Nais pabuksang muli ng mga kaanak ng mga biktima ang kaso ng masaker sa Hacienda Luisita noong Nobyembre 16, 2004.

Nagsampa ng motion for reconsideration sa tanggapan ng Ombudsman kamakailan ang mga kaanak ng biktima ng masaker. Kinukuwestiyon nila ang dalawang resolusyon ng Ombudsman na nagbabasura sa mga kasong administratibo at kriminal laban sa mga inaakusahang maysala sa masaker.

“Taun-taon, nanawagan kami sa opisina ng Ombudsman na aktibong siyasatin ang kaso ng masaker sa (Hacienda) Luisita. ‘Yun pala na-dismiss na lahat ng mga kaso nang wala man lang imbestigasyon at hindi nalalaman ng mga biktima,” galit na sinabi ni Florida Sibayan, tumatayong tagapangulo ng Alyansa ng mga Magbubukid sa Asyenda Luisita (Ambala).

Sabi pa ni Sibayan, sa halip na managot sa nangyaring masaker nabigyan pa ng promosyon si Lt. Gen. Gregorio Pio Catapang bilang chief of staff ng Armed Forces of the Philippines (AFP), gayundin si Col. Ricardo Visaya.

Samantala, ang ilan naman sa mga nagsampa ng kaso tulad ni Ricardo Ramos, pangulo ng Central Azucarera de Tarlac Labor Union o Catlu at Tirso Cruz ng United Luisita Workers Union o ULWU, ay naging biktima ng extra-judicial killings matapos ang masaker.

“Si Aquino, paiyak-iyak pa sa kanyang State of the Nation Address (SONA). Pero wala siyang awa para sa mga manggagawang-bukid na inaapi nila sa Luisita. Sampung taon nang walang hustisya – at pati na ang lupa na ikinamatay ng mga martir, ipinagkakait at inaagaw pa rin sa amin ng ganid na pamilya Cojuangco-Aquino,” sabi ni Sibayan.

Bukod sa kawalang hustisya sa mga biktima ng pagmasaker, patuloy umano ang pagkait ng lupa para sa mga manggagawang bukid at patuloy pa rin ang pandarahas kanila.

Ayon kay Sibayan, “bogus” ang programa sa lupa ng gobyerno. “Nakadisenyo ito para maangking muli ng pamilyang Cojuangco-Aquino ang lupain at manatili ito sa kanilang kontrol,”sabi pa niya.

Inaakusahan din ng Ambala ang pamilya ni Pangulong Aquino na kasama sa kasalukuyang agresibong landgrabbing, pagpapa-alis sa mga magsasaka, paninira ng pananim, panunog ng mga bahay, pambubugbog, iligal na pag-aresto at pagkulong.

Aquino, kasama sa akusado

Sa unang resolusyon, ibinasura ang mga kaso laban sa mga sibilyang inaakusahan tulad ni dating Department of Labor Employement Sec. Patricia Sto. Tomas, Usec. Manuel Imson, Sherriff Francis Reyes at ilang miyembro ng angkang Cojuangco-Aquino. Sa ikalawang resolusyon, ibinasura naman ng korte ang mga kaso laban sa mga militar at pulis kabilang sina Catapang at Visaya.

Kasama sa mga inakusahang sibilyan si Pangulong Aquino na kongresista noon sa Tarlac at dating administrador ng pamilya sa kanilang negosyong asukal.

Kasong multilple murder, multiple frustrated murder, multiple attempted murder, theft at malicious mischief ang isinampa ng mga kaanak at biktima laban sa nabanggit na mga akusado.

Ang motion for reconsideration ay isampa nina Pastor Gabriel Sanchez at Violeta Basilio, mga magulang ng mga pinakabatang biktima ng masakaer na sina Juancho Sanchez at Jhaivie Basilio, kasama si Sibayan na isa sa mga sugatan noon.

Tinulungan sila magsampa ng mga abogado mula sa Sentro para sa Tunay na Repormang Agraryo, National Union of Peoples’ Lawyers, Public Interest Law Center, at Pro-Labor Legal Assistance Center.

Mayroong 52 biktima ang nagsampa noong Enero 2005, pero ibinasura ito sa unang resolusyon ng Ombudsman noong Hulyo 2005, at sa ikalawang resolusyon ng Ombudsman’s Military and Law Enforcement Offices noong Disyembre 2010.

Pitong manggagawang bukid ang namatay sa piketlayn sa asyenda matapos magpaputok ng baril ang mga sundalo, pulis at armadong tauhan ng Hacienda Luisita Inc. noong Nobyembre 16, 2004.