Migrante, hati ang damdamin sa deployment ban sa 41 bansa
Inihayag ng Migrante International na hati ang kanilang damdamin sa pagdeklara ng Philippine Overseas Employment Agency (POEA) ng deployment ban sa 41 na bansa. Inaapela ngayon ng Department of Foreign Affairs ang nasabing deployment ban na ipinataw ng POEA dahil sa kabiguan ng mga nasabing bansa na pangalagaan ang kapakanan ng Overseas Filipino Workers (OFWs) […]
Inihayag ng Migrante International na hati ang kanilang damdamin sa pagdeklara ng Philippine Overseas Employment Agency (POEA) ng deployment ban sa 41 na bansa.
Inaapela ngayon ng Department of Foreign Affairs ang nasabing deployment ban na ipinataw ng POEA dahil sa kabiguan ng mga nasabing bansa na pangalagaan ang kapakanan ng Overseas Filipino Workers (OFWs) alinsunod sa Republic Act 10022 o Migrant Workers and Overseas Filipinos Act of 1995.
“Sa isang banda, positibo na tila may seryosong aksiyon ang gobyerno para siguruhin ang proteksiyon ng mga karapatan ng ating OFWs. Sa kabilang bansa, tila wala namang kahandaan ang gobyerno na tugunan ang posibleng mga implikasyon ng ban,” ani Garry Martinez, tagapangulo ng Migrante International, pandaigdigang alyansa ng OFWs.
Nag-aalala ang lider-migrante sa kawalan ng plano ng gobyernong Aquino na lumikha ng lokal na trabaho para sa OFWs na apektado ng ban, at sa posibilidad na lumalala ang ilegal na rekrutment at human trafficking.
“Kung seryoso sila sa pag-ban, dapat ay seryosohin din nila ang paglikha ng trabaho at pagbigay ng dagdag-sahod dito sa Pilipinas,” sabi ni Martinez.
Idinagdag ng lider-migrante na kung walang pagbabago sa sitwasyon ng pag-eempleyo sa bansa, mananatiling “desperado” na makaalis sa bansa ang OFWs kahit pa sa ilegal na pamamaraan.
Kuwento niya, “Marami na kaming nahawakang kaso ng human trafficking sa mga bansa kung saan may deployment ban, gaya ng Jordan, Iraq, Syria at Bahrain. Sa ilang mga kaso, mga opisyal pa mismo ng gobyerno ang sangkot sa trafficking ng ating mga kababayan.”
Ayon sa RA 10022, dapat ang host countries ng OFWs ay may “existing labor and social laws protecting the rights of workers, including migrant workers; is a signatory to and/or a ratifier of multilateral conventions, declarations or resolutions relating to the protection of workers, including migrant workers; and has concluded a bilateral agreement or arrangement with the government on the protection of the rights of overseas Filipino workers.”
Sa listahan ng POEA na inilabas noong Oktubre 28, may 41 na bansa ang hindi tumutugon sa rekisitos na ito.
