Mga Larawan: Parada kontra sa pamana ni Arroyo, idinaos

"Huwad na Kalayaan" ang mensahe ng iba't ibang progresibong grupo na nagdaos ng parada noong Hunyo 12, Araw ng Kalayaan. Alternatibo ito sa P10-Milyong parada ni Pangulong Arroyo para ipagmalaki ang umano'y mga nakamit ng kanyang administrasyon. Mula sa US embassy, kung saan sinunog ng mga grupo ang watawat ng Estados Unidos bilang simbolo ng neo-kolonyal na relasyon nito sa bansa, nagtungo silang Mendiola. (King Catoy)

Bitbit ng mga lider ang mga plakard at streamer kung saan nakasaad ang adyenda ng taumbayan kay president-elect Benigno "Noynoy" Aquino III. Pangunahin dito ang pagpapanagot kay Arroyo sa kanyang mga krimen. (King Catoy)

Ayon sa Kilusang Mayo Uno, kabilang din sa mga krimen ni Arroyo ang pagpako sa sahod, malawakang tanggalan at kontraktuwalisasyon, at ekstra-hudisyal na pamamaslang sa mga manggagawa.

Sa "float" na ito ng Kalipunan ng Damayang Mahihirap (Kadamay), isinasalarawan ang kahirapan ng milyun-milyong pamilyang Pilipino. Tanda umano ito ng pagiging hungkag ng "magandang ekonomiyang" ipinagmamalaki ni Arroyo. (King Catoy)

Ginamit ng mga kabataan ang pagkakataon para iparating ang malalala ring problema ng edukasyon. (King Catoy)