Pinoy Weekly

Reserbasyon sa RH Bill, sa gitna ng pagdiriwang

Akses sa serbisyo at programa hinggil sa reproduktibong kalusugan ng kababaihan, hindi population control, ang itinutulak ng GWP  (Boy Bagwis/PW File Photo)

Nagpahayag ng reserbasyon sa Reproductive Health Bill ang mga kinatawan ng Gabriela Women’s Party, isa sa mga orihinal na awtor ng panukalang batas, dahil sa probisyon hinggil sa population control na umano’y kontra-kababaihan at kontra-mahihirap.

Sa gitna ng pagdiriwang ni Pang. Benigno Aquino III at iba’t ibang grupong civil society sa pagkakapasa ng RH Bill sa ikatlong pagbasa sa Kongreso at Senado, ipinaliwanag ni GWP Rep. Emmi de Jesus ang kanilang botong “yes, with reservations” nina GWP Rep. Luz Ilagan.

“Sa totoo lang, hindi naging madali para sa amin na tumindig nang ganito dahil sa mata ng madla, dalawa lang ang kulay ng botohan sa RH Bill: black or white, kumbaga. Oo lang o hindi,” sabi ni de Jesus.

Simula’t sapul, nilabanan ng Gabriela ang pagkontrol ng populasyon para sugpuin ang kahirapan.

Sa panayam ng Pinoy Weekly, sinabi ni de Jesus na sa mahabang panahon ng debate, nagtagumpay sila na tanggalin sa Guiding Principles ng RH Bill ang probisyong: “The limited resources of the country cannot be suffered to be spread so thinly to service a burgeoning multitude making allocations grossly inadequate and effectively meaningless.”

Sa pagpupursige ng progresibong mga party-list, napalitan ito ng: “The resources of the country must be made to serve the entire population, especially the poor, and make allocations adequate and effective.”

Ngunit sa huling minuto, kuwento ng mambabatas, isiningit ang probisyon na nagpapalakas ng adyendang population control. Nakalagay na ngayon sa Guiding Principles ng House Bill 4244 (bersiyon ng RH Bill ng Kamara): “The state shall also promote openness to life, provided that parents bring forth to the world only those children that they can raise in a truly humane way.”

“Sa isang banda, positibo ang pagkakapasa ng RH Bill dahil kinikilala sa pambansang antas na may isyung pangkababaihan. Kaya naman namin inihain ang panukalang batas, para masiguro ang akses ng mahihirap sa mga serbisyo at impormasyon na tungkuling ibigay ng estado,” paliwanag ni de Jesus.

Ito ang dahilan na sa kabila ng reserbasyon, bumoto sila ng “yes.” Umano’y kahit papaano, may hatid na pangako ang RH Bill sa mahihirap bibigyan sila ng akses sa mga programa at serbisyo na may kinalaman sa kanilang reproduktibong kalusugan.

Pero sa bersiyon ng RH Bill ng administrasyong Aquino, sinisisi umano ang kababaihan at mahihirap para sa kahirapan ng bansa, sa halip na tugunan ang tunay na ugat nito. “Ang ating mga mamamayan ay biktima ng kahirapan, hindi sila ang nagdudulot nito. Para masugpo ang kahirapan, kailangan harapin ang di pagkakapantay-pantay, kawalan ng lupa at industriya, mababang sahod, mataas na presyo ng mga bilihin, at kawalang-akses sa mga serbisyong sosyal,” ani de Jesus.

Dagdag pa niya, “Ang ating populasyon ay rekurso ng ating bansa. Hindi dapat sisihin ang kababaihan at mahihirap.”

Ilalaban pa rin nilang matanggal ang probisyon hinggil sa pagkontrol ng populasyon sa Bicameral Conference Committee. Si ACT Rep. Antonio Tinio ang kakatawan sa progresibong mga party-list sa bicam ng RH Bill, pangako umano ni Albay Rep. Edcel Lagman. Ngunit habang sinusulat ang artikulong ito, nagsasagawa ng bicam ang ilang mga senador at kongresista–at kapansin-pansing hindi isinama ang mga progresibo.

Mismong si Pangulong Aquino ang nagtutulak ng population control. “Sa pangalan pa nga lang, mula sa Reproductive Health Act ay ginawa niya itong Responsible Parenthood Act. Ibig sabihin, naghuhugas-kamay ang estado sa tungkuling buhayin ang mga mamamayan ito, at inilalagay ang burden sa balikat lamang ng mga magulang,” sabi ni de Jesus.

Samantala, kabaligtaran nito ang pahayag ni Aquino. Aniya sa midya, “Lalo pong luminaw: Kakampi na ng taumbayan ang estado sa pagtataguyod ng kaniyang pamilya sa patas at matiwasay na paraan.” Sinabi rin niyang ang pagpapasa ng batas ay “pagbubukas ng bagong kabanata tungo sa ating agenda ng malawakang pag-unlad.”

Ngunit babala ng GWP, habang nagpapatuloy ang polisiya ng administrasyong Aquino na pribatisasyon ng mga serbisyong pangkalusugan, malaki ang posibilidad na manatiling “sa papel” lamang ang mga ipinapangako ng RH Bill sa mahihirap at kababaihan.

email

Short URL: http://pinoyweekly.org/new/?p=22178

avatar Posted by on Dec 19 2012. Filed under Features, Kababaihan. You can follow any responses to this entry through the RSS 2.0. You can leave a response or trackback to this entry

1 Comment for “Reserbasyon sa RH Bill, sa gitna ng pagdiriwang”

  1. [...] Sa gitna ng pagdiriwang ni Pang. Benigno Aquino III at iba’t ibang grupong civil society sa pagkakapasa ng RH Bill sa ikatlong pagbasa sa Kongreso at Senado, ipinaliwanag ni GWP Rep. Emmi de Jesus ang kanilang botong “yes, with reservations” nina GWP Rep. Luz Ilagan. Read more… [...]

Leave a Reply

Follow and Subscribe

Subscribe to me on YouTube

Features

Multimedia

Pinoy Print Issues

Eskinita: Ang Alternatibong Ruta

Log in | Designed by Gabfire themes