Istorya ng Linggo

Palpak, malayo’t masikip na pabahay sa Montalban, Rizal


Gumuguhong pader, masisikip na bahay, malayo sa kabuhayan. Ito ang buhay na inilalako ng pamahalaang Aquino sa mga mamamayan ng Sitio San Roque, Quezon City na gusto nilang itaboy pabor sa “Quezon City Central Business District.”

Kabahayan sa relocation site sa Montalban, Rizal. (Macky Macaspac)
Kabahayan sa relocation site sa boundary ng Montalban sa Rizal: Mukhang subdibisyon sa ibabaw, pero masahol pa sa barung-barong sa loob. (Macky Macaspac)

Limang buwan pa lamang si Aling Jennalyn sa relokasyon ng National Housing Authority (NHA) sa hangganan ng Rodriguez (bagong pangalan ng Montalban), Rizal, pero pinagsisisihan na niyang nilisan nilang mag-iina ang barung-barong na tahanan sa Sityo San Roque, Brgy. Bagong Pag-asa, Quezon City.

“Buong panahon, nakatanga lang kaming mag-iina rito. Wala kaming ginagawa. Walang trabaho,” sabi niya. “Ngayon lang talaga ako nakaranas ng buhay na walang-wala.”

Dokumentong nagsasabing kailangang bayaran ng bawat residente ng P140,000 sa loob ng 30 taon ang mga "bahay" sa relokasyon sa Montalban-Rodriguez. (KR Guda)
Dokumentong nagsasabing kailangang bayaran ng bawat residente ng P140,000 sa loob ng 30 taon ang mga "bahay" sa relokasyon sa Montalban. (KR Guda)

Namamasukan sa isang pagawaan ng aircon sa Maynila ang asawa. Noong nakaraang linggo, kinailangan pang mangutang para makaalis ng bahay ang asawa, para sa mahigit P200 pamasahe patungong trabaho.

“P400 lang kada linggo ang sinusuweldo niya. Kaya sabi ko na lang sa kanya, ‘wag ka na lang laging uuwi rito,” sabi ni Aling Jennalyn. Isang beses na lamang sa isang linggo umuwi ang kanyang asawa. Minsan, isang beses pa sa buong buwan.

Walang sapat na hanapbuhay ang mayorya sa mga residente ng relokasyon. (Macky Macaspac)
Walang sapat na hanapbuhay ang mayorya sa mga residente ng relokasyon. (Macky Macaspac)

Noong nasa San Roque pa, nagtatahi siya ng mga basahan na binebenta sa kalsada. Pero wala na siyang mapagbentahan sa Montalban. Sinubukan niyang magtinda, pero inutangan lang siya ng mga construction worker ng NHA, at tinakasan ang utang. Pero noong Abril, lumikas sila matapos masunog ang isang bahagi ng sityo. Misteryoso ang pinagmulan ng pagkakasunog. Natakot si Aling Jennalyn para sa kanyang dalawang maliliit na anak.

Kopya ng bill ng tubig, mula sa isang pribadong "distributor" sa lugar. (KR Guda)
Kopya ng bill ng tubig, mula sa isang pribadong "distributor" sa lugar. (KR Guda)

“May mga kapatid pa akong naiwan sa San Roque. Kung ako lang ang masusunod, maiiwan ako. Kaso natakot ako para sa mga anak ko,” aniya.

Isa si Aling Jennalyn sa mahigit 3,000 residente ng San Roque na boluntaryong lumipat ng Montalban dahil idedemolis na umano ang mga bahay sa North Triangle para bigyang-daan ang pagtatayo ng “Central Business District” sa lugar ng kanilang mga tahanan.

Noong Setyembre 23, tinangkang idemolis ng demolition teams ng National Housing Authority (NHA) ang mga bahay sa San Roque. Sinabi ng NHA na target nilang maubos ang mga bahay sa sityo sa loob ng pitong araw. Pero nanlaban ang mga mamamayan. Binarikadahan ang buong EDSA. Pinagbabato sila ng mga miyembro ng demolition team at marami ang nasugatan. Pero nanindigan sila.

Alas-dos ng hapon, naglabas ang korte sa Quezon City ng temporary restraining order sa pagdedemolis. Noong Sabado, Set. 26, si Pang. Benigno Aquino III na mismo ang napilitang magsalita hinggil sa isyu — sa gitna ng kanyang state visit sa US. Sinabi ni Aquino na inutusan niya ang NHA na huwag munang magdemolis hangga’t di masisiguro ang malilipatan ng mga residente ng San Roque.

Samantala, laman ng mga balita ang paglaban ng mga mamamayan ng San Roque.

Putikan pa rin ang marami sa mga kalsada sa relocation site tuwing umuulan. (Ilang-Ilang Quijano)
Putikan pa rin ang marami sa mga kalsada sa relocation site tuwing umuulan. (Ilang-Ilang Quijano)