Muling sumalubong sa mga mag-aaral sa unang araw ng pasukan ang dati nang mga problema sa eskuwelahan gaya ng kakulangan ng mga silid-aralan, mga upuan, mga libro, at mga guro.

Sa pagkakataong ito, sinalubong din ng mga guro sa ilalim ng Alliance of Concerned Teachers (ACT) ang unang araw ng pasukan ng isang protesta–isang paggiit sa administrasyong Aquino na dagdagan ang suweldo ng mga guro at taasan ang badyet sa sektor ng edukasyon.

Sinabi ng mga lider-guro ng ACT na walang bago sa kalagayan ng krisis sa sektor ng edukasyon. Pinabulaanan nila ang mga pahayag ng administrasyong Aquino na nabibigay ng gobyerno ang sapat na rekurso at pasilidad para sa mga estudyante at pampublikong mga eskuwelahan.

Sa paanan ng Palasyo

Sinugod ng mga guro at mag-aaral ang Malakanyang para singilin ang administrasyong Aquino sa “pagpapabaya sa sektor ng edukasyon.”

Isang raling iglap ang isinagawa ng mga guro sa Gate 7 ng Malakanyang nitong Hunyo 2 para sa kanilang panawagang dagdag sa sahod na patuloy na ipinagkakait ng adminstrasyon Aquino.

“Pagpapahayag ito ng galit ng mga guro sa aming panawagan para sa nakabubuhay na sahod. Mula nang maupo sa puwesto si (Benigno) Aquino III, walang anumang narinig ang mga guro mula sa kanya tungkol sa aming panawagan,” ani Benjamin Valbuena, tagapangulo ng ACT.

Panawagan ng ACT na itaas ang sahod ng mga guro sa P20,000 mula P18,549 at P15,000 mula P9,000 para naman sa mga kawani.

Binatikos din nila ang administrasyon sa tangkang pagtaboy sa mga guro na nagprotesta sa Malakanyang. Anila, imbes na hayaang makapagprograma, marahas umano silang itinaboy ng mga pulis. Maging ang mga babaeng guro ay nasaktan.

“Pinipilit kaming itulak kahit kaming mga babae na teachers. Hindi nagawang pakiusapan ang mga pulis,” ayon kay Jocelyn Martinez, isa sa mga gurong nasaktan.

Tinugunan din ng mga guro sa iba’t ibang parte ng Pilipinas ang protesta para sa dagdag-suweldo at karagdagang badyet para sa edukasyon.

Samantala, nagmartsa naman ang mga mag-aaral sa paanan ng Mendiola sa Maynila para ipanawagan ang pagbabasura sa programang K+12 (Kindergarten + 12 taon), pagbaba ng matrikula, at dagdag na badyet para sa edukasyon.

Problemang pinagtatakpan

Nag-ikot sa unang araw ng pasukan si ACT Teachers Rep. Antonio Tinio sa unang araw ng pasukan.

Ayon kay Tinio, nanatili pa rin ang problema sa mga pampublikong eskuwelahan sa kabila ng pahayag ng Malakanyang at Department of Education (DepEd) na kanila na umanong natutugunan ang mga kakulangan sa sektor ng edukasyon.

“Nakikita natin na nariyan pa rin ang mga dati ng problema tuwing pasukan. Siksikan pa rin ang mga estudyante dahil hindi lamang kulang ang mga silid-aralan kundi kulang ang mga eskuwelahan,” ani Tinio.

Sinabi pa ni Tinio na apat sa sampung kabataan na nasa edad mula 13 hanggang 19 na taon ang wala o hindi nakatutuntong ng hiskul.

Binigyan naman ng bagsak na marka ng mga mag-aaral si Aquino. Sa halip na mapaunlad umano ang sektor ng edukasyon ay mas pinalala ito ng mga polisiya ng administrasyon.

“Unang araw pa lang ng klase, bagsak na agad ang gradong ibinibigay ng kabataan kay Pangulong Aquino. Bagsak sa pasilidad, bagsak sa curriculum, at bagsak sa pagsagot sa lumulobong presyo ng matrikula,” pahayag ni Kabataan Rep. Terry Ridon.

Kabilang sa mga polisiya ang K+12 na dagdag dalawang taong sa pag-aaral at ang Government Assistance to Students and Teachers in Private Education (Gastpe) para paluwagin (“decongest”) ang pampublikong mga paaralan.

Ayon sa League of Filipino Students (LFS), maliban sa dagdag na gastusin ang K+12, hindi din ito tumutugon sa pangangailangan ng bansa kundi para sa mga kapitalista at dayuhang bansa na nangangailangan ng murang-lakas paggawa.

“Ginagawa lahat ng administrasyong Aquino para ibenta ang kanyang kabataan,” ayon kay Charlotte Velasco, tagapagsalita ng LFS.

Ayon naman sa ACT, minadali ang pagsasanay para sa mga guro at nananatili pa ring kulang ang mga modules para sa K+12.

Hindi naman umano tinutugunan ng Gastpe ang isyu sa kawalan ng pasilidad at guro. Katunayan, pinopondohan umano ng gobyerno ang pribadong sektor imbes na magbigay ng pondo sa publikong paaralan, ayon kay Vencer Crisostomo, tagapangulo ng Anakbayan.

“Pinalala ng mga polisiya ng administrasyong Aquino ang krisis sa sistema ng edukasyon. Hinayaan ni Aquino na lalong maging negosyo at prebilehiyo para sa iilan. May pera para sa pork (barrel) pero wala para sa ating mga paaralan at mga guro,” ayon Crisostomo.

Para sa kay Valbuena, mahusay na napagtatakpan ng administrasyong Aquino ang krisis sa sektor ng edukasyon sa kapahamakan ng mga guro at mga mag-aaral.

Babala

Nagbabala ang mga guro ng isang malawakang mass leave kung mananatiling wala sa badyet para sa 2015 ang dagdag sahod para sa mga guro.

Nakikiisa din ang mga mag-aaral sa labang ito na nagbanta din ng malawakang kilos-protesta at strike sa mga pamantasan.

“Ang pang-iinsultong ito ni Aquino ay kinakailangan tapatan ng mga protesta. Kung mag ma-mass leave ang mga guro, susuportahan ng mga kabataan ng malawakang mga strike,” ayon kay Crisostomo.

Iba pang mga larawan:

Protesta sa Malakanyang: