Pagpapalaya sa mga bilanggo ng ‘isa pang gobyerno’ sa bansa (Mga Larawan)

Karlos Manlupig
October 11, 2011

Mga larawan ng pagpapalaya sa apat na bilanggo ng digmaan, at tatlong bilanggong may kaso laban sa “isa pang gobyerno” sa Pilipinas: ang gobyerno diumano ng rebeldeng NDFP.

Apat na personnel ng Bureau of Jail Management and Penology (BJMP) ang hinuli noong Hulyo 21 ng mga elemento ng rebeldeng New People’s Army (NPA) sa Kitaokitao, Bukidnon habang sinasamahan ang ilang detinido mula Ozamiz City. Pinalaya ng NPA ang detinidong si Dennis Rodenas, habang hinuli at itinuring na prisoners of war (POW), o bilanggo ng digmaan, ang apat na tauhan ng BJMP.

Nitong Oktubre 8, pinalaya na ng mga rebelde ang apat na tauhan ng BJMP sa North Cotabato. Matapos manawagan ang mga kaanak ng apat, gayundin ang ilang lokal na lider at mga grupong pangkapayapaan, nagdesisyon ang NPA at National Democratic Front (NDF) na palayain ang apat sa humanitarian grounds.

Ang apat na POW ng NPA, sa proseso ng turnover sa mga awtoridad ng gobyerno, kabilang si Persida Acosta ng Public Attorney's Office. (Karlos Manlupig)

Nilagdaan ng mga tauhan ng BJMP na bilanggo ng Guerrilla Front 53 ng NPA ang kanilang release orders. (Karlos Manlupig)

Nagsagawa ng checkup ang isang doktor ng lokal na gobyerno kay Jail Warden Erico Dacillo Llamasares matapos ang pagpapalaya sa kanila. Idineklarang "physically fit" si Llamasares, samantalang dalawa naman sa mga detinidong tauhan ng BJMP ang nadeklarang may high blood pressure. (Karlos Manlupig)

Niyakap ni Jail Inspector Murphy Bomoway Todyog, isa sa mga POW mula BJMP, ang isa sa kanyang mga NPA custodian matapos ang pagpapalaya sa nauna sa North Cotabato. (Karlos Manlupig)

(Iklik ang Next page para sa larawan ng pagpapalaya ng mga rebelde kay Lingin Mayor Henry Dano at dalawa niyang eskort na militar.)