Sa Estasyon Ng Paglalakbay


Isang bagong tula ng batikang makata’t manunulat na si Rogelio L. Ordoñez.

naghihilamos ng hamog
makulimlim na umaga
nginangasab ng abuhing pusa
nahuling daga sa basura
nakatanghod asong gala
sa mangkok ng lugaw sa ponda
sa sulok ng mata ko
naglalambadang dalawang anino
nakausling mga tiyan
nagkikiskisang mga katawan
umaalong mga dibdib
lumalangoy na mga bisig
sa dagat ng karimlan
anino ko’y nakahiga sa upuan
isip ko’y naglalakbay sa kawalan
pitada ng tren hinihintay
bubulaga na ang araw
sa silangang hinarangan
ng gusaling nakabara sa pananaw.

wooo! wooo! wooooo!
rikitik… rikitik…rikitik… woooo!
mga katawa’y nagkabuhay
mga bagahe’y nagbanggaan
mga paa’y nag-unahan
sa bungangang naghihintay
dugo ko’y kumiwal
sa namanhid na mga ugat
saan ako maglalakbay?
patutunguha’y di alam
pira-piraso na
mga larawang isinabog
ng sumisikdong amihan
ngunit naglalagablab pa rin
apoy ng pagsinta
sa la tierra pobreza
habang tinutupok
natuyong mga layak at damo
saanmang burol at sabana
at dinidilaan ng apoy
imperyo ng dusa’t pagsasamantala
at ako, akong manlalakbay
ng makulimlim na mga dekada
ay naiwang nakatunganga’t nakanganga
sa estasyong inulila
ng dumagundong na tren
sakay ang mga kaluluwang
maglalakbay
saanman hahantong ang pag-asa

at ako, akong manlalakbay
sa kawalan
ay muli’t muling hihimig
ng awitin ng pakikibaka
sa estasyon ng pagsinta!

Related Posts

Makata para sa bayan

Pagsusuri ng Aklat: Pandayan ng Paninindigan: Pagbisita at mga Tula ng Pakikibaka ni Benito Concio Quilloy.

Tula

Tula | Masahol pa sa Pacquiao

Jinab ng iyong mga salita At inaperkat ng iyong paghuhusga Plakda kami sa kalsada Lupasay sa opisina Duguan sa pabrika Swerte na nga lang at pambansang kamao Ang tumikey-o sa pagkatao.   Para sa ‘yo ang tulang ito Para sa ‘yong kampanya ng pagkamuhi Sa ‘yong kampanya ng pandarahas Pati Diyos ginagamit   Para sa […]

Nagpahayag ng pakikiisa sa laban para sa kalayaan ni Acosta at iba pang bilanggong pulitikal si Prop. E. San Juan Jr., tanyag na kritiko at akademiko na nakabase sa US. (Free Ericson Acosta Campaign)

Mantrang Inanod sa Maitim na Butas ng Cyberspace

Datapwat lalong lumala ang sakit at gutom kahit 7.2% lumago ang GNP Diyata Datapwat wala pang $2 kada araw ang pantawid-buhay ng nakararaming pamilya Diyata Datapwat sa harap ng nagkatusak na mall 39 milyong tao ang walang trabaho Diyata Datapwat wala pa ring hustisya ang mga biktima ng Mendiola’t Ampatuan masaker Diyata Datapwat pinatay pa […]

Pagmumuni-muni Hinggil sa Pagdurusang Ipinataw kina Andrea Rosal at mga Kasama sa Camp Bagong Diwa

Sapagkat walang tigil ang pagpaparusa’t pahinto-hinto ang pagpapahintulot Sapagkat malambot ang laman ng sanggol kaya tumigas ang inyong loob Sapagkat walang maasahan sa rehimeng Aquino kaya umasa sa madlang nakikibaka Sapagkat malupit ang militar-pulis subalit maamo’t mahinhin ang mga kapanlig Sapagkat  marahas ang hukom at burokrasya kaya mahinhin ang nakikiramay Sapagkat mapait ang hatol ng […]