Pitong lider-magsasaka ang inaresto matapos nila tangkaing pigilan ang pagbabakod ng pulisya sa kanilang lupain sa Camp Gregg Military Reservation, Bayambang, Pangasinan.

Ayon sa ulat ng Alyansa ng mga Magbubukid sa Gitnang Luson (AMGL) at Kilusang Magbubukid ng Pilipinas-Pangasinan, noong nakaraang linggo pa pinipigilan ng mga magsasaka ang pagtatayo ng kongkretong mga bakod. Iniutos umano ang pagbabakod ni Pangasinan Gob. Amado Espino, na napapabalitang nais magtayo ng pribadong resort sa bahaging iyon ng reserbasyon.

Deklarado ng Department of Environment and Natural Resources (DENR) na pampublikong lupain ang 289.54-ektaryang Camp Gregg Military Reservation. Ilang dekada na itong binubungkal ng mga magsasaka, at ipinaglalabang mapasakanila.

Bandang alas-onse ng umaga noong Enero 13 sa Brgy. Bical Sur, nakikipagnegosasyon sa pulisya ang mga magsasaka nang biglang sabihin ng pulisya na may armadong kalalakihan umano sa hanay ng mga magsasaka. Hindi nahuli ang sinasabi nitong “armado.” Sa halip, inaresto ang mga magsasaka na sina Rodolfo Natividad, Emeterio Paningbatan, Felipe Caron, Bernardito Dizon, Rudy Peralta, Rodrigo Asuncion at Ludivico Mejia, mga lider ng lokal na organisasyong Ulopan Na Umbaley Ed Camp Gregg Military Reservation.

Bandang ala-sais ng gabi, pinakawalan ng pulisya ang apat na magsasaka, pero patuloy na ikinulong sa lokal na istasyon sina Paningbatan, Dizon and Mejia at sinampahan ng kasong attempted murder. Naninindigan ang mga magsasaka na mapayapa nilang hinaharang ang pagbabakod at walang dalang anumang armas.

“Nananawagan kami ng kagyat na pagpapalaya sa inosenteng mga magsasaka. Binabalaan namin si Gobernador Espino: kapag itinuloy niya ang kanyang pangangamkam sa lupa, sisiguruhin ng mga magsasaka na magtatapos ang kanyang pampulitikang ambisyon sa 2013,” ayon kay Joseph Canlas, tagapangulo ng AMGL.

Dagdag pa ni Canlas, ilegal na claimant ang sinumang nagnanais angkinin ang Camp Gregg Military Reservation, na isang pampublikong lupaing ibinalik ng gobyerno ng Amerikano sa Bureau of Lands noong 1949.

Inaangkin din umano ang reserbasyon ng Central Azucarera de Tarlac Realty Corp., na pagmamay-ari ng pamilya Cojuangco-Aquino. Pinaghihinalaan ng mga magsasaka na mga ispekulador para sa pamilya Cojuangco-Aquino ang iba pang pribadong mga indibidwal na umaangkin sa lupa.