Sana’y sasama, sa unang pagkakataon, ang tinaguriang progresibong mga puwersa sa senatorial slate ng isang tradisyunal na partidong pampulitika. Pero sa halip, pinili ng mga kandidato sa pagkasenador na sina Satur Ocampo at Liza Maza na tumakbo bilang mga independiyente.  Umano’y dahil ito sa paninindigan: ang bagay kung saan din sila unang nakilala bilang mga aktibista at kinatawan ng mga party-list.

Walang kompromiso

Sa isang press conference noong Nobyembre 24, pormal na inanunisyo nina Rep. Ocampo ng Bayan Muna at Rep. Maza ng Gabriela ang kanilang desisyong tanggihan ang pagiging panauhing kandidato ng Nacionalista Party (NP), na si Sen. Manuel Villar ang standard-bearer sa pagkapangulo. Inihayag ng dalawa na “hindi naging katanggap-tanggap” ang pakikipag-alyansa ng NP sa Kilusang Bagong Lipunan (KBL), partidong itinayo ni dating pangulong Ferdinand Marcos.

Anila, hindi nila maaaring makompromiso ang kanilang tindig hinggil sa paghahabol sa nakaw na yaman ng pamilyang Marcos at pagbibigay ng kompensasyon sa mga biktima ng batas militar.

“These are issues that are very important to us and require closure. It would be a grave injustice to the Filipino people to ignore or gloss over them for the sake of political expediency,” pahayag ng dalawa.

Pinormal ng NP at KBL ang kanilang alyansa noong nakaraang taon sa pamamagitan ng isang “Covenant of Alliance.” Inihayag noon ni Villar, kasama ang kandidato sa pagkasenador na si Ferdinand “Bongbong” Marcos Jr., na hindi na dapat pag-usapan pa ang nakaraan at nanawagan na magpokus na lamang sa mga programang kontra-kahirapan.

Pero hindi nakasasapat para kina Ocampo at Maza ang simpleng pagkalimot sa nakaraan, dahil kasama umano sa kanilang plataporma ang good governance o maayos na pamamahala. “Kasama sa good governance ang accountability (o pananagutan). Accountability ni Gloria Arroyo ngayon para sa kanyang ginawang mga krimen laban sa taumbayan, at accountability noon (ni Marcos) dahil hanggang ngayon hindi pa nakakakuha ng hustisya ang mga biktima ng martial law. Walang kompromiso ang isyung ito,” sabi ni Maza.

Bukas pa rin sa pag-eendorso

Kinilala nina Maza at Ocampo na maraming hamon ang pagtakbo bilang mga indipendiyenteng kandidato, sa isang halalang tradisyunal na itinatakda ng makinarya at rekurso ng mga mayor na partidong pampulitika. “But we are going to fight the good fight,” sabi ni Maza, na tatakbo kasama ni Ocampo sa ilalim ng Makabayang Koalisyon ng Mamamayan (Makabayan), na binubuo ng progresibong mga party-list.

Gayunpaman, inilinaw ng dalawang mambabatas na nananatili silang bukas sa pag-endorso ng kandidato sa pagkapangulo o pangalawang pangulo ng oposisyon, kabilang si Villar, sa layuning “maimpluwensiyahan” ang plataporma ng mga ito nang magkaroon ng kongkretong mga panukala para sa pagbabago.

Makikita ang nasabing mga panukala sa 10-puntong prinsipyo at programa ng Makabayan hinggil sa pagbibigay ng kapangyarihan sa mamamayan; mabuting pamamahala; pagpapaunlad ng ekonomiyang maka-Pilipino; pag-ahon ng mayorya mula sa kahirapan; pangangalaga ng kalikasan; pagtataguyod ng pambansang soberanya at pantay na ugnayang panlabas; pagtanggol sa mga karapatang demokratiko; pagpapalaganap ng makabayan, progresibo, at siyentipikong edukasyon at kultura; at pag-abante ng makatarungang prosesong pangkapayapaan.

Ayon kay Ocampo, mahaba pa ang panahon bago ang simula ng kampanya sa Pebrero, at marami pang posibleng maganap na puwestuhang pampulitika. “Ang malinaw sa ngayon ay tumatakbo kami na nakabatay sa plataporma. Bukas kami sa lahat ng gustong sumuporta sa programang ito,” aniya.

Idinagdag ng mambabatas na maaari pang pumihit ang sitwasyon pabor sa progresibong mga puwersang pampulitika, “sa pamamagitan ng mga alyansa na makikinabang ang pagtutulak ng mga reporma.”

Naunsyami man ang pagsasanib-puwersa sa NP, positibo sina Maza at Ocampo na maisusulong ang kanilang kandidatura sa pagka-senador, dahil nasa likuran nila ang iba’t ibang organisasyon at mga mamamayan na gaya nila’y may paninindigan sa mahahalagang isyung kinakaharap ng bayan.