Sa paghahanda ng lokal at pambansang pamahalaan sa pagdating ng bagyong Ruby (pandaigdigang ngalan: Hagupit) sa bansa ngayong araw, may nagrereklamo nang umano’y di maayos na pagpapalikas at pagsisilid sa mga residente mula sa iba’t ibang komunidad na inaasahang dadaanan ng bagyo.

Iniulat ng People Surge, organisasyon ng mga survivor ng bagyong Yolanda sa Eastern Visayas, ang umano’y “kalunus-lunos na kalagayan” ng mga nagsilikas na residente sa Ormoc City, Leyte.

“Inirereklamo ng 168 pamilya galing ng Brgy. 37 Reclamation Area (sa Eastern Visayas State University sa Ormoc) ang kanilang nakapanlulumong kalagayan. Ayon sa mga kinauukulan ng unibersidad, nanatiling nakakandado ang mga silid-aralan para mapangalagaan ang mga kagamitan lalo iyong mga nasa laboratoryo kaya sa mga pasilyo na lamang nagtitiis ang mga tao doon. Dagdag pa nito, wala pa rin silang natatanggap na kahit anumang tulong mula sa pamahalaan,” sabi ng People Surge sa kanilang Facebook account.

Inireklamo din ng grupo na maaaring bulnerable ang mga residenteng nagsilikas sa pagdating ng bagyo dahil walang tabing ang mga pasilyo at malayang humahampas dito ang malalakas na hangin.

Sa Tacloban City, umalma rin ang grupong Kalipunan ng Damayan ng Mahihirap (Kadamay) sa anila’y pagdemolis ng mga stall sa paleknge na pag-aari ng mga maralitang pamilya na lumikas na bago dumating ang bagyo. Samantala, anila, bantay sarado ng Philippine National Police at Armed Forces of the Philippines ang malalaking mall at establisimyento sa lungsod.

Sa bahagi ng gobyerno, inanunsiyo ng Malakanyang na pinulong umano ni Pangulong Aquino ang National Disaster Risk Reduction and Management Council (NDRRMC) para sa koordinasyon ng mga paghahanda para sa bagyong Ruby.

Kabilang sa paghahanda umano ng gobyerno: 100,000 family food packs ng Department of Social Welfare and Development; inihahandang dalawang eroplanong C-130 at mga helikopter para sa transportasyon ng relief at tao kung kailangan; pag-standby ng Engineering Battalions ng kasundaluhan; at pagtakda ng Office of Civil Defense ng first responders sa panahon ng emergency.

Itinakda ni Aquino ang Department of Interior and Local Government, sa pangunguna ni Sec. Mar Roxas, bilang overall na tagapangasiwa sa paghahanda.

Matatandaang naging sentro ng batikos sa publiko at sa midya si Roxas noong nakaraang taon dahil sa di-mabilis umanong pagresponde sa mga biktima ng bagyong Yolanda.

‘Photo-ops’ lang

Binatikos ng grupong pangkabataan na Anakbayan ang administrasyong Aquino sa anila’y “photo-op response” sa pagdating ng bagyong Ruby.

“Maliban sa inareglong ‘briefing sessions at mga press conference ng Liberal Party na nakakatulong sa eleksiyon nito, ano ba talaga ang ginagawa ng gobyerno para maghanda at siguruhin ang kaligtasan ng mga taong dadaanan ng bagyo? Mukhang walang totoong pagbabago sa kung paano nila hinaharap ang mga kalamidad,” sabi ni Vencer Crisostomo, tagapangulo ng Anakbayan.

Sinabi pa ni Crisostomo na dahil bigo ang planong relief and rehabilitation ng administrasyong Aquino matapos ang Yolanda, “mas bulnerable ngayon sa bagyo ang mga mamamayan ng Visayas.”

Sa kabila nito, sinabi ni Crisostomo na nagtutulung-tulungan din ang iba’t ibang people’s organizations para sa pagpapalaganap ng napapanahon at mahalagang impormasyon. “Dapat imaksimisa natin ang social media para sa koordinasyon, pagtugon sa kalamidad, relief at suporta,” sabi pa ni Crisostomo.