Nanganganib ngayong mapatalsik mula sa Eulogio “Amang” Rodriquez Institute of Science and Technology (Earist) ang limang lider mag-aaral at masuspinde ang 15 na iba pa na nanguna sa mga serye ng protesta laban sa P1,000 development fee na ilegal umanong sinisingil sa mga estudyante.

Kabilang sina Philip Bautista (presidente), Teddy James Angeles (bise-presidente) at Alyssa Mae Baliguat (treasurer) ng Institute Student Government, Jaime Pilipiña Jr. (vice chairperson ng Katipunan ng mga Mag-aaral at Organisasyon o Kamao) at si Ram Carlo Bautista (over-all chairman ng College of Business Administration Student Council) sa mga nahaharap sa dismissal.

Nahaharap naman sa limang araw na suspensiyon at warning for dismissal ang 15 iba pang mag-aaral.

Ayon kay Bautista, binasahan sila ng dekano ng Office of the Students Affairs noong Enero 17 ng draft letter na nagsasaad ng dismissal nila at suspensiyon iba pa–dahil may nilabag umano sila sa student handbook.

Pero nanindigan sina Bautista na lehitimo at karapatan nila ang kanilang mga isinagawang pagkilos laban sa nasabing ilegal na bayarin.

Pinag-initan ng admin

Malaki naman ang paniniwala ng mga mag-aaral na pinag-iinitan sila ng administrasyon ng Earist. Isiniwalat kasi nila ang anila’y “ilegal” na pangungulekta ang development fee na sinisingil sa mag mag-aaral sa mga nasa first at second year.

Sa naging kilos-protesta noong Nobyembre 26 na nilahukan ng may 5,000 mag-aaral na nagwalk-out mula sa kanilang mga klase, inihayag ng mga lider-estudyante na patuloy pa rin ang pangungulekta ng development fee.

Taliwas daw ito sa naging kasunduan ng administrasyon at mga lider-mag-aaral na wala na dapat sisingilin ang admin na development fee mula sa mga mag-aaral. Pero pinalitan lamang daw ng admin ang pangalan ng development fee na naging ‘construction of new building fee’ nitong 2^nd semester ng 2013-2014, ayon kay Pilipiña sa panayam ng Pinoy Weekly.

“Nagpasa na kami noon pa ng chronology of events sa admin at sa CHED (Commission on Higher Education) tungkol sa development fee kasama na ang minutes of meeting na nagsasaad na dapat wala nang development fee (na kinokolekta) para sa taong 2013-2014. Pero naniningil pa rin sila, pinalitan lang ang pangalan,” ayon kay Pilipiña.

Dagdag ni Pilipiña, apat na ang kanilang natanggap na explanatory letters mula sa admin para kanilang ipaliwanag ang mga isinagawang protesta.

“Hindi namin kailangang ipaliwanag sa written form ang karapatan naming magprotesta at tuligsain ang alam naming mali na ginagawang pangungulekta ng admin sa mga estudyante,” ayon kay Bautista.

Una nilang natanggap ang naturang explanatory letter matapos ang malaking walk-out ng mga mag-aaral noong Nobyembre 26. Nitong  Enero 22 naman nila natanggap ang ika-apat. Nakasaad dito na binibigyan sila ng 72 oras para sagutin. Kung hindi sila makakasagot, maaaring matuloy na ang dismissal at suspensiyon nila, ani Pilipiña.

Sinabi naman ni Bautista na noong Nob. 17 raw nang makakuha sila ng mga dokumento na nagpapatunay na nariyan pa rin ang development fee. Noong Nob. 19, hindi dininig ang kanilang mosyon para maibasura ito, kaya humantong sila sa pagkilos noong November 26.

Malinaw na represyon

Binatikos naman ng militanteng grupo ng kabataan na Anakbayan ang administrasyong ng Earist sa panunupil umano sa 20 mag-aaral at patuloy na represyon sa loob ng kampus nito.

“Kinokondena namin ang maramihang pagpapaalis ng mga mag-aaral sa eskuwelahan bilang akto ng pampulitikang panunupil sa kampus…Hindi katanggap-tanggap na sa lahat ng mga eskuwelahan, isang state university ang tatapak sa batayang karapatan ng mga mag-aaral sa kanilang kalayaang magpahayag at magpayapang magtipon,” sabi ni Vencer Crisostomo, tagapangulo ng Anakbayan.

Para kay Bautista, maling desisyon ang ipinakita ng administrasyon sa mga mag-aaral na gipitin sila; mas lalo lamang umanong ipinakikita nito sa mga estudyante ang kanilang desperasyon.

“Sa apat na taon ko po sa Earist, maraming protesta na ang naganap dito. Pero ngayon, sa tingin namin natakot ang admin sa dami ng nakilahok sa estudyante. Sa palagay namin, desperadong hakbang ito ng admin,” sabi pa ni Bautista.

Dagdag pa niya, hindi papayag ang mga estudyante na ang lehitimong pakikipaglaban nila laban sa development fee ang magpapaalis sa kanila sa Earist.

“Hindi kami private school para kunin sa mga mag-aaral ang pagpapatayo ng anumang gusali. Tungkulin ng Earist na pag-aralin ang pinakamahihirap na mag-aaral at dapat samahan kami ng admin na manawagan nang mas mataas na badyet para sa edukasyon,” ayon kay Bautista.

Lumapit na ang nasabing mag-aaral sa Kabataan Party-list para matulungan sila sa kanilang laban. Nakatakda na umanong makipagharap si Kabataan Rep. Terry Ridon sa administrasyon ng Earist tungkol dito, ayon kay Bautista.

Sinikap kunin ng Pinoy Weekly ang panig ng mga administrador ng Earist. Pero hanggang sa pagkakasulat ng artikulo, hindi nila pinauunlakan ang mga tawag sa telepono ng manunulat.