Mga larawan: Disgusto at militansiya sa pintuan ng OWWA


Matapos ang ilang buwang pagpapabaya, nilusob ng mga migrante ang Overseas Workers Welfare Administration para kunin ang dapat lamang na para sa kanila. Heto ang mga babaing tumindig laban sa ahensiyang wala umanong walang silbi sa mga OFW.

caption
Itinirik ng 43 pinauwing Overseas Filipino Worker mula sa Riyadh ang isang kampo sa harap ng Overseas Workers Welfare Administration (OWWA) noong Marso 3. Ito ang unang pagkakataon na naglamay ang isang grupo ng mga OFW sa harap ng ahensiya at nangakong hindi aalis dito hangga't hindi nakukuha ang mga benepisyong umano'y nararapat sa kanila.
caption
Simula Agosto noong nakaraang taon, ilang serye ng hunger strike ang isinagawa ng mga OFW, mga caregiver ng Annasban Group of Companies sa Saudi Arabia, para iprotesta ang mga paglabag sa kontrata, kabilang ang di sapat na sahod, ilang buwang pagkaantala ng sahod, mahgit 12 oras na pagtatrabaho, at kawalan ng mga benepisyo.
caption
Ngayong nakabalik na ng bansa, sinisingil ng mga OFW ang OWWA para sa ipinangako nitong financial assistance at gastos sa repatriation na nagkakahalagang P15,000 bawat isa. Umano'y nangako ang OWWA na sagutin ang kanilang pamasahe pabalik ng Pilipinas, subalit ikinaltas ito ng kompanya mula sa kanilang sahod. Hindi rin umano kagyat na inaksiyunan ng gobyerno ang kanilang hiling na mapauwi. Nakauwi ang huling batch noon lamang Pebrero, habang may limang pang manggagawa ng Annasban na natitira sa Riyadh.
caption
Humarap sa mga OFW si OWWA Dir. Albert Valenciano (kanan) at inalok ang mga OFW ng "livelihood starter kit" o mga kagamitang pang-negosyo. Agad nila itong tinanggihan. Paliwanag ni Joy Flancia (kaliwa), lider ng mga manggagawa, pera na umano'y nararapat sa kanila ang dapat ibigay ng OWWA.
caption
"Baba si Dimzon! Baba si Dimzon!" sigaw ng mga OFW, tinutukoy si OWWA administrator Carmelita Dimzon, na dapat umanong makipag-usap sa kanila. Sawa na umano sila sa ilang linggong pabalik-balik sa ahensiya nang walang seryosong tumutugon sa kanilang mga hiling.
caption
Maghapong naghintay ang mga OFW na harapin sila ni Dimzon. Anila, hindi nila matatanggap ang patuloy na pagpapabaya sa kanila ng gobyerno: "Hanggang dito ba naman sa ating sariling bansa?"
caption
Sanay na umano sila sa hirap. Habang naghu-hunger strike sa Riyadh, ikinulong ang ilan sa kanila sa bus at pinausukan ng mga among Arabo. Kinumpiska rin ang kanilang mga cellphone para hindi makahingi ng tulong mula sa labas. Hinaing ng mga OFW, sa halip na tulungan sila ng mga opisyal ng embahada sa Riyadh, nanguna pa ang mga ito sa pagtatanggol sa kompanya.
caption
Ipinapakita ni Marietta Bironggoy ang litrato ng kanyang bagong silang na apo, na hindi pa niya nasisilayan. Hindi makauwi si Marietta sa Samar dahil sa kabiguan ng OWWA na magbigay ng pamasahe pauwi sa kani-kanilang mga probinsya.
caption
Nakisimpatiya sa nakakampong mga OFW ang dalawang inabuso ring dating manggagawa ng Annasban (kaliwa), na nag-aaplay at napadaan sa OWWA. Binabatikos ng Migrante International ang pagpayag ng gobyerno na muling makapagrekrut ang Annasban. Sinusupinde ng Philippine Overseas Employment Agency (POEA) ang kompanya noong 2005 pero tinanggal ang suspensiyon noong 2008, sa kabila ng dagsa pa rin ang reklamo ng mga OFW laban dito.
caption
Biktima ang mga OFW ng contract substitution, isang laganap na porma ng illegal recruitment. Nag-aplay sila bilang cleaner, pero pinagtrabaho bilang caregiver. Sa kalsada sa tapat ng OWWA nagpalipas ng gabi ang mga taga-Annasban sa unang araw ng kampo.
caption
Kinabukasan, Marso 4, isang human chain sa palibot ng OWWA ang isinagawa ng mga migrante, kasama ang grupong pangkababaihan na Gabriela. Iginigiit nila ang pagbasura sa OWWA Omnibus Policies, na naglilimita sa tulong at benepisyong ibinibigay ng ahensiya sa mga OFW. Nangongolekta ang OWWA ng $25 sa bawat OFW na lumalabas ng bansa.
caption
Sa tantiya ng Migrante International, kumikita ang OWWA ng P5-Milyon kada araw mula sa 4,500 Pilipinong nangingibang-bansa kada araw. Tinatawag nilang "inutil" ang ahensiya dahil sa pagsuspinde nito sa financial assistance, paglimita sa Repatriation Fund, at iba pang mga probisyon ng Omnibus Policies na umano'y ginagawa lamang gatasang-baka ang mga OFW.
caption
Hindi matatawaran ang pinagdaanan ng kababaihang mga manggagawa ng Annasban para lamang mabuhay sa ibang bansa. Noong nakaraang taon, isa sa kanilang mga kasamahan, si Elsie Pelayo, ang namatay sa sakit nang hindi nabibigyan ng tulong ng OWWA.

Related Posts

Migrante

Pinay, pinayuhan ng opisyal ng OWWA na ‘tumalon sa gusali’

Pormal na sinampahan ng reklamo ng isang Pinay caregiver ang isang opisyal ng Overseas Workers Welfare Administration (OWWA) sa Riyadh, Saudi Arabia matapos siyang payuhan na tumalon na lamang mula sa ikatlong palapag ng gusali, sa halip na isaklolo mula sa pang-aabuso ng employer. Sinamahan ng mga manggagawa ng Annasban Group of Companies ang kanilang […]

Migrante

OWWA bumigay; kampo ng mga OFW tagumpay

Bumigay ang Overseas Workers Welfare Administration (OWWA) sa mga hinihingi ng inabusong mga Overseas Filipino Workers (OFWs) mula Riyadh, na nagsagawa ng tatlong-araw na kampo sa harap ng ahensiya para igiit ang tulong-pinansiyal na umano’y nararapat sa kanila. Kahapon, hinarangan ng mga kababaihang OFW mula sa Annasaban Group of Companies ang mga pintuan ng OWWA […]