Sa kalagitnaan ng talumpati ni Pangulong Benigno Aquino III para Araw ng Kalayaan na ginanap sa Lungsod ng Naga sa Camarines Sur, napahinto siya kanyang pagsasalita dahil sa pagsigaw ng ilang kabataan.

Isa sa kanila ang hinuli ng mga tauhan ni Aquino sa Presidential Security Group (PSG) at kasalukuyang humaharap sa mga kasong tumults and other disturbances of public order at assault upon an agent of a person in authority. Siya si Pio Emmanuel “Em” Mijares, estudyante ng Psychology sa Ateneo de Naga University at miyembro ng Anakbayan at Kabataan Party-list. Siya rin ang pangkalahatang-kalihim ng Youth Act Now-Bicol.

“Nandoon kami para i-celebrate ang Independence Day. Pero hindi rin kami nandoon para tumango na lang at umoo nang umoo sa mga sinasabi niya (ni Aquino) na kesyo nagbago na daw at maganda na ang buhay ng mga Pilipino,” kuwento ni Mijares.

Nakita nila na perpektong pagkakataon ang pagdating ni Aquino para malapitang idulog sa Pangulo ang kanilang hinaing.

“Isa pa sa nagtulak sa amin para gawin iyon–nakikita namin na maraming mali. Sa sektor pa lamang ng edukasyon, nawawalan ng priority sa paglalaan ng badyet, sa pagpigil ng pagtaas ng matrikula, sa pagdagdag ng klasrum. Kung kaya, hindi mo rin masasabi na hindi valid ang nais naming irehistro noong araw na iyon,” sabi ni Mijares.

Pansamantalang nakalaya si Mijares matapos siyang magpiyansa ng P8,000.

Walang balak na sumigaw

Kasama ng iba pang kabataan, tinatayang nasa 40 hanggang 50 metro ang layo nila Mijares noong nagsasalita si Aquino.  Nagtaas umano siya ng plakard na “Edukasyon para sa lahat” at walang intensyong sumigaw talaga.

“’Yung pagsigaw, reaction na lang siya doon sa nangyaring violent na pagdakip sa akin. Wala talagang intensyon na sumigaw. Hindi totoo na nauna ‘yung sigaw tapos hinuli na ako,” aniya. Matapos niyang itaas ang plakard, inagaw ito ng pulis at kinaladlad na siya palayo. Nung tangkain pa sana niya ulit magladlad ng isa pang plakard, pinadapa na siya ng mga tauhan ng PSG.

“May naramdaman akong suntok at kalmot, pero hindi ko ramdam na masakit siya noon. Noong nangyari iyon, sinabi ko na ‘sasama ako sa inyo’. Willing akong sumama. Kasi the fact na nagtaas lang kami doon at wala talaga kaming balak sumigaw, sana ineskort na lang kami sa venue palayo,” sabi pa ni Mijares.

Hindi rin umano siya ang sumigaw ng “Pork barrel king, patalsikin“ kundi isa marahil sa kanyang mga kasamahan na sumigaw din. Pero siya lamang ang dinampot ng mga pulis.

Kasabay din ng araw na iyon ang malawakang pagkilos ng iba’t ibang sektor sa bansa para ihayag ang paglaban sa sistema ng pork barrel maging ang presidential pork barrel.

Kuwento pa ni Mijares, hindi siya nanlaban nang idinapa siya. Pero sinuntok diumano siya sa kanyang likuran ng mga humuli sa kanya–kahit na matiwasay na siyang sumasama sa kanila.

“Nung kumapal na ang tao, sumigaw ulit ako (na) ‘Walang pagbabago sa ilalim ni Aquino.’ Nung sa kalagitnaan na sinisigaw ko iyon, yung dalawang banner, binilog at isinalpak sa bibig ko,” ayon kay Mijares.

Ayon sa mga ulat sa midya, matapos siyang hulihin ng PSG ay ipinasa si Mijares sa pulis para ikulong at kasuhan.

Dinala siya ng mga pulis sa presinto. Doon, naging antagonistiko sa kanya ang halos lahat ng mga pulis. Hindi umano siya pinayagan na kontakin niya ang kanyang abogado para madepensahan siya. Pinilit pa siyang posasan ng mga pulis. Hindi rin siya iniharap sa paralegal na agad na sumaklolo sa kanya.

Nakiusap si Mijares na alisin ang kanyang posas dahil di naman daw siya tatakbo. Hindi rin siya pinayagan na makapag-CR dahil naiihi na siya.

Nasa 32 oras nakulong si Mijares bago pansamantalang nakalaya matapos makapagpiyansa.

Magsasampa ng kontra-kaso

Sa kabila ng kasong kinakaharap niya, nakatakda namang pagsampa ng counter charges ang kanilang kampo.

Ayon kay Vince Casilihan ng Karapatan-Bicol, tatlo ang kanilang kasong isasampa laban sa kapulisan at mga humuli sa kanya. Isa rito ang hindi pagdala kay Mijares sa judicial authority dahil lumampas na siya sa 12 oras na pagkakakulong. Ikalawa, police brutality sa pananakit at paraan ng pang-aaresto sa kanya. Ikatlo, magfi-file din sila ng motion to suspend proceedings, dahil hindi pwedeng mawala kung karapatan ng isang akusado sa pag-i-inquest.

Magfi-file umano ang Karapatan at National Union of People’s Lawyers sa Ombudsman at Commission on Human Rights para magkaroon ng imbestigasyon.

“Eight times kaming hinarangan bago siya narating. Pinipigilan kaming makarating at makapag-fact finding o maka-QRT (quick response team) sa kanya. Matagal kami bago nakarating. Ako nga hindi na ako na sini-single-out ako ng PSG (Presidential Security Group) na hindi ko makapunta,” ayon kay Casilihan.

Naniniwala sina Casilihan na gawa-gawa ang kasong isinampa kay Mijares.

“Sa tingin namin talaga, may hold ang Malakanyang, at nakikialam talaga ang pangulong ito sa kasong ito,” ayon kay Casilihan.

Nagsagawa naman ng online campaign ang mga tagasuporta ni Mijares para manawagan sa kanyang agarang pagbasura sa kanyang mga kaso.

Pero higit pa rito, ikakampanya nila ang laman ng mga plakard at sigaw ni Mijares: ang paglalantad sa tunay na katangian ng kasalukuyang Pangulo at sistema. At ang kawalan ng tunay na kalayaan sa bansa.