Muling sumugod sa tanggapan ng Department of Labor and Employment (DOLE) ang mga manggagawa ng NXP Semiconductors Cabuyao Inc. para ipanawagan na muling ibalik ang 24 na opisyal na tinaggal ng manedsment sa trabaho at ituloy ang kanilang Collective Bargaining Agreement (CBA).

Mula nang tanggalin ang 24 na opisyal noong Mayo 5, hindi pa umano sila hinaharap ng manedsment at pawang abogado ng huli ang humaharap sa kanila.

Ilegal umano ang pagkakatanggal sa kanila dahil ang ginawa nilang welga noong Abril 9, 17, 19, at Mayo 1 ang ginawang dahilan ng pagkakatanggal sa kanila ng manedsment. Pero giit nila, holiday ang mga araw na ito.

“Sinasabi ni Secretary (Rosalinda) Baldos (ng DOLE) na paparusahan niya ang sinumang employer na lalabag sa holiday. Pero bakit ang manggagawa ng NXP tinaggal ang 24 na opisyales dahil hindi pumasok ng holiday,” ayon kay Reden Alcantara, president ng NXP Semiconductors Company Workers’ Union, sa panayam ng Pinoy Weekly.

Malinaw na union-busting ang ginagawa sa kanila dahil gawa-gawa umano ang kaso sa kanila. Nangyari pa umano ito sa kasagsagan ng CBA na nais baratin ang sahod ng mga manggagawa, ayon kay Alcantara.

Anila, kanilang bibitbitin ang isyung ito hanggang State of the Nation Address ni Aquino dahil isyu umano ng mga manggagawa ay isyu na rin ng mga mamamayan.

“Kung ang gobyernong Aquino ay matapat na naglilingko sa mga mamamayan, bakit tumatagal at sumasahol ang kondisyon ng mga manggagawa at mamamayan sa ilalim ng kanyang administrasyon?” tanong ni Alcantara.