Nagprotesta sa harapan ng Kampo Crame sa Quezon City ang iba’t ibang grupo para ipanawagang palayain nang walang kondisyon ang tatlong detenidong pulitikal na dinakip sa Molino, Cavite noong Hunyo 1.

Iginiit nila na walang batayan ang pagkakaaresto kina Sharon Cabusao, ang asawa nitong si Adelberto Silva na isang National Democratic Front (NDF) consultant, at drayber na si Isidro de Lima na nakakulong ngayon sa Crame.

Inaresto si Silva sa bisa umano ng mandamyento de aresto hinggil sa mga kasong multiple murder sa Aparri, Cagayan, at sa Laoang, Northern Samar.

Kinasuhan naman ng pagkakanlong umano ng pugante sina Cabusao at de Lima. Sinampahan din ang tatlo ng kasong illegal possession of firearms and explosives.

“Kami po ay nababahala sa patuloy na pag-aresto at pagpe-penalize sa mga aktibista at sa ordinaryong mga mamamayan ng gobyerno sa pamamagitan ng mga gawa-gawang kaso, trumped-up charges, na wala namang batayan,” ani Ron Villegas ng Crispin B. Beltran Resource Center.

Ayon kay Roger Soluta, pangkalahtang kalihim ng Kilusang Mayo Uno, itinanim lamang ang mga armas na di umanoy nakuha sa tatlo para bigyang dahilan ang ilegal na pag-aresto sa kanila.

Noong inaresto, si Silva ay may hawak ng identipikasyong protektado siya ng Joint Agreement on Safety and Immunity Guarantees (Jasig), isang kasunduan sa usapang pangkapayapaan ng gobyerno at NDF na nagsasabing di dapat maaresto ng kabilang panig ang mga kalahok sa usapang pangkapayapaan.

Ani Soluta, ipinakikita ng pag-aresto ang kawalan ng sinseridad ng administrasyong Aquino sa mga usaping pangkapayapaan at pagdinig sa mga hinaing ng mga mamamayan.

“Imbes na lutasin ang ugat ng problema, resolbahin ang dahilan ng tunggalian o armadong labanan, anong ginawa nito? Inaresto ng gobyerno ni Aquino ang isang NDF consultant at lider ng Gabriela at KMU. Malinaw na walang paggalang ang gobyernong itong manhid sa pagnanais ng mamamayang Pilipino,” aniya.

Sa tala ng grupong pangkarapatang pantao na Karapatan, mayroong 527 bilanggong pulitikal sa bansa. Si Cabusao, na dating public information and international relations officer ng Gabriela, ang ikaapat sa mga babaing bilanggong pulitikal sa ilalim ng administrasyong Aquino.

Tinuligsa ng Gabriela ang dumaraming bilang ng mga babaing bilanggong pulitikal at ang kalagayan nila sa bansa. “Marami sa kanila’y may mga sakit na, matatanda, deka-dekada na halos sa kulungan pero hindi umuusad ang kaso,“ ani Joms Salvador, pangkalahatang kalihim ng Gabriela.

Ayon pa kay Salvador, isa lang si Sharon Cabusao na may sakit sa dugo sa mga bilanggong pulitikal na nangangailangan ng agaran at espesyal na paggamot. Sina Wilma Tiamzon na hinihinalang mataas umanong lider ng Partido Komunista ng Pilipinas, ay mayroong sakit sa bato at ang 65 taong gulang na si Moreta Alegre ay nakaambang mawalan ng paningin dahil sa advanced cataract.

Kasabay nito’y inilunsad ng Gabriela ang kampanyang “Free Sharon Cabusao! Free All Political Prisoners!” at iginiit ang pagrebyu ng mga kaso ng mga bilanggong may karamdaman at kagyat na pagpapalaya sa mga ito.

“Hinihingi namin ang kagyat na pagpapalaya kay Sharon para sa humanitarian na mga dahilan, at sa katunayang walang katotohanan ang mga kaso sa kanya. Pananagutin namin ang gobyernong Aquino sa kung anumang mangyari sa kaniya bilang resulta ng pagpapabaya sa mga espesyal niyang pangangailangan,” ayon kay Salvador.

Kasama rin sa kilos-protesta si Mia de Lima, ang anak ni Isidro de Lima.

“Ang pamahalaan ni Aquino, sila ang kriminal. Ilang tao pa ba ang makakaranas ng ganitong paglapastangan sa karapatang pantao? Ilang pamilya pa ba ang makakaranas ng sakit na mawalay sa mahal sa buhay?” aniya.

Mahigit isang linggo nang nakadetino sina Cabusao, Silva at de Lima sa Criminal Investigation and Detection Group ng Philippine National Police sa Camp Crame.