Muling giniit ng mga manggagawa na ipasa ang panukalang batas na P125 across-the-board na dagdag-sahod na matagal ng nakabinbin sa Kongreso.

Kung maipapasa ang House Bill 375 bago magsara ang sesyon ng Kongreso ngayong Disyembre, ito na marahil ang pinakamagandang regalo sa mga naghihirap na manggagawa sa buong kapuluan, ayon sa Kilusang Mayo Uno (KMU).

Sa pahayag ng KMU, tumintindi ang nararanasang kagutuman ng maraming mamamayan kaya’t  lubhang kailangan ng kagyat na ginhawa mula sa nagtataasang mga presyo ng bilihin at serbisyo.

Ibinigay na halimbawa ng grupo ang sarbey ng Social Weather Station (SWS) para sa ikatlong kuwarto ng taon na may pagtaas nang 21% ang nakakaranas ng gutom.

Iniulat naman ng International Labor Organization (ILO) na nagpapakitang relatibong mas maliit ang sahod ng mga Pilipino kumpara sa ibang mga bansa at nasa poverty line ang mga manggagawang Pilipino na nabubuhay lamang sa US$2 kada araw.

“Kung maipapasa ang P125 wage hike bill, isa ito sa pinakamagandang regalo ng mga mambabatas para sa mga manggagawa sa buong bansa,” sabi ni Elmer Labog, tagapangulo ng KMU.

Sinabi pa ni Labog na maaaring makahabol ang sahod sa walang humpay na pagtaas ng presyo sa mga nagdaang taon.

Ganito rin ang hinaing ng grupo ng kababaihan na humaharap sa pagbabadyet sa kakarampot na sahod.

“Siyempre, interes ng kababaihan na tumaas ang sahod, at sa tradisyon na magpapasko ngayon lalong nararamdaman ang krisis,” sabi ni Gabriela Rep. Emmi de Jesus.

Sinabi pa ni De Jesus na kahit paano’y gumagastos din ang mahihirap na mga manggagawa sa panahon ng kapaskuhan.

“Ito rin yung panahon na kahit paano’y magkaroon ng konting salu-salo ang mahihirap na mga pamilya, mabilhan ng bagong damit ang kanilang mga anak,” aniya.

Giit pa niya na kailangang madagdagan ang sahod ng mga manggagawa laluna’t dinagdagan pa ng mapanirang kalamidad ang maraming bayan sa Mindanao.

“Kung nais ng mga mambabatas na gumawa ng kabutihan para sa mga manggagawa, dapat nilang ipasa agad ang P125 wage hike bill,” sabi naman ni Labog.

Panawagan naman ni Anakpawis Rep. Rafael Mariano na dapat bigyan din ng prayoridad ng Kongreso ang HB 375 tulad ng prayoridad na ibinigay sa Reproductive Health Bill at Freedom of Information Bill laluna’t ilang araw na lamang ang sesyon ng Kongreso.

“Ilang araw na lamang ang natitira sa 15th Congress, pero nakabinbin pa rin sa komite ang HB 375.  Paubos na ang oras. Dapat talakayin din ng Kongreso ang mga batas na may halaga sa buong bansa at ipasa ang mga ito,” ani Mariano.

Ngunit sa kabila ng panawagan, dismayado naman sila sa pagkabalaho ng panukalang batas sa  Committee on Labor and Employment ng Kamara.

Kinondena ng KMU si Northern Samar Rep. Emil L. Ong, pinuno ng komite, sa hindi mabilisang pagproseso ng huli sa HB 372 para makarating sa plenaryo bago magsara ang sesyon ng kongreso sa Disyembre 19.

Sinabi ng KMU na unang sinabi sa kanila ni Ong na hindi na kailangan ang isa pang konsultasyon para sa kalakhang Luzon at handa na ang komite na isumite ang resolusyon para sa deliberasyon sa plenaryo.

Pero nagbago umano ang posisyon ni Ong noong nakaraang Nobyembre at sinabing kailangan pa rin ang Luzon-wide consultation. Pero hindi naman daw nito inasikaso na magkaroon ng konsultasyon sa kabila ng panawagan ng mga grupo na ilunsad ang konsultasyon bago magsara ang kongreso.

“Inuna pa ni Ong ang panonood sa laban ni (Manny) Pacquiao sa Las Vegas, sa halip na asikasuhin ang pagpasa sa P125 wage hike,” sabi ni Labog.

Ayon pa sa grupo, kung tutuusin kaya pa daw ilabas ang pinal na resolusyon batay sa tatlong naunang konsultasyon (National Capital Region, Visayas at Mindanao) dahil hanggang Disyembre 20 pa ang pasok ng mga mambabatas at ang sesyon lang sa plenaryo ang magsasara sa Disyembre 19.

“Mukhang intensiyon niya (Ong) na tapusin ang 15th Congress na hindi naipapasa ang P125 wage hike,” sabi pa ni Labog.

Pinangangambahan din nilang maetsa-puwera ang pagpasa sa dagdag-sahod sa pagpasok ng taong 2013 dahil sa mid-term election.

“Alam naman natin na abala na ag mga mambabatas sa kanilang kampanya pagpasok ng taong 2013. Produktibo na lang ang Kongreso hanggang ngayong disyembre,” dagdag pa ni Labog.

“Hindi na mahihintay ng mga manggagawa ang 16th Congress sa Hulyo ng susunod na taon.  Kailangan  na maipasa ngayon ang isang legislated wage increase,” sabi naman ni Mariano.