Kinondena ng International Coordinating Committee at lahat ng miyembrong organisasyon ng International League of Peoples’ Struggle (ILPS) ang pagmasaker sa 73 migranteng manggagawa mula iba’t ibang bansa ng Latin America at nanawagan ng masusing imbestigasyon at katarungan para sa mga biktima.
Binatikos ng Karapatan ang pagtalaga ni Pang. Benigno "Noynoy" Aquino III kay Gen. Raul Bacalzo bilang pinuno ng Philippine National Police (PNP), kapalit ni Gen. Jesus Versoza.
Nagsindi ng kandila ang mga mamamayan ng Davao City sa pangunguna ng Exodus for Justice and Peace para kondenahin ang nauulat na militarisasyon sa distrito ng Paquibato kung saan dalawang inosenteng sibilyan ang pinaslang. Pinaslang si Naldo Labrador, isang magsasaka at miyembro ng Kilusang Magbubukid ng Plipinas, sa harap ng kanyang anak. Lumahok sa pagsindi ng kandila ang mga akaanak ni Labrador.
Taas-kamao si Fr. Dionisio Cabillas, aktibistang Aglipayang pari, sa pagtatapos ng misa para sa lider-obrero sa transportasyon na si Medardo "Ka Roda" Roda na yumao noong Setyembre 5. Matapos ang misa, binigyang-parangal si Roda ng iba't ibang militanteng lider at organisasyon, na tumitingala sa kanya bilang isa sa pangunahing lider-oposisyon noong diktadurang Marcos at pinakatanyag na lider ng mga manggagawa sa sektor ng transportasyon bilang tagapangulong emeritus ng Pagkakaisa ng mga Samahan ng Tsuper at Operators Nationwide o Piston. Umapaw ang mga tao sa UCCP Chapel sa EDSA, Quezon City sa dami ng mga gustong makiisa sa parangal. Inilibing si Roda noong Setyembre 12.
Pinangunahan ng mga miyembro ng Consumer Alert ang isang signature drive sa Agdao Public Market sa Davao City para mangampanya laban sa pagtaas ng singil sa kuryente na ipinapatupad ng Davao Light Power Company na pag-aari ng mga Aboitiz. Nangangamba ang grupo na lalala ang aba nang kondisyon ng mga mahihiap sa Mindanao bunsod ng dagdag-singil sa kuryente.
Idinaos ng Samahan ng mga Ex-Detainees Laban sa Detensyon at Amnestiya o SELDA ang isang pambansang kumperensiya. Dito tinalakay ang usaping matagal naisyung bayad-pinsala sa mga biktima ng paglabag sa karapatang pantao sa panahon ng diktadurang Marcos. Tinalakay din ang kasalukuyang kalagayn ng halos mahigit 300 bilanggong pulitikal na nasa iba't ibang piitan sa buong bansa. Dumalo sa pagtitipon ang mga dating bilanggong pulitikal na sina dating Rep. Satur Ocampo, Maita Gomez, at dating Rep. Romeo Candazo. Itinakda rin nila ang Setyembre 17 bilang pambansang araw ng pagkilos para sa mga bilanggong pulitikal sa bansa.
Masayang ipinagdiwang ng mga Muslim sa Golden Mosque sa Quiapo, Manila ang Eid'l Fitr, ang selebrasyon na pagtatapos ng pag-aayuno sa panahon ng Ramadan.
Davao City – Nagpiket ang mga residente ng Monfort, Fatima sa Bacaca, kasama ang Kalipunan ng Damayang Mahihirap (Kadamay) sa harap ng City Housing Office para ihayag ang pagtutol sa napipintong demolisyon sa kanilang mga bahay at hilingin ang interbensiyon ni Davao City Mayor Sara Duterte.
Habang nasa plenary session, kinausap ni ACT Teachers Rep. Antonio Tino si Saranggani Rep. Manny Pacquiao para hilingin ang suporta ng huli bilang co-author sa House Bill No. 2142 o “The Public School Teachers’ Salary Upgrading Act” na ipinanunukala ng ACT Teachers Party-list.
Kinondena ng Karapatan sa Bikol ang tumitindi umanong panghaharas sa militanteng mga organisasyon ng mga elemento ng militar at pulis.
