Eksibit sa North Triangle, inilunsad sa anibersaryo ng demolisyon


Hinggil sa eksibit sa makasaysayang paglaban ng mga taga-San Roque, North Triangle para sa karapatan sa pabahay noong Setyembre 23, 2010.

Sa pamamagitan ng mga larawang ineksibit ng PinoyMedia Center, Inc., sinariwa ng mga residente ng San Roque sa North Triangle ang kanilang militanteng paglaban sa demolisyon noong nakaraang taong. (Macky Macaspac)
Sa pamamagitan ng mga larawang ineksibit ng PinoyMedia Center, Inc., sinariwa ng mga residente ng San Roque sa North Triangle ang kanilang militanteng paglaban sa demolisyon noong nakaraang taong. (Macky Macaspac)

Isang taon matapos ang marahas na demolisyon sa North Triangle noong Set. 23, 2010, karaniwang tanawin na sa bukana ng komunidad ang mga kahoy na barikada. Ang barikada ang simbolo ng kanilang paglaban, ang tanging dahilan kung bakit patuloy silang nakakapanatili sa29-ektaryang lupain kung saan sila pinapalayas ng gobyerno.

Pero nitong Setyembre 21, hindi mga banner o flag lamang ang kapansin-pansin na nakasabit sa mga barikada sa Agham Rd., Sitio San Roque. Kundi, malalaking tarpaulin na inimprentahan ng mga larawan. Eksibit iyon na pinamagatang Sa Diwa ng Barikada, handog ng PinoyMedia Center(PMC) at grupong pangkultura na Sining Kadamay.

Batang masayang naglalaro sa barikadang eksibit ng mga larawan ng paglaban sa San Roque. (KR Guda)
Batang masayang naglalaro sa barikadang eksibit ng mga larawan ng paglaban sa San Roque. (KR Guda)

Sa 24 na piling larawan, naipakita ang mga naganap sa komunidad sa nakaraang isang taon. Mga kaganapan ito na hindi halos nakober o naipakita ng mainstream na midya, maliban sa dramatikong komprontasyon sa EDSA Ave. noong Setyembre 23. Kuha ang mga larawan ng mga mamamahayag at intern ng Pinoy Weeklyna sina Macky Macaspac, Kenneth Guda, Ilang-Ilang Quijano, Rogelio Tubije, at Abigail Castillo; mga documentary photographer na sina Buck Pago at Bambam Luneta; at Amanda Echanis ng Sining Kadamay.

Marami ang mga nag-usisa sa eksibit. Ang mga manggagawa na papasok sa kani-kanilang mga trabaho. Ang mga drayber ng pedicab. Ang mga mangangalakal ng basura. Ang mga nanay bitbit ang batang maliliit. Ang mga drayber ng taksi, na humihinto pa para mag-usisa. Karamihan sa kanila, mga maralitang residente ng North Triangle.

Sa pamamagitan ng mga larawan, sinariwa nila ang demolisyon. Sinariwa nila ang kanilang galit sa mga pulis na kitang-kita sa aktong nagbubunot ng baril, o mga demolition team ng National Housing Authority sa akto naman ng pambabato.

Nakita nila ang kabundukan ng Montalban kung saan sila pilit itinataboy ng gobyerno, namukhaan ang babaing nasa larawan. Ang mga mulat sa totoong kalagayan sa relokasyon, napapailing, nasasabing “Bakit pa kasi siya nagpa-relocate?” Ang mga nag-aakala na maganda ang buhay roon, nagkakahinuha na posibleng hindi,nang dahil sa suhestiyon ng larawan (“Ay, akala ko okey doon”).

Napatingin ang mga dumaraan ng Agham Road, pati miyembro ng K9 Unit ng SWAT. (Macky Macaspac)
Napatingin ang mga dumaraan ng Agham Road, pati miyembro ng K9 Unit ng SWAT. (Macky Macaspac)

Nakita nila ang kurba ng isa sa kanilang mga kilos-protesta papuntang Mendiola, kuha mula sa itaas ng overpass. Ang repleksiyon ng ilaw sa mukha ng isang pamilyang nasunugan. Ang ngiti sa mukha ng manininda sa palengke, kabilang sa libu-libo sa North Triangle na piniling ipaglaban ang karapatan na makapaghanapbuhay. Ang banta sa simbolo ng magkasamang backhoe at shopping mall sa iisang larawan.

Ikaapat sa serye ng Documenting the Marginalized, layon ng eksibit na itaguyod ang dokumentasyon, pagbibigay-liwanag, at papalaganap sa mga isyu ng mardyinalisadong mga sektor ng lipunan. Layon ng PMC na hikayatin ang mga mamamahayag, artista, potograpo, filmmaker at ordinaryong mga mamamayan na aktibong lumahok sa pagdodokumento—at pakikibaka—ng mga mamamayang binabalewala at pinagsasamantalahan.

Mananatiling nakatirik ang eksibit sa Agham Rd., tapat ng Office of the Ombudsman, hanggang Setyembre 23. Samantalang ang mga barikada, mananatili roon hangga’t may banta ng demolisyon.