Ang paglilitis kay Chief Justice Corona: Para kanino?

January 25, 2012

Nakapako ang paningin ng buong sambayanan ngayon  sa nangyayaring impeachment trial ni Chief Justice Renato Corona. Para itong telenobelang pinagtuunan ng pansin ng publiko. Sari-saring kuro-kuro ang maririnig natin sa paglilitis na ito. Hindi ring maiwasang ipaghambing ng taong-bayan kung sino ba ang mas magaling sa mga personaheng sangkot sa impeachment trial.

Batay sa nasaksihan ng lahat, mas nakakalamang ba ang prosecution o mas lamang ang defense lawyers? Nananalo ba ang grupo ni Congressman Neil Tupas o mas panalo  ang kay Retired Justice Serafin Cuevas? Ang sagot naman ng nakausap kong barbero ay mali silang lahat. Ang tunay na panalo at magaling daw ay si Sen. Enrile, nakangiting sabi niya.

Sa kabila ng lahat, pinagtitiyagaang ipaliwanag ng administrasyong Aquino na kailangang nito gawin ang impeachment trial bilang pagtahak sa “tuwid na daan.” Kaugnay ito ng programa ni Aquino laban sa  korupsiyon o katiwalian sa gobyerno. Ang korupsiyon, ayon sa kasalukuyang administrasyon, ay siyang sanhi ng pagkabaon ng ating bansa sa kahirapan. Kaya upang ipakita ang mahigpit na pagtutol nito sa anumang katiwalian sa gobyerno, kailangang magbigay ng ehemplo si Pang. Noynoy sa pamamagitan ng pagtanggal kay Chief Justice Corona. Sa madaling sabi, ang paglilitis sa Punong Mahistrado ay para sa mga mamamayan.

Ayon naman sa kampo ng oposisyon, walang sapat na ebidensiya upang sibakin ang Chief Justice. Galit lang  daw ang Pang. Noynoy dahilan sa Hacienda Luisita kung kayat pina-impeach nito ang Punong Mahistrado.

Nakakalimutan ng karamihan na ang kasalukuyang impeachment trial ay labanan lamang ng dalawang paksiyon ng naghaharing uri at hindi totoong laban ng naghihirap na sambayanan. Kung maaalis ba natin sa puwesto si Justice Corona ay madadagdagan ang ulam na inihahain ng ating mga kababayan sa kanilang mga hapag-kainan? Ito ba’y mangangahulugan ng dagdag na trabaho para sa ating mga kababayan na ngayon ay walang mapapasukan? Ito ba’y magiging sanhi ng pagbaba ng presyo ng kuryente, tubig, langis, LPG, bigas, isda, at iba pang pangunahing bilihin?

Kalunus-lunos ang kalagayan ngayon ng ating bansa. Sa kasalukuyan, tinatantiyang 11.6 milyong Pilipino ang walang trabaho o may trabaho ma’y naghahanap pa ng dagdag na trabaho. Ang ating minimum wage ay sobrang baba at nakakatugon lamang ng wala pa sa kalahati o 43% ng batayang pangangailangan ng isang pamilya. Mababa rin ang halaga ng pera. Sa katunayan, ang totoong halaga ng minimum wage sa NCR ay umaabot lamang ng P245.00 kung maging batayan ang presyo noong taong 2000.

Dahil dito, marami sa ating kababayan ang napipilitang mangibang bansa upang makapaghanap ng disenteng trabaho. Tinatantiyang hindi bababa sa 4,000 Pilipino ang napipilitang mangibang bansa bawat araw.

Sa kabila nito, hindi nababawasan ang tubo ng dayuhang mga korporasyong nagnenegosyo sa ating bansa. Bagama’t nagrereklamo ang ating lokal na mga  negosyante, tuloy pa rin ang kanilang pamumuhunan at dominanteng posisyon sa ating lipunan. Kabaliktaran ito sa kalagayan ng ordinaryong mga mamamayan na halos wala na ngang makain ay pinagkaitan pa ng tulong ng gobyerno dahil sa malaking pagbawas ng badyet sa edukasyon, kalusugan, imprastaktura, at serbisyong panlipunan sa ilalim ng administrasyong Aquino.

Epekto ito ng  patakarang liberalisayon, pribatisasyon at deregulasyon sa ilalim ng neoliberal na sistemang dati nang pinapairal ng nakaraang mga administrasyon at ngayon ay masugid pa ring ipinapatupad ng rehimeng Aquino. Bakit patuloy pa ring pinapairal ang mga patakarang ito sa ating bansa ng kasalukuyang administrasyon kahit na ito ay kontra-mamamayan?

Ito ay dahil sa hawak ng mayayamang negosyante, panginoong maylupa at banyagang mangangalakal ang ekonomiya ng bansa. Minorya lamang sila ngunit  halos lahat ng kayamanan ng ating bansa ay nasa kanilang mga kamay. Pati ang pulitika ng ating bansa ay hawak nila. Tinitiyak nila na ang mga patakarang nilalabas ng ating pamahalaa’y laging umaayon sa kanilang interes bagama’t salungat ito sa interes ng nakakaraming mamamayan. Mahalintulad natin ang istruktura ng ating bansa sa isang tatsulok,  kung saan ang katiting na naghaharing uri ang nasa itaas at ang higit na maraming mamamayang inaapi  at pinasasamantalahan ay nasa ibaba.

Ang impeachment trial ba ni Chief Justice Corona ay sisira sa kapangyarihang ito ng mga panginoong maylupa, malalaking negosyante at dayuhang mangangalakal? Ang sagot ay hindi. Kaya, maalis man si Justice Corona ay patuloy pa ring nakalubog sa hirap ang ating mga mamamayan. Kahit alisin man natin ang isang daang Renato Corona, hanggat patuloy ang pag-iral ng mga maka-kapitalistang  patakaran ng lipunan, ay patuloy na maghihirap ang sambayanan.

Hindi natin sinasabi na hindi dapat alisin si Chief Justice Corona. Kung talagang may kasalanan siya ay dapat siyang alisin. Ngunit wala tayong ilusyon na dito matatapos ang kalbaryo ng bansa. Para makamit ito, dapat wakasan ang kontrol ng mayayamang negosyante, panginoong maylupa at dayuhang mangangalakal sa ating lipunan. Dapat ding tapusin ang patakarang liberalisasyon, deregulasyon at pribatisasyon na matagal nang nagpapahirap sa mga mamamayan. Dapat nating baliktarin ang tatsulok at ilagay ang mahihirap sa tuktok.

Kung magawa natin ito, saka lamang natin masasabi na daang matuwid nga ang ating tinatahak.