[cycloneslider id=”feb-27-rally-game-over-noynoy”]

Libu-libong mamamayan ang nagtungo sa paanan ng Mendiola sa Maynila para sa pagbibitiw ni Pangulong Aquino sa pagkapangulo.

Pinangunahan ang protesta ng iba’t ibang grupo ng kabataan sa pangunguna ng alyansang Youth Act Now, at mga organisasyong tulad ng Anakbayan, League of Filipino Students (LFS), National Union of Students of the Philippines (NUSP), Student Christian Movement, Karatula at College Editors Guild of the Philippines (CEGP). Kasama rin nila ang iba’t ibang konseho ng mga mag-aaral sa iba’t ibang kolehiyo at unibersidad.

Aabot sa 20,000 estudyante ang nagsagawa ng walkout sa iba’t ibang paaralan sa bansa para ipanawagan ang pagbasura sa di-makatarungang fees sa kanilang mga eskuwela at ipanawagan din ang pagbibitiw sa puwesto ni Aquino, ayon kay Vencer Crisostomo, tagapangulo ng Anakbayan.

Ayon sa Anakbayan, hindi tatanggapin ng kabataan na manahin ang isang lipunan na manatiling negosyo ang edukasyon. Walang pangil o silbi ang Commission on Higher Education at si Aquino pagdating sa pagtataas singilin sa mga pamantasan at walang maasahan ang mga kabataan kundi ang kanilang mga sarili, ayon kay Sarah Elago, tagapangulo ng National Union Students of the Philippines.

Ngayong buwan ng Pebrero nagaganap ang mga “konsultasyon” sa mga pamantasan kaugnay ng pagtataas ng matrikula at iba pang bayarin.

Nagsimula ang walkout ng alas-11 ng umaga. Nagtipon ang mga estudyante sa Nagtahan Bridge sa Maynila, gayundin sa Taft Avenue at Espana Avenue, bago nagmartsa patungong Mendiola. Lumahok sa martsa ang iba’t ibang progresibong grupo sa ilalim ng Bagong Alyansang Makabayan (Bayan).

Maliban sa mga isyu ng kabataan tulad ng di-matigil na taas-singil sa matrikula at iba pang bayarin na itinuturol nito sa administrasyong Aquino, nakiisa ang nasabing mga grupo sa panawagang panagutin si Aquino sa pagdanak-ng-dugo sa Mamasapano, Maguindanao, isang lingo na ang nakararaan.

“Akala nila tanga ang publiko. Sa desperasyon nilang pagtakpan ang pagkakasangkot ni Aquino at ng (gobyernong) US (sa pagdanak-ng-dugo sa Mamasapano), gumawa na naman sila ng bagong script at gumawa-gawa pa ng text messages para ipakitang kunwari’y nakakuha ng maling impormasyon (si Aquino). Pero sa pagdami ng kasinungalingang iniimbento niya, lalong lumalalim ang hukay na pinagbabaunan niya,” sabi pa ni Crisostomo.

Sa Mendiola na

Dalawang araw matapos harangin ng pulisya, sa utos ng Palasyo, ang mga demonstrador sa EDSA noong anibersaryo ng pag-aalsa sa kalsadang ito, nagmartsa muli ang iba’t ibang progresibong grupo para muling irehistro ang panawagang bumaba na sa puwesto si Aquino.

“Sa araw na ito, sinasabi natin sa gobyernong ito, sinasabi sa sinungaling na si Aquino, hindi na kami magtitiis. Kami po ay tatayo. Kami po ay lalaban. Pagbabago ngayon na!” ayon kay Renato Reyes Jr., pangkalahatang kalihim ng Bayan.

Hindi pagpapalit lang ng pangulo o ng nakaupo ang hangad nila kundi ang pagbabago mismo ng sistema. Kailangan umano ang isang konseho ng mga mamamayan na tatayo sa interes ng mga mamamayan, sabi pa ni Reyes.

“Ang People Power na hangad natin sa pagpapatalsik kay Aquino, gusto nating makinabang ang mga tao, ang ordinaryong mga mamamayan. (Gusto natin ng) reporma sa lupa, pambansang industralisasyon, soberanya, kapayapaan, pambansang pagkakaisa. ‘Yan ang ipinaglalabanan natin, hindi po ang magluklok ng mga pulitiko. Ang pinaglalaban natin, baguhin ang bulok na sistemang ito,” ayon kay Reyes.

Mula noong una, malinaw para sa mga nagprotesta ang pananagutan ni Aquino at gobyernong US dahil sa kampanyang war on terror. Isinubo para sa kanila ang  buhay ng 44 miyembro ng Special Action Force at mga Moro kabilang ang sibilyan para tugusin ang mga teroristang binabansagan ng US.

Sa itinatakbo umano ng imbestigasyon sa Senado at Kamara, malinaw ang pagtatakip sa tunay na pangyayari at pagtatakip sa naging papel ni Aquino at ng gobyerno ng US.

“Kung totoong naghahanap tayo ng pananagutan at hustisya, hindi mabibigyan ng hustisya ang nangyari sa Mamasapano kung hindi natin bibigyan ng wakas ang terorista sa buong mundo (ang US), kung hindi natin bibigyan ng wakas ang numero unong tuta sa ating bansa,” ayon kay Bayan Muna Rep. Carlos Zarate.

Pero maliban sa isyu ng Mamasapano, malaking kasalanan din ng rehimen ang patuloy at tumitinding kahirapan ng mga mamamayan, ayon kay Joms Salvador, pangkalahatang-kalihim ng Gabriela.

“Bugbog sarado ang kababaihan at mamamayan; bugbog sa mataas na presyo ng mga bilihin; bugbog sa pagkataas-taas na presyo ng kuryente at iba pang batayang pangangailangan; bugbog tayo sa napakahirap na buhay na ibinigay sa atin na ibinigay nitong pangulo na ito na si Noynoy Aquino,” ayon kay Salvador.

Para naman kay Elmer Labog, tagapangulo ng Kilusang Mayo Uno o KMU, walang naranasan ang mga manggagawa kundi patuloy na pagpapababa sa sahod at kontraktuwalisasyon sa mga manggagawa. Isa din siya sa mga naghikayat sa mga kapulisan na lumahok para sa katotohanan at pananagutan kaugnay ng Mamasapano.

Walang utang-na-loob kung tawagin naman ni Rudy Corpuz ng Alyansa ng Manggagawang Bukid sa Asyenda Luisita, si Aquino. Noong EDSA 1, hinakot aniya ang mga taga-Hacienda Luisita pero pinahihirapan ang mga taong asyenda.

“Sa darating na Abril, magtatatlong taon na ang desisyon ng Korte Suprema na ibalik ang lupa sa manggagawang bukid ng Asyenda Luisita at magbayad ng P1.33 Bilyon kapalit ng mga lupang ibinenta. Pero ano ang ginawa nila? Nagbubungkal na kami, ang masakit, gamit ang kapulisan, palay na aanihin na lamang, binuldoser nila. Anong klaseng mga tao ito?” ayon kay Corpuz.

Dagdag ni Corpuz, doon sa Hacienda Luisita, wala silang laya, walang lupa, patuloy na naghihirap, at ang P1.33-B bilyon, hindi pa nila natatanggap.