Editoryal

New Abnormal


Higit na tumindi at naging mas litaw ang kahirapan, kagutuman, kawalan ng hustisya – pawang mga pundamental na suliranin sa bansa – sa loob lamang ng ilang buwan na pagharap ng gobyerno sa pandemyang ito.

Unti-unti nang lumuwag ang lockdown mula nang ipatupad ang General Community Quarantine at ang modified na bersiyon nito sa kalakhan ng mga rehiyon sa bansa noong unang linggo ng Hunyo. Binuksan na ito ng gobyerno sa kabila nang lagpas 20,000 na ang kaso ng coronavirus disease 2019 (Covid-19) at naglalaro sa 300 ang arawang insidente ng mga kaso sa bansa.

Matapos ang tatlong buwan ng lockdown, tumampok ang naging kriminal na kapabayaan ng administrasyong Duterte. Sa kabila ng paggawad ng emergency powers kay Pangulong Duterte noong huling linggo ng Marso at kontrol sa P275 Bilyong pondo, palpak ang naging pagtugon nito sa pandemya – papalaki pa rin ang bilang ng may kaso ng Covid-19, hindi naabot ang 30,000 kada araw na testing at pinili at kulang ang ayuda sa kalakhan ng apektado ng pandemya at ang double-standard na pagpapatupad ng batas.

Ipinamamarali ngayon ng administrasyong Duterte ang “New Normal” bilang pag-angkop sa panahong wala pang lunas sa Coronavirus disease 2019. Ngunit perwisyo ang sumalubong sa mamamayan sa ilalim ng “New Normal” – lumaganap ang kawalan ng trabaho at kabuhayan, tumigil ang ayuda, nilimitahan ang transportasyon at inilusot ang phaseout ng mga tradisyunal na mga jeepney, ipinasa sa pribadong sektor at mamamayan ang testing, pagpapataw ng buwis maging sa online sellers at sa mga audio-video online streaming services at dagdag-bayarin sa pamamagitan ng pagrehistro ng mga bisikleta at marami pang iba.

Higit pa, ginamit ng administrasyon ang pandemya at “New Normal” upang higit na supilin ang mamamayan. Tusong inilusot, habang “nakakulong” ang mamamayan, ang Anti-Terror Bill ng kongreso sa noong unang linggo ng Hunyo, sa kalagitnaan ng pagharap ng mamamayan sa pandemya. Tila naghahanda si Duterte sa papalaking galit at diskuntento ng mamamayan sa kanyang kapalpakan sa pagharap sa pandemya.

Higit na tumindi at naging mas litaw ang kahirapan, kagutuman, kawalan ng hustisya – pawang mga pundamental na suliranin sa bansa – sa loob lamang ng ilang buwan na pagharap ng gobyerno sa pandemyang ito. Malinaw ang motibo sa pagpapatimo ng administrasyon sa bersyon nito ng “New Normal”: tanggapin ng mamamayan na normal lang ang mga nangyari dahil sa pandemya ng coronavirus, at walang anumang pananagutan ang gobyerno.