Sa patuloy na pagtaas ng presyo ng mga bilihin, pamasahe at iba pang gastusin habang hindi naman tumataas ang sahod ng ordinaryong manggagawa, paano nga ba tayo makakatipid pagdating sa ating konsumo at bayarin sa tubig lalo ngayong tag-init?

Naglista kami ng ilang mga simpleng tip na maaari ninyong sundan.

1. Maging wais sa paglalaba. Minsanang labhan ang mga damit upang makatipid sa tubig. Huwag hayaang umaapaw ang tubig habang nagbabanlaw at huwag ding itapon ang pinagbanlawan. Ipunin sa isang drum ang pinagbanlawan ng damit at maaari itong gamitin pangbuhos sa kasilyas.
2. Suriin kung may mga tumatagas na tubo. Ang isang maliit na patak mula sa gripo ay maaaring mag-aksaya ng ilang galon na tubig kaya naman dapat lamang na siguraduhing walang tumutulo na gripo o tumatagas na tubo sa daanan ng tubig.
3. Ipunin ang tubig ulan. Pwede itong magamit pandilig ng mga halaman, panlinis sa bahay at pambuhos sa kasilyas.
4. Gumamit ng plangganita sa pagbabanlaw ng mga kubyertos. Tanggalin muna ang mga tirang pagkain upang mapadali ang paghuhugas. Huwag hayaang nakabukas ang gripo sa pagbabanlaw ng mga plato, kutsara o baso upang makatipid. Gawin din ito sa paghuhugas ng mga gulay at prutas sa halip na tuloy-tuloy na tubig mula sa gripo.
5. Magdilig ng mga halaman bago sumikat ang araw. Mainam ang pagdidilig bago sumikat ang araw upang makabawas sa water loss na dulot ng pag-evaporate ng tubig kung nakasikat na ang araw. Bukod pa rito, maiiwasan din ang pagtubo ng mga fungus na maaaring magdulot ng sakit sa halaman.

Maging responsable tayo sa paggamit ng tubig. Bukod sa matitipid natin na gastos sa binabayaran kada buwan, makakatulong din tayo sa enerhiyang pinagkukunan ng tubig sa pangkalahatan.