Isang engrandeng “publicity stunt” lamang ang distribusyon ng mga Certificate of Land Ownership Award (CLOA) sa mga magsasaka sa Bondoc Peninsula, ayon sa mga grupong magsasaka na naniniwalang ginawa ito ng gobyernong Aquino para pabanguhin ang umano’y bangkaroteng Comprehensive Agrarian Reform Program Extension with Reforms (Carper). Naghihinala ring silang ginagamit ito ng ilang matataas na opisyal para sa darating na eleksiyon.

“Gusto man naming paniwalaan ang sinseridad ni Department of Agrarian Reform (DAR) Secretary Virgilio Delos Reyes sa pamamahagi ng CLOA sa mga magsasaka sa mga niyugan ng Quezon, hindi maiaalis sa amin na ituring itong pagpapakitang-gilas lamang,” pahayag ng Katipunan ng mga Samahang Magbubukid sa Timog Katagalugan (Kasama-TK).

Kahapon, ginawaran ng mga CLOA ang mga magbubukid sa 480 ektarya ng niyugan sa mga bayan ng San Narciso, Buenavista at San Andres sa Quezon, sa isang seremonya na pinamunuan ni Delos Reyes, Sec. Prospero Alcala ng Department of Agriculture, at Sec. Joel Rocamora ng National Anti-Poverty Commission at Task Force on Coco Levy Funds.

“Ang pamilya ni Alcala ay magtatakbuhang gobernador, kongresista at meyor sa Quezon. Kailangan nila ang papoging kagaya nang naganap kahapon,” sabi ng Kasama-TK.

Kinuwestiyon din ng grupo ang presensiya ni Rocamora. “May interes siya sa coco levy funds,” ayon sa grupo, na inaakusahan ang dating lider ng Akbayan na gagamitin ang pondo ng mga magniniyog para sa kanyang partido, na tumatakbo sa eleksiyong party-list at may kandidato sa pagkasenador.

Ipinunto rin ng Kasama-TK ang rekord ng DAR na “bigay-bawi” ng CLOA. “Alam ni Sec. Delos Reyes ang katotohanang ito,” dagdag ng grupo.

Ayon naman sa Kilusang Magbubukid ng Pilipinas (KMP), walang bago sa pamimigay ng gobyerno ng CLOA, na umano’y isang kapirasong papel lamang. “Ang ibig sabihin lang nito, kailangan magbayad ang magbubukid sa gobyerno sa loob ng 30 taon kahit wala talagang kaseguruhan na mapapasakanila ang lupa,” ayon kay Randall Echanis, pangkalahatang kalihim ng KMP.

Ipinunto ni Echanis na ang di-pagbayad ng amortasisyon ang isa rin sa mga nagiging batayan para bawiin ang CLOA.

Binalikan din ng lider-magsasaka ang distribusyon ni dating pangulong Joseph Estrada ng mga CLOA sa asyenda ni Eduardo “Danding” Cojuangco Jr. sa Negros noong 1998, at distribusyon  ng mga CLOA ni  dating pangulong Gloria Arroyo sa Misamis Occidental (2002) at Nueva Ecija (2008), na wala umanong kinahinatnan.

Sa pag-aaral pa ng Ibon Foundation, mayroong mahigit 2,000 na Emancipation Patent at CLOA, na sumasakop sa 380,000 ektarya ng lupa, ang kinansela noon lamang 2004.

Kinansela rin ng DAR ang mga CLOA na sumasaklaw sa libu-libong ektarya ng lupa, gaya ng sa Hacienda Looc sa Nasugbu, Batangas; at Hacienda Araneta sa San Jose Del Monte, Bulacan, ayon sa KMP.

“Malinaw na ang pamamahagi ng CLOA sa Hacienda Reyes sa Quezon ay isang last-ditch effort para isalba ang Carper at linlangin ang mga magsasakang Pilipino,” sabi ni Echanis.

Samantala, inireklamo rin ng Kasama-TK na mga miyembro ng Cafgu (Civilian Armed Forces Geographical Unit) ang mga kasapi ng Kilusang Magbubukid ng Bondoc Peninsula (KMBP), alyadong organisasyon ng Akbayan, na nakatanggap ng mga CLOA. “Katulong (sila) ng Philippine Army sa pandarahas sa mga magsasakang hindi sang-ayon sa CARP,” ayon sa Kasama-TK.

Nagpapatuloy umano ang matinding militarisasyon at mga paglabag sa karapatang pantao sa Bondoc Peninsula, na kinakampanya ng iba’t ibang grupo simula pa noong nakaraang taon.