

Pagpapatuloy na laban

Nagpapatuloy ang panunupil at pagpapahirap sa mga mamamayan. Nagpapatuloy din ang pangingibabaw ng interes ng iilan at dayuhan sa ating bansa. Ito ang mga kondisyon na nag-anak ng mga tagapagtanggol ng karapatang pantao gaya ng mga bilanggong politikal.

“Malinaw na hindi naitigil ng Oplan Bayanihan at ng mga kulungan ang paglaban ng mga bilanggong politikal. Nagpapatuloy silang mag-organisa, magsulat, magkapagbigay ng mensahe, kahit sa mga pinakamasahol na kondisyon sa kulungan,” pagtatapos ni Palabay.