Ang Film Weekly ay isang kolektibong nakatuon sa paglikha at pagbabahagi ng mga pelikulang tumatalakay sa mga isyung panlipunan at kultura ng pangkaraniwang Pilipino. 

Mula 2016 nang mabuo ito, nakapagprodyus ang grupo ng iba’t ibang maiikling pelikula at dokumentaryo na tumatalakay sa mga kinakaharap ng pangkaraniwang Pinoy sa gitna ng tumitinding krisis pang-ekonomiya at pampolitika sa bansa. 

Balikan natin ang ilan sa mga maiikling pelikula at serye ng Film Weekly sa mga nakaraang taon.

Dula-anan

Inilalahad sa dokyumentaryong ito ang buhay ng mga batang sapilitang nagtatrabaho sa minahan dahil sa kahirapan at ang kanilang suliranin para magpatuloy sa pag-aaral. 

Marawi City sa Kuko ng Agila

Isang espesyal na ulat na nagpapakita ng malalim na pagsisiyasat sa krisis sa Marawi City. Ipinapakita nito ang epekto ng digmaan sa komunidad at ang sitwasyon ng mga mamamayan sa lugar. 

Tomas and Friends

Isang serye ng maiikling bidyo mula sa programang “Woke The Talk” na sumusunod sa mga pakikipagsapalaran ng karakter na si Tomas. Ipinapakita nito ang iba’t ibang karanasan at aral na natutunan ni Tomas sa kanyang mga paglalakbay sa komunidad ng maralitang lungsod.

Buwagin

Isang maikling dokumentaryo na nagpapakita ng mga magsasaka ng Hacienda Luisita sa Tarlac at kung paano nilang pinangahasang buwagin ang pader sa lugar upang ipaglaban ang kanilang karapatan sa lupa.

Inani na Utang

Isang maikling dokumentaryo na ipinapakita ang suliranin ng isang magbubukid dahil sa pagpapatuloy ng importasyon ng sibuyas mula sa ibang bansa.

---

Bukod sa mga pelikulang ito, ang Film Weekly ay nagpo-promote din ng nilalamang pangkultura tulad ng mga music video na nagpapakita ng sining at aktibismo sa Pilipinas.

Sa isang mundo kung saan hindi nabibigyang-pansin ang mga tunay na kuwento ng mga taong nasa laylayan ng lipunan, ang Film Weekly ay patuloy na pinahahalagahan ang mga isyung dapat pag-usapan ng bayan. 

Ang kanilang mga pelikula ay instrumento rin para magbigay kaalaman at magmulat para sa mas malawak na pag-unawa sa iba’t ibang suliranin na kinakaharap ng mamamayang Pilipino. 

Para sa karagdagang impormasyon at upang mapanood ang kanilang mga pelikula, bisitahin lang ang kanilang Facebook page.