Pride March kontra diskriminasyon, pandarahas sa LGBT muling isinagawa
Dagsaan ang mga tao at iba’t ibang organisasyon sa Makati City noong Disiyembre 8 para muling isagawa ang ika-18 Pride March ng komunidad ng Lesbian, Gay, Bisexual and Transgender sa Metro Manila. Mahigit sa 30 grupo ng LGBT at higit sa 1,000 indibiduwal ang dumalo sa nasabing pagdiriwang, na may temang “Sari-Sali: Pride in Action”. […]
Dagsaan ang mga tao at iba’t ibang organisasyon sa Makati City noong Disiyembre 8 para muling isagawa ang ika-18 Pride March ng komunidad ng Lesbian, Gay, Bisexual and Transgender sa Metro Manila.
Mahigit sa 30 grupo ng LGBT at higit sa 1,000 indibiduwal ang dumalo sa nasabing pagdiriwang, na may temang “Sari-Sali: Pride in Action”.
Hinikayat ng mga organizer sa Task Force Pride (TFP) Philippines ang mga indibidwal, miyembro man ng mga LGBT na grupo o hindi, na suportahan ang laban nila kontra sa diskriminasyon at pagkilala na produktibong bahagi sila ng lipunan.
Pagkakaisa vs diskriminasyon
Ayon sa TFP, “The Pride March promotes participation and inclusivity, not only from within the LGBT groups but also from non-LGBT allies who showed their support for gender equality.”
Kabilang sa lumahok sa martsa ngayong taon ang mga miyembro ng Progay Philippines, na kinikilalang pioneer ng Pride March sa Pilipinas noong 1994.
“Matapos ang 18 taon ng pagmartsa at pagsigaw para sa ating mga karapatan, wala pa rin tayong batayang batas na gumagarantiya sa kalayaan ng LGBT mula sa diskriminasyon,” paliwanag ni Goya Candelario, tagapagsalita ng Progay.
Binatikos ni Candelario kapwa ang gobyerno ni Pangulong Aquino at ang dominanteng liderato ng simbahang Katoliko sa pagharang sa panukalang batas na titigil sa diskriminasyon batay sa kasarian.
Sinabi rin ng Progay na apektado rin ang mga bading sa unti-unting pag-abandona ng administrasyong Aquino sa mga serbisyong panlipunan, kabilang ang serbisyo sa kalusugan at edukasyon.
Nangangamba umano sila na sa pagsasapribado ng serbisyong pangkalusugan, lalong liliit umano ang pondo-publiko para sa treatment ng maraming sakit, kabilang ang Humano Immunodeficiency Virus o HIV.
Adbokasiya sa LGUs
Ginanap ang Pride March alinsabay ng Human Rights Consciousness Week at National Lesbian Day. Ayon din sa TFP, pinili nila ang Makati City para umakit pa ng mas maraming “mainstream audience.”
“We also wanted to encourage participants to sign the petition to have an anti-discrimination ordinance in Makati,” pahayag ni Tao Aves, tagapagsalita ng TFP.
Sa pamamagitan ng Pride March, layunin ng TFP na kunin din ang atensiyon ng local government units (LGU), business sectors at educational institutions at hingiin ang mga suporta nito para protektahan ang karapatan ng mga LGBT sa pamamagitan ng pagtaguyod ng mga ordinansa at patakarang maka-anti-discrimination.
Hinikayat din nila ang mga indibiduwal na suportahan ang mga kinatawan ng LGBT sa gobyerno.
Masayang programa
Naging magarbo ang pagdiriwang ng ika-labing-walong taon ng Pride March. Napuno ito ng mga aktibidad tulad ng parada na nagsimula sa Makati City Hall, paikot ng Dr. Jose P. Rizal Avenue at balik muli sa city hall.
Matapos hikayatin ng Gabriela ang mga dumalo na suportahan ang kanilang kampanyang “One Billion Rising” sa Pebrero 14, 2013, sinayaw nila ang sayaw ng kampanya na naglalayong singilin ang mga gobyerno ng mundo ka kawalan nila ng aksiyon sa karahasan sa kababaihan.
May paligsahan ding naganap para sa Best Float, Best Costume at iba pa.
Nagwagi ang Philippine Atheists Association bilang Best Float at si Paul John Presado o mas kilala sa tawag na “Hunter” ng Polytechnic University of the Philippines at Trippers Philippines ang tinanghal na Best Costume.
Ilan sa mga larawan ng Pride March ngayong taon: