Digong, ‘fit’ para sa paunang pagdinig ng ICC


Tuloy na ang paunang pagdinig ng Pre-Trial Chamber I ng International Criminal Court para sa kumpirmasyon ng mga kaso laban kay Rodrigo Duterte na crimes against humanity kaugnay ng giyera kontra droga.

Nagdesisyon na ang International Criminal Court (ICC) Pre-Trial Chamber I na may kakayahang humarap si dating Pangulong Rodrigo Duterte sa pre-trial proceedings, batay na rin sa rekomendasyon ng tatlong ekspertong medikal na itinalaga ng ICC para suriin ang kanyang kalusugan.

Sa pahayag ng ICC Pre-Trial Chamber I, itutuloy na nito ang nabalam na nakatakdang confirmation of charges hearing o pagdinig sa kumpirmasyon sa mga kaso na magsisimula sa Peb. 23, limang buwan matapos hingin ng depensa na ipagpaliban muna ang paunang pagdinig, at magtatagal hanggang Peb. 27.

Hiniling ng kampo ni Duterte noong Setyembre na ipagpaliban ang nasabing pagdinig dahil wala umano ito sa mabuting kalagayan para dumalo. Nagpasya ang Pre-Trial Chamber I na magtalaga isang panel ng tatlong ekspertong medikal upang suriin ang kalusugan ni Duterte at natanggap ang ulat ng panel noong Dis. 5, 2025.

Sinabi naman ni National Union of Peoples’ Lawyers-National Capital Region secretary general at ICC Assistant to Counsel Maria Kristina Conti na sa kabila ng pagdadahilang wala sa mabuting kalagayan ang kalusugan ni Duterte, ikinalulugod nila na nasa maayos siyang pag-iisip at may kakayahang magbigay ng testimonya

Dagdag pa ni Conti na handa silang humarap sa husgado sa darating ng Pebrero at sa mga susunod pang pagdinig sa kaso ng dating pangulong nahaharap sa tatlong bilang ng crimes against humanity kaugnay ng madugong giyera kontra droga.

Bilang paghahanda naman sa paunang pagdining para sa kumpirmasyon ng mga kaso sa Pebrero, naglabas na rin ang ICC Pre-Trial Chamber I ng desisyon na naglalaman ng mga detalye kagaya ng iskedyul ng pagdinig at pagsasaayos ng pagdalo ni Duterte.

Itinalaga na rin ng husgado ang mga ICC listed counsel na sina Joel Butuyan, Gilbert Andres at isa pang abogado mula sa ICC Office of the Public Counsel for Victims (OPVC) bilang mga common legal representative of victims.

Magsisilbi naman sina Conti at dating Bayan Muna Partylist Rep. Neri Colmenares bilang mga field assistant upang maging tagapag-ugnay ng mga kaanak ng mga biktima sa OPCV.

Related Posts

Sama-samang pinanood ng mga tanggol-karapatan at mga kaanak ng mga biktima ng giyera kontra droga sa University of the Philippines Diliman College of Law ang livestream ng pagbababa ng desisyon ng Appeals Chamber ng International Criminal Court sa apela ni Rodrigo Duterte para sa pansamantalang kalayaan noong Nob. 28, 2025. Marc Lino J. Abila/Pinoy Weekly

Digong, mananatili sa detensiyon sa The Hague

Ibinasura ng Appeals Chamber ng International Criminal Court sa Netherlands ang apela ni Rodrigo Duterte para sa pansamantalang kalayaan noong Nob. 28. Nauna nang tinanggihan ito ng Pre-Trial Chamber I noong Setyembre.

Main Story

Pakana para palayain si Duterte, ‘di uubra

Hindi uubra ang mga pakanang house arrest, interim release at kabi-kabilang disimpormasyon ng kampo ni dating Pangulong Rodrigo Duterte sa International Criminal Court at sa mga kaanak ng kanyang mga biktima.

Courtroom ng International Criminal Court sa The Hague, The Netherlands. International Criminal Court via Flickr
Talasalitaan

Crimes against humanity

Ang mga krimen laban sa sangkatauhan ay madalas na ginagawa bilang bahagi ng mga patakaran ng estado gamit ang armadong puwersa nito o mga puwersang paramilitar.