Malaking tulong ang pagsakay sa tren ng Metro Rail Transit (MRT) para kay Renante Generoso, 27-taong gulang na project specialist sa isang kompanya sa Makati, para sa kanyang sumasahod lamang ng P10,000 kada buwan.

Mula sa kanyang tahanan sa Antipolo, maluwalhati siyang nakakarating sa kanyang pinaglilingkurang opisina. Ngunit  sa napipintong pagtataas ng pamasahe ng tren,  ang libu-libong manggagawang tulad ni Renante ang babalikat sa panibagong pasaning ito.

Bunsod  dito, nagprotesta at naglunsad ng signature drive bilang petisyon ang Kilusang Mayo Uno at Anakpawis Party-list sa estasyon ng MRT sa Cubao, Quezon City.

Binatikos nila ang panukala ng kasalukuyang administrasyong Aquino na itaas ang pamasahe mula sa minimum na P15 tungong P25 ng tren ng Light Rail Transit at MRT (LRT/MRT).

Sa protestang naganap, inilunsad din ng KMU ang Riles, o Riles Laan sa Sambayanan Network,  na binubuo ng ng mga manggagawa at maralita na siyang pangunahin  at kalakhang tumatangkilik sa serbisyo ng tren.

Ayon kay Sammy Malunes,tagapagsalita ng RILES Network, ang pagtataas ng pamasahe sa MRT ay upang maipakita sa pribadong mga korporasyon na makikinabang sila kung mamumuhunan sa serbisyo ng tren sa Metro Manila.

“Ang MRT, LRT, at ang buong sistema ng tren sa kabuuan ay serbisyo publiko at dapat na manatiling ganito, lalo na sa panahong ito na nabibigatan ang publiko sa pagtaas ng mga presyo at kaawa-awang sahod,” paliwanag ni Malunes.

Idinagdag pa ni Malunes na malinaw na para lamang sa tubo ang pagsasapribado sa MRT, at hindi para sa pampublikong-serbisyo na siyang pangunahing batayan nito ng kanyangn operasyon.

Sang-ayon naman ang karamihan sa mga mananakay ng MRT sa panawagan ng Riles na hindi dapat itaas ang pasahe dito.

“Ang dapat gawin ng gobyerno ay ibaba ang pamasahe ng tren, kasi di naman tumataas ang sahod, pahirap sa amin ang pagtaas ng pamasahe,” sabi ni Renante, habang pumipirma siya sa petisyon ng Riles.

Ganito din ang hinaing ng isang supervisor sa isang kompanya sa Makati na si Cynthia Abesamis,30  taong gulang.  “Mapipilitan kaming sumakay sa bus, kahit naman mayroon kaming trabaho, ang daming taxes na aming binabayaran. Malaking kabawasan na din sa amin  kung itataas ang pamasahe sa MRT,”  hinaing ni Cynthia.

“Kung ang pamasahe sa tren ay tataas ng hanggang sa P25, tulad sa nais ng pamahalaang Aquino, magbabayad ang isang manggagawa na kumikita ng minimum, at sumasakay araw-araw nang hindi bababa sa P50 para sa transportasyon,” paliwanag ni Malunes, dating manggagawa at nagsilbing presidente ng unyong  Pinag-isang lakas ng Manggagawa sa Metro-LRT(Piglas-LRT), sa ilalim ng KMU noong 1995-2000.

Kung gagatos siya sa simpleng pananghalian sa halagang  P50, pagpapatuloy ni Malunes, magkakagastos siya ng  P100 para  isang araw na pagpasok sa trabaho.

“Nangangahulugang 1/4  ito ng kanyang P404 na minimum na sahod.  Paano pagkakasyahin  ng mga manggagawa  ang kanilang sahod para sa gastusin ngkanilang pamilya tulad ng pagkain, kuryente, tubig, pangmatrikula ng kanilang mga anak at iba pang gastusin?” ani Malunes.

Idinagdag  pa ng  Riles na sa halip na kunin sa manggagawa ang pinaghirapan nilang kita, dapat umanong baliktarin ng gobyerno ang kalakaran: Dapat itong magbigay ng higit pang serbisyong panlipunan, at dapat na isama ang pangmasang  transportasyon sa pamamagitan ng LRT at MRT.