Migrante

OFWs na biktima ng kapabayaan ng gobyerno, nais na ring pagbitiwin si Aquino


Nakiisa ang mga overseas Filipino worker (OFW) na naging biktima sa ibayong dagat sa panawagang magbitiw na sa puwesto si Pangulong Aquino dahil sa pagpapabaya diumano ni Aquino sa mga mamamayan na dumulo sa pagdanak-ng-dugo sa Mamasapano. “Hindi malayo ang naging karanasan ng mga OFW sa nangyari sa Mamasapano,” ani Sol Pillas, tagapagsalita ng Migrante […]

Hawak ni Editha Dacanay ang litrato ng kanyang 25-anyos na anak na si Rose Dacanay. Darius Galang
Nanawagan ang mga OFW at kaanak nila kay Pangulong Aquino na magbitiw na. <b>Darius Galang</b>
Nanawagan ang mga OFW at kaanak nila kay Pangulong Aquino na magbitiw na. Darius Galang

Nakiisa ang mga overseas Filipino worker (OFW) na naging biktima sa ibayong dagat sa panawagang magbitiw na sa puwesto si Pangulong Aquino dahil sa pagpapabaya diumano ni Aquino sa mga mamamayan na dumulo sa pagdanak-ng-dugo sa Mamasapano.

“Hindi malayo ang naging karanasan ng mga OFW sa nangyari sa Mamasapano,” ani Sol Pillas, tagapagsalita ng Migrante International.

Sa isang press conference sa opisina ng Migrante, nagsalita ang mga OFW at mga kaanak nila kumakatawan sa mga biktima ng pandarahas sa ibang bansa at pagpapabaya diumano ng administrasyon habang dinadahas ang mga OFW.

Ang panawagan nila: “Tama na, sobra na, Aquino resign na!”

Mga kuwento ng pighati

Isinaad ni Olivia Ramos ang pagkakakulong niya sa Saudi Arabia dahil sa akusasyong nagnakaw siya ng 100,000 SR sa kanyang amo.

Nagtrabaho siya bilang domestic helper pero madalas na dinadahas at inaabuso ng kanyang amo.

“Inuutusan pa ako na pumunta sa disyerto upang manghuli ng daga,” aniya para mapunuan ang hiling ng amo niyang mahilig mamaril. Pero ginagawa rin siyang “human moving target.” Nakauwi ng bansa si Ramos nito lamang Enero.

Mapait na binalikan ni Noela Garcia ang sinapit niyang hirap bilang domestic helper. Biktima siya ng samu’t saring pagmamaltrato at sexual harrassment.

Bago pauwiin ng Pilipinas si Noela, kinulong siya ng kanyang amo nang 15 araw na walang pagkain.

“Buti na lang may baon akong biscuits. Inuunti-unti ko iyon, pero talagang kulang pa rin,” aniya. Nakaranas siya ng sexual harrassment nang paghubarin siya sa harapan ng kanyang amo bago siya dalhin sa kanyang ahensiya. Nitong Enero din siya nakauwi ng bansa.

Samantala, tila bingi sa mga hinaing na tulong ang gobyerno kay Rose Dacanay, na naging biktima ng illegal recruitment, at kasong murder sa kanyang amo na si Leila Ali, at nakulong sa Malaz Jail sa Saudi Arabia rin.

Pinagbintangan siya na siyang pumatay kay Ali. Pero, aniya, ang totoo’y pinasok ng tatlong kalalakihan ang bahay ng amo niya at pinatay ito, habang tinangka pa siyang halayin.

Hawak ni Editha Dacanay ang litrato ng kanyang 25-anyos na anak na si Rose Dacanay. <b>Darius Galang</b>
Hawak ni Editha Dacanay ang litrato ng kanyang 25-anyos na anak na si Rose Dacanay. Darius Galang

Isinalaysay man niya ang nangyari sa pulisya, sa kanya pa ibinunton ang kasong pagpatay. “Wala akong pagkukunan kundi tulong ng mga kaibigan ko,” saad ng kanyang inang si Editha, na kahit nakilala nang personal si Ezzedin Tago, embahador ng Pilipinas sa bansang iyon, ay hanggang “don’t worry I will help your daughter” na lang umano ang tugon sa kanya.

