Nakopo ni Django Bustamante ang kampeonato sa kakatapos na 2010 World Pool Championships (World 9-Ball) na ginanap sa Doha, Qatar.

Natapos kahapon ang mahabang pakikipaglaban ng 16 na mga pinoy na nakaabot sa round-of-64 knockout stage, na kinabibiliangan nina Bustamante, Efren “Bata” Reyes, Lee Van Corteza, Jeffrey De Luna, Antonio Gabica, Dennis Orcollo, Ronnie Alcano, Antonio Lining, Venancio Tanio, Allan Cuartero, Francisco Felisilda, Raymund Faraon, Oliver Medenilla, Israel Rota, Marlon Manalo, at Joven Alba.

Sa huli, nakaduwelo ni Bustamante ang Taiwanese na si “The Little” Monster” Kuo Po-cheng at namayagpag rito, 13-7. Bago ito, ginapi ni Bustamante si Lining habang itinumba ni Kuo si Johnny Archer ng US sa semifinals. Iniuwi ng kampeon ang $36,000 na premyo, habang si Kuo ay nag-uwi ng $18,000. Kapwa tig-$10,000 sina Archer at Lining.

“Salamat sa Diyos ito na lang ang missing sa career ni Django,” saad ng amahin ng Philippine Billiards na si Aristeo “Putch” Puyat of Puyat Sports. Totoo, dahil napakahabang panahon at hirap ang dinanas ni Bustamante upang makuha ang kampeonato.

Umabot siya sa World Pool Championships final noong 2002 sa Cardiff, Wales, ngunit yumuko siya kay Earl “The Pearl” Strickland ng US. Sa gitna ng torneong iyon, nakatanggap siya ng tawag na sumakabilang-buhay ang kanyang anak na babae na noo’y wala pang isang taon. Inisip niyang hindi na ituloy ang torneo ngunit nakumbinsi siya ng kanyang asawa na magpatuloy sa paglalaro dahil ito marahil ang gugustuhin ng kanyang sumakabilang-buhay na anak.

Sa laban na iyon, lumamang pa si Bustamante 15-13, ngunit nalusutan siya ni Strickland at natapos ang kanilang duwelo sa 17-15.

Ang WPA World 9-ball ay ikaapat na kampeonato ni Bustamante. Miyembro siya sa Team Asia na tumalo sa Team Europe noong Enero 17 sa Asia vs Europe Challenge Match. Tinalo niya si “Bata” Reyes sa 23rd Annual Japan Open — Open Division noong Marso. Iniuwi rin niya ang kaunaunahang World Professional Billiard League (WPBL) championship sa Winnipeg Canada nitong Hunyo lamang.

Samantala, ilang Pilipino rin ang nakapasok sa Round of 16 at nakapag-uwi ng papremyo.

Ang listahan ng 2010 World Pool Championships (World 9-Ball) Top 16 na nag-uwi ng papremyo:

Francisco Bustamante (Philippines) – $36,000 Kuo Po-cheng (Chinese Taipei) – $18,000 Antonio Lining (Philippines) – $10,000 Johnny Archer (USA) – $10,000 Ronato Alcano (Philippines) – $6,000 Sandor Tot (Serbia) – $6,000 Oliver Medenilla (Philippines) – $6,000 Francisco Felicilda (Philippines) – $6,000 Craig Osborne (Great Britain) – $4,000 Christian Reimering (Germany) – $4,000 Dimitri Jungo (Switzerland) – $4,000 Yang Ching-shun (Chinese Taipei) – $4,000 Marlon Manalo (Philippines) – $4,000 Jason Klatt (Canada) – $4,000 Hayato Hijikata (Japan) – $4,000 Raymond Faraon (Philippines) – $4,000