Iniwan ni Ammied Mangarin, 33, ang pagsasaka sa Romblon at nagtungo sa Maynila para humanap ng ikabubuhay. Kinuha rin niya ang tatlo pa niyang kapatid para makipagsapalaran dito. Pero hindi niya inakala na dalawa sa kanyang kapatid ang masasawi sa trahedya sa pabrika ng Kentex Manufacturing Corp. sa Valenzuela City tatlong buwan na ang nakararaan.

Kasama si Ammied, at iba pang pamilya ng mga biktima ng trahedya na sumugod sa tanggapan ng Department of Labor and Employment (DOLE) para markahan ang ikatlong buwang ng kawalang katarungan para sa mga biktima ng trahedya.

“Mahirap pa rin, dahil tatlong buwan na pero wala pa ring hustisya. Kung ikaw ay indibidwal na tao at makapatay ka ng isang tao kulong ka agad. Pero dito, 74 na manggagawa wala pa rin (katarungan). Kawawa ang ibang biktima na walang mahingan na tulong,” ani Ammied.

Dati ring manggagawa ng Kentex si Ammied. Nakaligtas ang isa pa niyang kapatid na si Katherine Rivera, 30, sa nasabing trahedya. Silang apat na magkakapatid, naging kontraktuwal sa Kentex.

Nag-iipon sila at balak sana nilang umuwi sa Disyembre para magkasama-sama muling magpapamilya. Pero ayon kay Ammied, hindi siguro ito matutuloy pa.

Wala pa ring napapanagot

Hindi kailanman naging madali para kay Marilyn Yco, 49, na tanggapin ang sinapit ng anak na si Frederick Yco, 24. Isang linggo pa lang kasing nagtatrabaho si Frederick sa nasabing pabrika.

“Masama sa kalooban namin na wala pa rin ang hinihingi hustisya. Binabalewala nila (kami) dahil maliliit lang kaming tao. Masakit para sa isang magulang na ganoon ho ang nangyayari. Siya lang ang inaasahan ng pamilya namin,” sabi ni Marilyn.

Para naman sa Kilusang Mayo Uno (KMU) na kasamang nagprotesta ng mga pamilya ng biktima, inilatag umano ng administrasyong Aquino ang mga hakbangin para pagkaitan ng lubos na katarungan ang mga manggagawa ng Kentex. Tinutukoy nila ang pagtanggi ng gobyerno na kasuhan ang matataas na opisyales ng DOLE at Bureau of Fire Protection sa nangyaring trahedya.

“Malinaw namang pinayagan ng DOLE na mag-operate ang Kentex sa pagbibigay rito ng certificate of compliance sa kaligtasan at karapatan ng mga manggagawa noong Setyembre 2014. Malinaw namang hindi man binigyan ng BFP ang Kentex ng Fire Safety Inspection Certificate, hindi naman nito ipinasara ang kumpanya,” ayon sa KMU.

Masakit din sa loob ni Ammied na walang kongkretong aksiyon ang gobyerno pagkatapos ng sunog sa Kentex.

“Ang tagal nang nag-o-operate ng Kentex ngayon lang sila nag-ikot. Hinintay pang magkatrahedya. May sunog na naman noong nakaraan na pabrika may namatay na naman. Anong klase yan? Nasaan ang gobyerno natin?” ani Ammied.

Wala pa ring sapat na tulong

May nauna na umanong naipamigay ang DOLE ng P10,000 bilang tulong sa ilang biktima. Pero para sa mga pamilya, hindi ito kailanman sasapat, dahil hindi mapapalitan ang buhay ng kanilang kaanak.

Hindi pa nakakakuha si Marilyn, pero hindi umano sapat ang anumang materyal na bagay na kapalit sa buhay ng kanyang anak. Hustisya para sa kanya na managot ang lahat ng may pagkakasala sa nasabing trahedya.

“Dapat bigyan nila ng atensiyon para hindi na dumami ang mamatay uli. Dahil hindi basta-basta ito, dahil buhay ang (ipinaglalaban naming dito),” sabi ni Marilyn.

Para naman kay Sydney Bartoniko, 22, hindi sapat ang tulong na ibinigay sa kanila. Lalo na ngayon, wala silang trabaho at may sanggol pa siyang pinagagatas.

Namatay ang kapatid ni Sydney na si Vincent Bartoniko, 28, na dalawang lingo pa lamang sa Kentex noon. Paalis na sana patungong Holland si Vincent. Siya sana ang inaasahang makatutulong sa pang-ekonomiyang pangangailangan ng kanilang pamilya.

Masakit para sa mga pamilya ng biktima ang mawalan ng kaanak sa trahedya. Pero dagdag na sakit at galit ang kanilang nararamdaman na makitang walang pa ring nanagot sa trahedya habang abala na sa kampanya ang gobyernong inaasahan dapat nila.

“Kung sa pamilya niya (Aquino) ito nangyari, ano’ng mararamdaman nila sa sarili nila? Sasabihin lang ba nila na disgrasya na lang? Hindi ganoon. Maraming kapabayaan kaya nadisgrasya. May kailangang managot dito,” sabi pa ni Ammied.

Hindi umano sila bibitiw sa laban para sa hustisya.