“Pauwiin na lang ang aming kaanak,” naman ang hiling ni Criselda Balanay, isang nagkaka-edad nang ina ng isang OFW na kasama sa 34 manggagawa ng Rajeh H. Al-Marri & Sons Co sa Saudi.

Ito ang kaso ng mga manggagawang hindi na nababayaran ng kanilang suweldo, at nanganganib na makulong dahil papalapit nang mawalang-bisa ang kanilang iqama (working visa.)

“Ilang beses pa lang sila nagpapadala ng pera sa kanilang mga pamilya. Ang pangako sa kanila, P30,000 kada buwan, ngunit kulang na ito kapag pinapadala nila, dahil sila na rin ang gumagastos sa kanilang pagkain na dapat ay ibinibigay ng kumpanya tulad nang nasa pinirmahan nilang kontrata,” sabi ni Criselda.

Dagdag pa niya na biktima ng double contract ang ilan sa mga manggagawa dahil pumirma na sila ng kontrata sa Pilipinas. Pero kinailangan pa nilang pumirma ng isa pang kontrata sa Saudi.

Pakikiisa sa dalamhati

Sinabi ni Pillas na salamin ng kapabayaan ng administrasyong Aquino, maging ng mga nauna nang administrasyon, ang sinapit ng SAF 44.

Pero diin niya na araw-araw itong sinasapit ng mga kababayan natin na nakikipagsapalaran sa ibang bansa.
Kaya naman nakikiisa ang mga migrante sa paniningil sa anila’y “hugas-kamay” na administrasyon. “Nakikiisa kami sa mga nananawagan para sa katotohanan at pananagutan. Matagal na naming ayaw sa gobyernong ito,” ani Ramos.

“Kahit nakauwi na ang ilan sa amin, patuloy pa rin ang panawagan namin para sa hustisya, pero walang aksiyon ang gobyerno. Kaya natutuwa kaming mas marami na ngayong namumulat at nananawagan na paalisin si Aquino sa puwesto,” dagdag ni Garcia.

Transition council

Kaisa rin ang Migrante International sa pagtutulak na buuin na ang transition council sa senaryo na mapatalsik si Aquino. Binanggit ni Pillas ang kahalagahan nito laluna para sa isang totoong sistema ng demokratikong lipunan.

“Unang una, kailangan nating gawin ito para matanggal si Aquino (sa puwesto). Pangalawa, dahil naniniwala ako na hindi sa isang personahe, isang tao, ang alam kong bubuo – council nga iyan – mahalaga iyon para doon ma-practice ang representasyon ng Pilipinas para magkaroon ng kani-kanyang boses at malaman ang kani-kanyang hinaing,” paliwanag niya.

Sa pagtatapos ni Pillas, binalikan niya ang halaga na ipinatong sa ulo ni Marwan, kumpara sa araw-araw na ibinabahagi ng mga OFW sa kaban ng bayan.

“Siyempre mas malaking halaga ang ipinapasok ng mga OFW sa gobyerno. Bago pa lumabas, P30,000 na agad ang babayaran, bukod pa doon ang iba pang bayarin tulad ng terminal fee,” sabi pa niya.

Sa pinakabagong datos ng Migrante, may $22 Bilyong remitans ang naipapadala sa bansa ng mga OFW sa isang taon.

“$5 Milyon lang iyang [patong sa ulo ni Marwan],” dugtong ni Pillas. “Naniniwala naman ako na kung terorista talaga iyong tao, ay kailangan talagang tugisin, pero hindi sa kapahamakan ng mga mamamayang Pilipino.”