Bumisita ang Pinoy Weekly noong Agosto 2, 2009 sa burol ng dating pangulong Cory Aquino sa De La Salle-Greenhills.

Sa kanto pa lamang ng Edsa at Ortigas Avenue, may pila na (at nakaikot pa) ang mga mamamayang gustong maaninag ang labi ni Aquino. Sa pagsapit ng gabi, lalong dumami ang mga nasa pila.

Ang loob naman ng gym kung saan isinasagawa ang burol at public viewing ng mga labi ni Aquino, puno ng mga pulitiko, alta-sosyedad at middle class na mga personalidad at kahit mga mula sa showbiz. Paroo’t parito si Boy Abunda, laging handa sa kalabit ng kamera ang midya, at labas-masok ang mga bisita. Sa harap ng ataul, may ilang segundo lamang na sumilip ang bawat ordinaryong mamamayan na pumila buong araw, buong hapon o buong gabi.

Sa isinagawang misa, mistulang santo ang pagkakapinta ng imahen ni Cory, ng kanyang kadakilaan bilang matapang na kalaban ng diktadura at ng kasalukuyang pamunuan. Ang mapapansing kulang ay ang magbabahagi sa mga kahinaan ng kanyang pagkatao, ng mga limitasyon ng panunungkulan kung kaya hindi (pa) nalulubos ang pangako ng pag-aalsa sa Edsa na pinamunuan niya noong 1986.

Gayunman, maningning na bayani ng taumbayan ang namamayaning turing ng bayan kay Aquino.

(Iklik ang Next page para makita ang mga larawan)